吾是一个土生土长个上海人，勒拉吾所在个城市上海市，每年只要一到入夏季节，骄阳似火酷热难耐，即便是走到天气逐渐凉爽个秋天日脚，假若是畀一波“秋老虎”袭击，也照样是酷热难耐个！
勒拉计划经济年代里向，上海市曾经拥有十个郊县搭十个区。十个郊县分别就是指：上海县、川沙县、南汇县、奉贤县、金山县、松江县、青浦县、嘉定县、宝山县搭崇明县。十个区分别就是指：静安区、黄浦区、南市区、卢湾区、普陀区、杨浦区、虹口区、长宁区、徐汇区搭闸北区。对于一些居住勒拉市区里向个居民唻讲，尤其勒拉空调还呒没发明出唻，还呒没迈入到千家万户个前头，覅管是居住勒拉老式石库门里向个居民，还是居住勒拉新式里弄里向个居民，尤其是对于居住勒拉顶楼（层）个居民，勒拉夏秋日脚快要到唻个前头，向房管所打一个申请报告，【备注：老底子个“房管所”就畀今早仔改制为房地产管理局，勒拉老底子个上海滩浪向，每个区里向至少会得有一个房管所。】去开“老虎天窗”，以便让空气能够多流通一些，从而使得屋里向多多少少侪能够去降降温，还能变得凉爽一眼眼。
吾从一些历史文字资料搭历史纪录片中看到，国家勒拉1978年11届三中全会中提出“改革开放”迭个口号搭决议。畀过，吾伲国家全面执行“改革开放”个辰光是勒拉20世纪90年代中期以后，勒拉迭个前头，绝大多数个城市依旧还处勒拉“计划经济时期”个里向，一切事体侪要听从政府部门计划安排，而覅是依靠市场唻调节个。勒拉计划经济年代里向个上海市，每趟仔快要迈入到夏天日脚个辰光，尤其是住勒拉市区，且还是居住勒拉顶层个居民，会去房管所申请开一个老虎天窗。凡居住勒拉市区里向个人，去打申请“开老虎天窗”个报告，要是覅勒计划安排之内，房管部门（房管所）也覅一定肯办理，迭个辰光个老百姓，只能是八仙过海各显神通，找门路托关系开老虎天窗，而且是越快越好，为勒让“开老虎天窗”办成功，亦愿意花一眼铜钿。今早仔吾伲到处提出违章建筑、举报违章建筑、还要大力拆忒违章建筑，覅晓得掰搿辰光开老虎天窗是否也属于违章建筑。
“老虎天窗”是一句上海方言俚语闲话，伊又畀叫做“老虎窗”，伊个意思就是讲：是一种开勒屋顶上头个天窗，用于房屋顶部个采光搭通风。迭个名称个起源，是有得如下个两种讲法。第一种就是：因为老虎窗个形状好像老虎个眼睛，第尼种就是：因为老虎窗可以让人从屋顶上看到外头个情况，就像老虎勒拉山林中观察猎物一样。
去查阅各种资料以后让吾晓得，吾伲国家是勒拉1974年侪开始研发空调，上海是勒拉20世纪90年代中期以后，侪逐渐个开始普及使用空调，勒拉迭个前头、勒拉20世纪个80年代到90年代，每家每户家里侪拥有各式各样个电扇，比方讲：吊扇、落地扇搭台扇，【备注：勒拉掰搿辰光，三种电扇有得一种个家庭，家庭条件已经算邪气好，要是拥有两件就是“大户人家”。“大户人家”勒拉通常情况下唻讲就是指地位比较显赫个家庭，上海人讲个“大户人家”就是指经济条件唻得交关好个家庭搭个人。】勒拉掰搿辰光电压覅太稳定、电量又小，几家人家同时开启好几件家用电器个闲话，邪气容易断电，一到天热，避暑个方式就是“乘风凉”。有些人家会早早个吃好晚饭汏好浴，拿上小板凳搭蒲扇，到弄堂口去乘风凉；有些人家会边吃晚饭边乘风凉；有些人家会边读书报边乘风凉；有些人家会边下棋打扑克边乘风凉……乘风凉个前头，多数人家会勒地浪向洒两三趟清水，为个就是畀地面降降温，勒拉乘风凉个辰光，多少侪能变得凉爽一眼眼。
要是碰着那些充满生活情趣、有得小资情调个家庭唻讲伐，勒拉“乘风凉”个辰光，【备注：“乘风凉”迭个词语，既是一句上海方言俚语闲话，也是吴语地区通用个方言俚语闲话，伊个含义就是讲：吴地个人勒拉夏夜里向纳凉消暑，北方闲话就畀叫做“纳凉”。】迭种类型个人覅仅自身会去佩戴两朵或栀子花，或白兰花，还会畀自家个子女也去佩戴上栀子花搭白兰花，那淡淡个、似有似无个自然幽香味，霎时间就会侵入到鼻中，一直要通到肠胃搭脑子里向，甚是好闻，此时此刻伊本人个精神也会变得清爽一眼，迭个就是“老底子”上海人勒拉入夏季节顶欢喜闻到个三大香味之一，其余个两道香味就是花露水个香味搭檀香扇个香味。【备注：“老底子”是指“过去”。】
