སྤྲིན་བྲལ་གྱི་ནམ་མཁའ་གཡའ་དག་གམ། དེ་བཞིན་དུ། ངའི་སེམས་པའང་དྭངས་ཤིང་གཙང་། མཁྱེན་ནམ། ང་ནི་ནམ་མཁའ་དང་དབྱེར་མ་མཆིས།
མཚན་མོ་རེ་རེར་ངས་ཁྱོད་ལ་སྐར་ཚོགས་འདི་དག་གིས་དབུ་རྒྱན་དང་སྐེ་རྒྱན། ཐོད་རྒྱན། རྣ་རྒྱན། གདུ་བུ། དུང་རལ་སོགས་བརྒྱུས་པར་མ་ཟད། ཁྱོད་ལ་ཤིན་ཏུ་མཛེས་པའི"ལྟག་འཛར་སྤ་ཕྲུག"ཅིག་ཀྱང་བཟོས་ཡོད། ཨ་ཨ། ང་ནི་ཇི་འདྲའི་གླེན་པ་ལ། ངའི་ལྷད་མེད་དྭངས་གཙང་གི་སེམས་པ་འདི་ཁྱོད་ལ་མཚོན་ན་དེ་འདྲའི་གལ་ཆེན་ཞིག་ཡིན་དགོས་དོན་མེད།
གསེར་མདོག་གི་ཉི་མ། ལྷོ་བགྲོད་ཀྱི་སྤྲིན་དཀར། བསིལ་འཇམ་གྱི་རླུང་བུ། འཇའ་འོད་ཀྱི་གུར་ཁང་། འདབ་དྲུག་གི་ཁ་བ། སྦྲང་ཆར་གྱི་ཟེགས་མ། མདོར་ན་མཁའ་དབྱིངས་ལས་བྱུང་བའི་བྱ་དངོས་ཀྱི་མཛེས་པ་མཐའ་དག་ངའི་སེམས་པ་འདིས་ཁྱོད་ལ་བསྐྲུན་པའི་རང་དབང་གི་འཇིག་རྟེན་ཡིན།
སྙིང་ཉེ་བ་ལགས། ཤིན་ཏུ་གྲང་བའི་དགུན་གཞུང་ཞིག ངའི་སེམས་པ་རྙི་རུ་ཤོར་ཞིང་། དྲན་པ་ཕྱི་རུ་འཁྱམས། སྣང་བའང་མ་ངེས་ལྡོམ་པོ་རུ་གྱུར། དེ་ནི་འདུ་བྲལ་ལས་བྱུང་བའི་ཆོས་ཉིད་ཅིག་གམ་རྟེན་འབྲེལ་གྱིས་དཔྱོད་པའི་གནས་ལུགས་ཤིག་མ་ཡིན་པར། རང་ག་བའི་འཁྲུལ་བ་ཙམ་དང་། སྐྱོ་སྣང་ཙམ། གླེན་འདང་ཙམ་བརྒྱབ་པར་ཤེས་མོད། ཁྱོད་རང་དྲན་ཐེངས་རེར་ངས་ཁེར་རྐྱང་གི་ན་ཟུག་མི་མྱོང་ཁ་མེད་རེད།
ད་ནི་ང་ཡང་འགྱུར་ཟིན། ནམ་མཁའ་ཆེན་མོ་འདིས་ང་རང་བསྒྱུར་བ་ཡིན། ངས་སྤྲིན་བྲལ་གྱི་ནམ་མཁའ་འདི་ཡང་ཡང་བསྒོམས་མཐར། ང་ཡང་ནམ་མཁའ་འདི་དང་དབྱིངས་གཅིག་ཏུ་འདྲེས་པར་མ་ཟད། འཇིག་རྟེན་གྲངས་མེད་པའི་ཁམས་འདིའི་བདག་པོ་རུ་གྱུར། དེ་བས། ང་ལ་གྲོགས་པོ་དང་སྙིང་ཉེ་མེད་ཀྱང་། ང་ལ་འདུ་བྲལ་གྱི་ན་ཟུག་ལྷག་ཙམ་ཡང་མེད་པས། ཁྱོད་ཀྱིས་ཀྱང་ང་རང་སྙིང་མ་རྗེ་དང་ཐུགས་ཁུར་མ་བྱེད་ཅིག
