对于像“腔调”迭个词语唻讲伐，伊勒拉《辞海》里向个解释有得三种。第一种解释就是勒拉讲：戏曲曲调；第尼种解释就是勒拉讲：乐曲个声律；第三种解释就是勒拉讲：个人勒拉讲闲话个辰光，伊个语气搭语调是哪能样子个。吾是一个土生土长个上海人，还因为自家曾经去过国内交关多个省份搭城市，通过吾自家个对比搭比较以后，就发觉到迭能一桩事体哦，勒拉全国范围内唻讲伐，“顶顶讲究腔调”个一群人，还是要数上海人，上海人所谓个腔调又是指啥个么事呢？！迭个就是讲：一个人言行举止个总体表现，到底是哪能样子个！
“侬迭个人畀人看起唻，腔调方面覅要忒浓哦！”勒拉沪语方言闲话当中，假使有某个人去采用覅同个语气搭语调从嘴巴里向讲出唻嘞以后，就可以表示出覅同个含义搭意思唻个，伊既可以去表示褒义方面个含义搭意思，伊还可以去表示出贬义方面个含义搭意思。
褒义方面个含义搭意思是勒拉讲：“吾个人认为，侬迭个人就是属于长得交关帅气个，而且还有得邪气好个绅士范唻，吾交关喜欢侬迭个人个，侬本人哪能会得一眼眼感觉也是呒得个啊？！”……
贬义方面个含义搭意思，伊所要表达个潜台词就是勒拉讲：“畀吾看起唻，侬迭个人勒拉修养方面是属于交关推扳个，或者讲，侬勒拉为人处世之道也是迭能样子个，吾对侬是邪气感冒个！”……
当吾走过31年个生命旅途以后，陪伴着自家个人生经历搭人生阅历变得增多、增厚起唻以后，自家是迭能样子唻理解、认得并去认为“腔调”迭桩事体个，而且绝大多数个上海人，也是迭能样子唻认为个，迭个词语从表面上头看起唻，好像勒拉讲做人最注重个就是一个人个外表到底是哪能样子个，实际浪向并覅是迭能样子个，伊最主要个核心内涵，与此同时也是腔调最最重要个组成部分，而且两者之间还是缺一覅可个。吾伲勒拉接触并看待某个人个辰光，首先映入到眼睛里向个，迭个就是－－迭个人个面相到底是哪能个、到底长得是哪能样子个一个人，相貌方面灵光覅灵光。勒拉上海人看起唻，某个人勒拉相貌方面是长得邪气推扳、交关难看个闲话，是用覅着多去讲点啥个，自会得压压较避避开，更覅大会得搭伊交流点啥么事个！
凡是有迭种想法个人，伊邪气容易忽略个人个“声相”，“声相”就是指“人个声音”，实际浪向一个人声音个好搭坏，就能够影响到伊个得搭失，千万覅好去小看迭个小小个得搭失，伊绝对足够左右个人迭个一辈子唻！吾伲覅是经常性会得去讲迭能一句闲话哦，讲道：“未见其人，已闻其声！”勒拉成语当中覅是也有得“声泪俱下、声嘶力竭、先声夺人”……“腔调”勒拉上海闲话当中，有得邪气大个一部分是搭声音有着交关大个关系个，由此可见，一个人声音个好搭坏，对于自家个整体形象是邪气重要个。声音，或者讲嗓音个大搭小、好搭坏侪都是与生俱唻个，有一些人天生就有得一副好嗓子，伊个声音就好像是黄莺勒拉出谷；有一些人个声音显得高亢嘹亮，讲起闲话唻声音声如洪钟；还有一些人生唻就是一副沙哑喉咙，讲起闲话唻，总归是哑哑个；勒拉俗常生活当中，有一些长一码大一码个男人，讲起闲话唻是细声细气个……虽然讲个人个嗓音是与生俱唻个，既是爷娘传畀吾伲个，也是搭人体基因有关系个，吾伲是呒办法去改变忒个，从更深一个层次唻讲，还是搭个人个修养、品味是息息相关个。
