རྒྱང་རིང་།

                                       @མྱི་སྨྱོན།

གླུ་སྐད་དེའི་དབུ་རུ་འཁྱུད་ནས་གཏམ་རྒྱུད་གཅིག་གི་མཐའ་རུ་བསམ་དུས།

རྒྱང་དུ་བུད་པའི་སྤྲིན་པ་ཁེར་ཁེར་ཞིག

ད་དུང་ཡང་དྲོད་ལ་དུངས་བའི་བྱ་ཁྱུ་དེ་དག་དྲན་འོང་།

དེ་དུས་ང་ཕ་ཡུལ་གྱི་རྩྭ་ཐང་ན་ཡོད།

ཞོགས་པ་ཞིག་ལ།

ངའི་སྔས་མགོར་བབས་པའི་གཏམ་ཁྲ་ཁྲ་དེ་ཚོ།

སེམས་ཀྱི་ཁུག་མར་བཅུག་ནས།

འཇའ་འོད་ཀྱི་བསླུ་བྲིད་ལ་འཁྱུད་པའི་ཡུལ་ལུང་འདི་ནས།

རླུང་བུ་བསིལ་བསིལ་ཞིག་དང་ལྷན་དུ་རྒྱང་རིང་ལ་ཆས་མྱོང་།

ཁ་བ་བབས་སོང་།

ཁ་བ་བབས་དུས།   ཡོད་ཚད་འཁྱགས་ཟིན།

ངའི་ཨུ་ཚུགས་ཀྱིས་སྤོས་པའི་རྐང་རྗེས་རབ་རིབ་དེ་ཁ་བས་བཀང་།

དེ་དུས་བྱ་ཁྱུ་རྒྱང་ལ་བུད་ཟིན།

ཆང་རྫོགས་སོང་། མིག་ཆུ་ཟད་སོང་།

སྨག་ནག་པའི་མཚན་མོར་གླུ་སྐད་ཀྱང་ཡལ་སོང་།

ཚོར་བ་མེད་པའི་སྙན་ངག་གཅིག་ལས་རྒྱང་རིང་ཞེས་བར་མེད་དུ་གླེང་།

                            2016/10/8ཉིན།