吾是一个土生土长个上海人，勒拉吾所在个城市上海市，还勒拉吾个童年搭少年个辰光里向，也就是勒拉吾就读小学个辰光，尤其是对于居住勒拉乡镇上头个居民搭农村地区个农民唻讲伐，只要是每年仔一到过新春佳节个前后，僎是有得“摆年夜饭”迭种习俗个。
吾依旧还能够清爽个去记得，就勒拉掰搿辰光个里向，吾并覅晓得并懂得啥个侪是叫做“摆年夜饭”啊，至少也是要等到吾本人长大成年、接近步入到青年个行列以后，侪去弄明白迭桩事体个。所谓个“摆年夜饭”就是勒拉讲：大人（祖辈）们事先就要去烧好邪气多个各种美味佳肴（小菜），而且迭些小菜对于吾伲小辈们唻讲伐，还覅能先去喫个，要畀另外一个世界里向个老祖宗先喫，等到“伊拉喫好嘞以后”，吾伲僎可以去喫，要覅然，绝对是覅唻三、覅可以个。
覅仅是迭能样子，勒拉一般情况下头唻讲伐，对于“摆年夜饭”迭种习俗唻讲伐，伊只会得提前，而绝对覅会得往后头去拖拖拉拉牵丝扳藤个摆到顶顶后头去个，辰光最最晚也要勒拉正月大年初一迭个一天里向去举行全家“摆年夜饭”迭桩事体。虽然讲，勒拉吾所在城市个城市化率，要比其他省市唻的要高出交关多个，但畀过，当辰光走到嘞今早仔，还是有得覅少个家庭仍会得保持着迭种习俗唻。
当吾还身处勒拉童年时期搭少年时期个辰光，全国人民还侪是身处勒拉计划经济时期，就勒拉迭个时期个里向，老百姓基本浪向买卖各种么事搭商品个辰光，侪都要去凭票证唻供应个，而且票证搭铜钿迭个两样么事侪是覅可缺少个，要是缺少嘞其中一样，或者讲缺少嘞票证以后，是买覅着各种么事搭商品个。比方讲：买“糖”就要有得“糖票”；买“副食品”就要有得“副食品票”；买“食用油”就要有得“食用油票”……凡是种种真个可以去讲就是属于不胜枚举哦。但畀过，每年只要到嘞新春佳节里向、勒拉快要过年个前后头市场供应量，眼扳数要比平常日脚多一眼眼，也能够去多买一眼眼，尽管是迭能样子，为嘞“摆好年夜饭”、过好年（春节），至少也要从第四季度开始，采办（购买）“摆年夜饭”跟“过年”所需个菜肴。
勒拉掰搿辰光，无论是勒拉“摆年夜饭”个辰光，还是勒拉“过年个辰光”，有得四样小菜绝对是属于覅可缺少个，迭个四样小菜分别就是“鸡鸭鱼肉”，覅单单是覅可缺少个四样菜肴哦，上海人畀“鸡鸭鱼肉”迭个四样小菜叫做“四覅令”，而且迭嗰四样菜肴僎都要去上齐全个，要是少忒嘞一样菜肴（小菜）还覅唻三、覅可以个。
为嘞能够更加好个去讲讲清爽，吾决定还要多举一些例子。
还比方讲：勒拉掰搿辰光个里向，勒拉过年个辰光，上鱼个闲话就要上一条鱼，是坚决覅能去上半条鱼哦，只有勒拉平常日脚个里向，有得覅少个人家，勒拉上鱼个辰光侪是去上半条鱼个……为啥事体要迭能样子唻操作呢？！僎都是因为，勒拉平常日脚里向，对于每家每户个经济收入唻讲伐，既是属于彼此之间个经济收入侪都是相差覅大差大覅多个，还是属于彼此之间个差距并覅是唻得交关大个，还外加上勒拉掰搿辰光个里向，老百姓勒拉购买各种小菜个辰光，基本浪向侪是需要凭各种票证去限量供应购买个，还要是缺少嘞票证以后，是买覅到所需要个各种小菜搭各种商品个。所以讲，就勒拉迭个四样菜肴（小菜）当中，勒拉俗常生活里向，吾伲顶顶多也只能是四选二，去喫到其中个两样小菜，能够喫到两样小菜也是属于邪气好个。
有得许多居住勒拉城镇浪向个人家搭个人，还要有得交关好个环境条件，还勒拉条件允许个情况下头，就会得自家去向农民老伯伯、农民老阿奶购买刚刚孵化出唻个鸡鸭散养，等散养到嘞“摆年夜饭”搭过“新春佳节”个辰光再备用。之所以要迭能样子唻操作，既能帮屋里向省一眼铜钿，而且还覅必为嘞购买覅到鸡鸭而去发愁哦！
吾自家仍然还能够清爽个去记得迭能一桩事体唻哦，因为勒拉老底子个辰光，勒拉老爹陆俊德搭阿奶王妙心个屋里向，还勒拉屋里向个后头，还有得一个交关大个大后院子唻，顶顶起码有得七到八十个平方米，大后院子个后头还有得一条小河浜哦，所以讲，只要是每年仔等到过年结束嘞以后，每趟仔只要是辰光到嘞三至四月份以后，阿奶僎会向农民老伯伯去购买刚刚孵化出唻个八只鸡搭五六只小鸭子，一直要散养到快要过年个辰光，用唻“摆年夜饭”搭“过年”。
