འབར།
ཇག་པ་ཞོལ་ལ་བབས་པའི་མཚན་མོ་དེ་ནས། །
རྟ་ཕོ་རི་ལ་བྲོས་པའི་གཏམ་རྒྱུད་བྱུང་མྱོང་། །
མྱི་སེམས་རྒོད་ལ་ཤོར་བའི་དུས་རབས་དེ་ནས། །
སྐྱེས་ཆེན་རི་ལ་ཕེབས་པའི་རྣམ་ཐར་ཡོད་མྱོང་། །
དྲེད་ཀྱིས་འཕྱི་བ་བཟུང་བའི་བར་སྐབས་དེ་ནས། །
དཔོན་ལ་མཇུག་མ་ཡོད་པའི་དོགས་པ་ཤོར་མྱོང་། །
མེད་པོ་དབུལ་ལས་ཐར་བའི་ལོ་ཟླ་དེ་ནས། །
མེད་མུག་མ་ཎི་ཟློ་བའི་ཕྱུག་པོ་ཡོད་མྱོང་། །
གྲུབ་མཐའ་གྲོང་ནས་བརྩད་པའི་དུས་ངན་དེ་ནས།།
མག་པ་གཟན་ཤམ་ཅན་གྱིས་སྡེ་ཆེན་དཀྲུགས་མྱོང་།།
ཤེས་མེད་དཔོན་ལ་ཤོར་བའི་བར་སྐབས་དེ་ནས།།
ཕུ་ནུའི་མཛའ་བརྩེ་བཙོངས་པའི་སྐྱོ་གར་འཁྲབ་མྱོང་།།
ར་བ་ཅན་པོས་འདུ་ཁང་བཀང་ཉིན་དེ་ནས།།
མ་ཎི་འཁོར་ཁང་བར་ནས་ཆགས་སྐད་བསྒྲགས་མྱོང་།།
ཁྱིམ་པ་གསེར་གྱི་ཁྲི་ལ་བསྡད་ཉིན་དེ་ནས།།
གྲུབ་མཐས་གཉེན་འབྲེལ་སྙེགས་པའི་སྲོལ་དེ་དར་མྱོང་།།
དགོན་པ་དབེན་པའི་གནས་སུ་འཇིག་ཉིན་དེ་ནས།།
འདུ་ཁང་བྱ་རྟུག་འདྲ་རེ་གྲོང་མཐར་བསླང་མྱོང་།།
རི་ཁྲོད་བྲམ་ཟེ་གྲོང་མཐར་ལྷུང་ཉིན་དེ་ནས། །
གྲྭ་ཇོ་མཐུན་པོ་བྱུང་བའི་གཏམ་རྒྱུད་ཡོད་མྱོང་།།
བྱ་རྒྱལ་ཁྱུང་ཆེན་མཁའ་ལམ་སྙེགས་པའི་ཤུལ་དུ།།
ཆོལ་གསུམ་བྱ་ཁྱུའི་ཚང་ལ་འཇིགས་པ་འཁོར་མྱོང་། །
ཤཀྱའི་བུ་ལོ་ས་མཐར་སྤྱུགས་ཉིན་དེ་ནས། །
བོད་ལ་རྒྱང་འཕེན་པ་ཡི་བསྟན་པ་དར་མྱོང་། །
2018-3-10ཉིན།