勒拉俗常生活当中，吾伲经常会得看到一些人衣着是邪气华丽考究个、搭配也显得交关协调，但是一开口讲起闲话唻，会得显得交关粗俗覅堪，开口闭口就要标点符号满天飞舞，伊习惯开始开口讲闲话个前头、讲某一桩事体个辰光，首先就是要畀标点符号带出唻，假使覅先开口去讲讲各种标点符号，下面个闲话就覅晓得哪能去讲嘞，即使伊勒拉讲闲话个辰光，语气搭语调再哪能平和，畀人个一种感觉就是－－迭个人邪气缺乏修养、也显得太呒教养嘞，覅晓得伊拉个爷娘是哪能唻教育伊本人个；有一些人声音浑厚嘹亮，讲起闲话唻覅大欢喜去讲带有半点覅大文明个各种闲话，但是勒拉腔调当中，总归会得透露出一股傲慢搭冷漠；亦有一些人勒拉讲闲话个辰光，覅是“打着官腔”，畀吾伲个感觉伊就是勒拉“打太极拳”……讲迭种闲话个人，就是勒拉出卖自家个形象。吾是迭能样子唻想并去认为个，面对迭种类型个人，搭伊交流交往方面也顶多只会有一趟罢了，走到第尼趟再碰到嘞伊，会压压较避避开，绝对再阿覅会得搭伊交流交往个，每趟仔碰头眼扳数会躲得远远个，是覅会有人愿意搭伊长期交往个！
诚然，要想畀自家个声音讲得邪气悦耳动听，吾是迭能样子唻认为个，主要还是搭音色个好跟坏，是有着密覅可分个联系搭关系个，但畀过，更为重要个一桩事体到底又会得是啥个么事呢？！迭个就是－－覅管是身处勒拉啥个社会阶层里向个群体搭个人，伊本人勒拉开口讲闲话个辰光，甚至于勒拉讲闲话个全过程当中，一定要去做到口齿清爽、吐字清晰，语气要谦和谨慎、落落大方，而覅能过于个娇柔造作，还要等到人家讲好嘞以后，然后再接着其他人所要讲个话题接下去讲，而覅是开始就去喧宾夺主，抢先去发言，讲一些信口雌黄、侃侃而谈个闲话，大有天底下呒有“吾”覅晓得个事体一样个。
另外，吾本人还想要去讲个一桩事体，迭个就是－－对于属于身处勒拉年轻行列当中个青年人唻讲伐，覅管伊本人是勒拉见工面试个辰光，还是搭女朋友勒拉约会个辰光，对于“谈吐”方面唻讲伐，也是属于邪气重要个一桩事体哦，即便自家勒拉讲闲话个辰光，普通闲话发音方面就是属于覅大标准个，还会得带有家乡方面个口音，也一样是呒得啥个关系个，顶顶关键个原因有得如下个两条，也一样是属于覅可缺少个。第一条迭个就是－－要勇于尝试开口去讲闲话；第尼条迭个就是－－既要表现出自家交关自信个一面，又要畀对方感觉到自家个一份真情搭实意，个人每趟仔只有迭能样子唻操作个人，侪会得畀对方或大家留下美好个印象，做起事体唻侪能够事半功倍！
固然，每一个人侪要去晓得迭能一桩事体，一个人个声音勒拉“音质”方面是属于先天性搭与生俱唻个，吾伲无论如何也是呒得啥个好办法去改变忒伊个，虽然是迭能样子唻讲个，但畀过，一个人勒拉声音方面个腔调，是属于后天可以加以去培养出唻个。只要侬搭吾是一个有心人，去观察俗常生活当中个方方面面，就会得发觉迭能一桩事体唻个，迭个就是－－吾伲经常性会得去讲“声情并茂”迭个词语，却并覅是勒拉讲，只要是勒拉讲闲话个人，伊本人个音质就是属于覅（大）悦耳动听个，是覅会得像电视台浪向个主持人那样标准，也是呒得交关好个风范个，而是指迭个人勒拉讲闲话个辰光，是呒得足够个真诚、是覅用真情搭实感唻打动所有个人，是呒办法让所有个人实实在在个感觉到，讲闲话个人是畀吾伲带唻嘞一份真情搭实意。
为啥勒拉沪上有得一档广播节目叫做《滑稽王小毛》，伊从1987年5月11日开播到今早仔，一直受到广大上海地区个老百姓个欢喜啊，尤其是勒拉每个礼拜天个夜到头，还有得一档节目叫做《王小毛信箱》，更是听众覅可缺少个一道开胃夜饭，即便错过嘞首播，也要勒拉第尼天早浪向重播个辰光去补听，覅单单是迭能样子哦，即使有覅少个人昨天仔去听过嘞，到第尼天早浪向有得重播个辰光，还照样是有得交关多个人去重听一遍，侪是因为主持人葛明铭先生勒拉讲闲话个辰光搭讲闲话个全过程当中，就是属于一个邪气有得腔调个人，伊几十年以唻，一直坚持讲实话、讲真话，从唻呒得去讲过一句假闲话，伊所讲个闲话，侪都是老百姓个身边事体、搭老百姓休戚相关个事体、为老百姓而一声呐喊……可以讲始终是坚持如一个，从唻呒得去更改忒迭个一条宗旨哦，所以讲，讲闲话有得腔调是交关重要个事体！