时至今日吾依旧还能去记得迭能一桩事体，迭个就是－－勒拉吾个少年搭青年时期里向，由于身体邪气弱小个缘因，加之自家又是属于有一眼眼“黄牛肩胛”个缘故，基本浪向是购买覅着合适自家穿个衣裳、裤子搭皮带个，所以讲衣裳搭裤子也只能是去量身定做哦，皮带也只能去购买吊带型个皮带，勒拉绝大多数下头唻讲伐，基本浪向侪穿个是吊带裤子，家父陆吉良因为爱好拍照个缘故，曾经为吾拍摄过几张穿吊带裤子个照片。家母倪榴珍也是一个热爱生活个人，伊也会勒拉有卖栀子花搭白兰花个时节里向，去购买上几朵栀子花搭白兰花，更会勒拉吾穿个吊带裤子上，左右各去佩戴上两朵或栀子花或白兰花，覅仅是迭能样子哦，家母自己也是会佩戴个，家母之所以会欢喜佩戴栀子花搭白兰花，很大个一个原因侪是受到外婆张榴妹个影响哩，外婆张榴妹之所以也会欢喜佩戴栀子花搭白兰花，侪都是因为伊本人交关欢喜去闻迭两种花个香味。勒拉吾少年个辰光，出于好奇之心，也会偷偷较去摸栀子花搭白兰花个花骨朵，要是畀家母发觉勒以后，就会大声训斥道：“覅要去触摸，摸花骨朵就会发黄枯死，花瓣也会逐片落忒，到辰光侬再想闻迭种花香味会闻覅着个！”……
吾个外婆张榴妹，伊勒拉生前既欢喜各种鲜艳美丽个花朵，更欢喜去闻各种花朵个香味，伊邪气欢喜去闻栀子花搭白兰花个香味，伊看唻迭个是上天赐畀人间顶好闻、顶顶香个花香味，只要是迈入到有得卖栀子花搭白兰花个季节，会各自去买上两朵带回家，一朵放勒拉衣橱里向，另外一朵佩戴勒拉自家个身浪向，以便能随时随地闻到迭两种花朵个香味。伊对吾是迭能唻讲个，曰：“闻到迭两种花朵个香味，好像身体就会变得交关好，病痛也会随之减少邪气多，真是神清气爽，同时迭两种花对衣裳搭被头还有得防蛀虫防霉个功效！”
自从吾晓得外婆张榴妹邪气欢喜闻栀子花搭白兰花个香味以后，也就是从吾刚刚开始工作个辰光，每逢要是有得卖栀子花搭白兰花个辰光，还只要看到街浪向搭马路浪向有卖栀子花搭白兰花个摊头，起码要买上八朵或白兰花或栀子花送畀外婆，当伊看到以后，总是会一边眯开眼笑笑得合不拢嘴，一边夸赞吾是一个有良心个好小囡。
当吾再回首过往种种个辰光，勒拉吾个印象搭脑海里向，依旧能清爽个去记得迭能一幕场景，迭个就是－－勒拉吾所在个城市上海市，但凡是一些卖栀子花搭白兰花个人，顶主要是以乡下头农村里向进城个老阿奶为主，同样也会有一些市区里向个老阿奶，也一样会得去卖栀子花搭白兰花，吾从唻呒没看到过男性卖栀子花搭白兰花个。
覅仅是迭能样子，依旧是勒拉吾个印象搭脑海里向，而且一些贩卖栀子花搭白兰花个老阿奶，基本浪向是呒没啥个固定摊头个，伊拉基本浪向侪是采用“打游击个形式”，勒拉那些天气晴朗个日脚里向，今早仔有可能是勒拉迭块地方卖栀子花搭白兰花，等到明早仔，有可能会勒拉另外一块地方去卖栀子花搭白兰花，而且所选择贩卖栀子花搭白兰花个地方，并覅是随心所欲个去选择个，往往侪是精挑细选出唻个，会选择一些人唻人往人流量交关大个区域里向去做生意。
伊拉一边卖一边还叫喊道：“栀子花白兰花要伐！要伐栀子花白兰花！”……也有邪气少数、个别摊头个老阿奶是覅会得去叫喊个，要是有去购买会认真仔细个服务，覅买也覅会强求点啥么事个！
依旧是勒拉通常下头唻讲伐，勒拉吾所在个城市上海市，栀子花搭白兰花并覅是一朵又一朵出售售卖个，顶起码也是要两朵侪肯起卖。但凡是一些售卖栀子花搭白兰花个老阿奶，会畀两朵或栀子花或白兰花用一根细铅丝串联勒拉一道，并做成一个弯型钩子，以便于携带（佩戴）勒拉身浪向。伊拉总是挎着一个竹制个大篮头，大篮头个最底部放置有一块蓝印花布，勒拉花布个上头会铺满栀子花搭白兰花，再勒拉篮头个上头搁一块木板，勒拉通常下头唻讲伐，木板侪是以汏衣裳搓板为主，有韧条纹个一面放勒下头，平面个放勒上头，勒拉木板个上头铺上一层要卖个栀子花搭白兰花，勒拉栀子花搭白兰花个上头，还会得铺盖有一层薄薄个、白颜色个纱布，每间隔一段辰光以后，还要勒纱布上喷（洒）水，以防止栀子花搭白兰花马上干裂忒……
自从外婆张榴妹于2008年2月16日礼拜六弹老三以后，即便有辰光吾看到有卖栀子花搭白兰花个摊头，再也呒没去购买过……
【备注：①：文章为作者原创；②：各种上海市风景图片、各种栀子花图片搭各种白兰花图片侪是唻源于网络上头；③：吾个外婆照片则是唻源于作者自家翻拍个；④：万分感谢原创图片。】
杜老倌侠客居（陆伟）写于2016年08月06日礼拜日夜里向
