来了广州一段日子，其中一样最令在下意外嘅系：呢度周围都有"肠粉王"。香港逢亲食粥的地方都有肠粉食，亦有些小食店卖烧卖(在下而家知道本地人仲有一种大型干蒸烧卖，叫"干蒸")、鱼蛋串，会顺便卖埋预造的"猪肠粉""虾米肠"，但就好少有专门卖肠粉的食店(在下只识深水埗"合益泰") 。在下都鍾意食肠粉，所以喺广州都试过几间，老实讲，麻麻地，整体来说都系布拉肠粉，但厚咗啲，唔系在下食惯的皮薄透光嗰种。但系有间"银记肠粉皇"在下都帮趁咗好几次，特别系"茶树菇(菰？)肠"真系唔错，胜在馅料特别，香港食唔到。而呢间银记真系名副其实"肠粉皇"--除咗肠粉--得罪讲句--其余冇样食品似样......

讲起肠粉，另一样在下估唔到嘅系同系广东人，原来对同一种食品嘅叫法会咁唔同。香港人基本一致称呼其为"肠粉"，广州人原来好多系用"拉肠"，而在下潮汕朋友就话佢哋讲惯"粉肠"，而猪杂的"粉肠"佢哋叫"猪粉肠"。上面讲过下，香港仲有一种低档少少习惯叫"猪肠粉"，或者"斋肠"嘅淨肠粉，通常唔系师傅即制，系预先捲好切段，客人叫单即上，会淋上熟油同少少甜鼓油；有一种变化型叫"虾米肠"，肠粉皮里混入虾米葱花一齐蒸，食法都系一样。在下鍾意再加上少少甜酱蔴酱，大量豉油辣酱芝蔴来食，肠粉皮拉得愈薄，捲得愈多层，夹层中渗住愈多酱油就愈滋味。在下觉得广州应该都有呢种肠粉，去西关揾揾先。