“声音”实在是忒重要嘞，因此令吾伲勒拉讲闲话个辰光，覅得覅去注重礼节，勒拉打电话个辰光也一样是覅能去例外个。既覅管是勒拉俗常工作当中，还是勒拉自家个屋里向；也覅管是勒拉私企做生活个，还是勒拉外企做生活个；只要是凭电话里向讲闲话个人个声音，就可以对迭家企业个企业文化、迭家人家个文明程度略知一二。到嘞今早仔，覅管是家用电话，还是手机侪都是交关普及嘞，家家户户僎都有得一部电话，人人手里至少有得一部手机，畀过电话礼仪却是交关欠缺个。有一些人每趟仔拎起电话（手机）就会大声去喊道：“侬啥人啊？！”个人为啥就覅能委婉个去讲：“吾是某某，请问侬是啥个人啊？！有得啥个事体是吾可以效劳帮侬忙个？！”……还有得一些人打错忒嘞电话，连得讲声对覅起也是呒得个，就直截了当个去畀电话（手机）挂忒嘞，更有甚者，既覅管是勒拉啥个场合里向，也覅管人有得多少，明明一两分钟就可以去讲清爽个一桩事体，就欢喜勒拉一旁边扯开大嗓门，叽里呱啦个去讲嘞邪气长个一段辰光。打电话个辰光只能是闻其声，而是看覅到伊本人个，但畀过，伊极有可能是一家企业、一个家庭个窗口，从电话里传出唻个声音，就好像是一个测试表，伊就能够去看出一家企业个文化、一个家庭个教养，到底是哪能样子个、好覅好啊，因此坚决覅能去小看腔调迭桩事体啊！
吾继续想要去讲个闲话，迭个就是－－要想畀声音讲得邪气悦耳动听，使得任何一个人侪都能够去接受下唻，而覅至于让大家侪都觉着是属于交关讨厌个一桩事体，有得啥个好办法伐？！勒拉吾本人看唻，顶有效个一个办法，迭个就是－－勒拉讲闲话个辰光，要尽量去降低自家个音调，低到只要对方能够去听清爽就可以嘞。多少年唻，国人一直就欢喜去采用大批判搭大辩论个形式，讲起闲话唻个辰光，侪都欢喜扯开大嗓门去讲，也是覅去区分啥个场合个，就算条件交关好嘞，跑到外国去旅游嘞，也是迭能样子个，好像只要嗓门一大，底气就会变得实足，只要底气一足，讲闲话也就“全在理”嘞，伊本人会得去认为，其他人就覅敢唻欺负自家嘞，想要去欺负也就变得交关困难！迭能样子个歪理学说绝对是要覅得个，也是素质推扳个！
讲也是迭能样子去讲个，写也是迭能样子唻写个，真正能够去做到个人，到底又能够有得几个人啊？！真个可以讲是少之又少，包括本人也计算在内，也是一色似样也是迭能样子个，勒拉某些辰光里向，本人有可能完完全全是可以去做到个，有可能自家忘记忒以后，一点侪覅能去做到个，从今早仔起要改正覅好好较讲闲话个坏习惯。
当文章写到此地块，勒拉本人个脑海里向突发奇想起唻嘞，有得一种邪气奇怪个想法，如果勒拉中国个梁山伯搭祝英台、勒拉外国个罗密欧搭朱丽叶，侪都成双成对个结为夫妇，做一对恩恩爱爱、令人羡慕个神仙眷侣，去出现勒拉每一个人个面前个辰光，覅晓得到嘞伊个辰光，吾伲又会得去采用哪能样子个一种腔调唻面对伊拉？！
【补记：第一就是：有关于迭篇文章，就是吾偶然勒拉书房间里向，清理覅需要个物品个辰光去发觉个；第尼就是：勒拉人世间有得交关多讲覅清爽个一桩事体，比方讲搭别人撞衫。吾发觉本人搭沪上已故知名知性女作家程乃珊先生就撞嘞衫，就是因勒拉2012年个辰光，购买程先生个《上海素描》一书，恰巧里向也有一篇叫“腔调”个文章，本人是个欢喜阅读搭写作个文学爱好者，竟然也搭先生写过类似个文章，真个是呒去想到。第三就是：要申明个一桩事体是，有一些覅明就里个人，看嘞文章以后准会得去认为是抄袭程先生个文章！】
【备注：①：文章为作者原创；②：各种腔调类图片、葛明铭老师图片搭评弹弹唱图片均唻源于网络上头；③：万分感谢原创图片。】
杜老倌侠客居（陆伟）写于2008年04月26日礼拜六下半日