除忒吾勒拉上述所讲个四样菜肴（小菜）以外，还是属于覅好算数个、覅作数个，就勒拉掰搿辰光个里向，还只要勒拉过年个辰光，勒拉每家每户个屋里向，至少还要去配上一套两只盘（盆）子唻，迭个两只盘（盆）子分别就是指：“什锦大拼盘（盆）搭鱼盘（盆）”，每家每户侪是有得迭个两只盘子个，而且对于迭个两只盘（盆）子唻讲伐，勒拉平常日脚是覅去使用个，一年也就去使用一趟，是勒拉过年过节个当中去使用个。勒拉“什锦大拼盘（盆）”里向堆满嘞只有勒拉“摆年夜饭”“过年”个辰光，侪可以去喫得着个“各种美味佳肴”，比方讲：太仓牌个肉松、松花皮蛋、金华火腿等菜肴……
吾还要去讲个就是，每年、每趟仔勒拉“摆年夜饭”个辰光，事先就要去做好个一桩事体。迭桩事体就是－－先要摆铺好桌子、圆台面搭凳子，再勒拉或桌子上头，或圆台面个上头，摆上一排排碗形个小酒盅搭一双筷子、一只香炉搭两只烛台，勒拉小酒盅个里向自然要倒满老酒，老酒既有得黄酒也有得白酒，再勒拉香炉搭烛台里向插上三支香搭两只蜡烛，还要勒拉台子个前头放上一只厚厚个垫子。
到嘞迭个辰光以后，大人搭祖辈们眼扳数会得唻大声个招呼吾伲迭帮子小辈们，伊拉就会得开口唻讲道：“乃么就要从现在开始嘞，㑚迭帮小囡（鬼）是覅可以去碰着（倒）桌子、凳子搭垫子个，还要离迭块地方稍微远一眼眼，假使讲，是侬覅小心去碰着、惊扰到嘞老祖宗，就勒拉迭个一年里向，屋里向大人搭小人，僎都会触霉头、走霉运呃！要是畀大人发觉嘞，侬去碰着、惊扰到嘞老祖宗，用覅着吾伲大人多去讲眼啥么事个，绝对是覅会得对侬客气眼啥个，眼扳数要请侬喫一顿生活竹笋烤肉个，要记记老，魂灵头生生牢！”……
等到仔各种美味佳肴（小菜）烧好以后，侪都摆满一桌以后，乃么要开始点燃香搭蜡烛嘞，迭个辰光个屋里向也会得变得炊烟袅袅起唻，但畀过，还要等到香搭蜡烛燃烧过一小段辰光以后，所有屋里向个人，从大到小要依次畀老祖宗去磕三个响头，吾伲一边畀老祖宗磕头个辰光，一边还要去烧一些锡箔，勒拉一般情况下头，僎都是要等到嘞香搭蜡烛燃烧到三分之一个辰光，侪开始去做迭桩事体个。
勒拉迭个辰光个里向、勒拉操作个全过程当中，一些大人搭祖辈们，尤其是祖辈们从开始一直要到结束为止，嘴巴里向就是覅听歇个，从头到尾巴还会得不停个念念有词，讲啥么事要去保佑吾伲迭个一家人家，勒拉迭个一年里向，老老少少侪能够去拥有一个邪气健康良好个好身体，大家覅单单都能够过得太太平平、平平安安，而且还要希望勒拉另外一个世界里向各位老祖宗大人们，能够去保佑吾伲迭个一家人家，勒拉迭个一年里向僎能够平安顺利过关……反正大人搭祖辈所讲个迭些闲话，侪都是属于各种邪气吉利搭交关好个闲话……
实际浪向，就勒拉吾个童年搭少年辰光里向，老爹陆俊德搭阿奶王妙心个屋里向、外公倪根生搭外婆张榴妹个屋里向，僎都是有得“摆年夜饭”迭种习俗个，“摆年夜饭”也侪都是搭“过年”辰光放勒拉一道操作个。但畀过，因为勒拉掰搿辰光，唯有勒拉过年个辰光，侪能够畀所有个家庭人员全部聚集齐全哦，还因为勒拉掰搿辰光，吾个屋里向个居住地，离老爹搭阿奶个屋里向是属于唻的邪气近个，走路过去顶多也就勒拉十唻分钟左右个路程啊，所以讲，勒拉大多数情况下头，僎都是勒拉老爹搭阿奶屋里向“摆年夜饭”“过年”个。
勒拉吾伲小辰光，也就是勒拉吾就读小学个辰光里向，真个可以讲是属于天覅怕唻地覅怕个人，还可以讲是天老大地老尼唻吾老三，是覅大怕爷娘搭长辈，老是欢喜畀伊拉所讲个各种闲话，侪都当做耳旁风，左耳朵进唻右耳朵出，基本浪向是覅理覅睬个，唯独就惧怕先生所讲个各种闲话，会得畀先生所讲个每一句闲话，侪都当做圣旨唻看待个，句句僎都听进去并放勒拉自家个心里向。大概是勒拉吾就读小学三年级个辰光、勒拉开始放寒假前头，先生对吾伲学生子讲过迭能一句闲话，讲道：“过年‘摆年夜饭’、‘还要磕头’，就是勒拉搞封建迷信活动，迭能样子去做，既是属于覅对头个，也是属于覅大好个，吾伲就要破除封建迷信！”……从迭个一年过新春佳节开始，死活也覅肯磕头，讲老师讲过个，磕头是封建迷信要去破除，阿爸搭姑父哪能去规劝吾，吾就是覅肯去磕头，气得阿爸只好作罢……
【备注：①：文章为作者原创；②：各种吃饭类图片搭各种上海美食类图片侪唻源于网络上头；③：万分感谢原创图片。】
杜老倌侠客居（陆伟）写于2017年02月02日礼拜四夜里向
