རྨ་དཔལ་འབར་གྱི་ངོ་སྤྲོད། རྨ་དཔལ་འབར་ལགས་ནི་མདོ་སྟོད་ས་ཡི་ཐིག་ལེ་འདན་ལུང་ཁོག་གི་སྟོད་ཕྱོགས་ཡུལ་རྨ་མགྲིན་ཞེས་པའི་སྡེ་བ་རུ་སྐྱེས། ཆུང་དུས་ནས་བློ་རིག་གྲུང་ཞིང་ཆེ་བཀུར་ཆུང་བྱམས་ཀྱི་བྱིས་པ་རིག་རྒོད་ཅིག་ཡིན། དྲིན་ཆེན་ཕ་མའི་བཀའ་དྲིན་དང་ཕུ་བོ་དམ་པའི་ཐུགས་ཁུར་གྱི་འོག་ནས་ཡེ་གེའི་སྦྱོར་ཀློག་སོགས་ལ་ཕྱིས་ཕྱིན་པ་བསླབས་པས་ཞྭ་སེར་བསྟན་པའི་ཆོས་སྒོར་ཞུགས། ཕུ་བོ་དང་རྒན་པ་རྣམས་ཀྱི་སྐུ་མདུན་ནས་དབུ་སྐྱབས་འགྲོ་ནས་བཟུང་ཏེ་འདོན་རྟ་དབྱངས་དང་ཆོ་ག་ཕྱག་ལེན་སོགས་ལ་ཉིན་མཚན་གྱི་གུང་བསྒྲིགས་ཏེ་བསླབས་པས་དགོན་དེ་གའི་འདོན་བཟོ་བ་ཡག་ཤོས་སུ་གྱུར། སྔ་མའི་ཚོགས་དང་ད་ལྟའི་བསོད་ནམས་ཀྱི་མཐུ་ལ་བརྟེན་ནས་དོན་གྱི་སླད་དུ་མཚན་ནས་སྨོས་ན་ཁྲི་ཆེན་ངག་དབང་ལེགས་འོང་ཞེས་མཁས་བཙུན་བཟང་གསུམ་དང་འཆད་རྩོད་རྩོམ་གསུམ་གྱིས་ཕྱུག་པའི་བཤེས་གཉེན་དམ་པ་གང་གི་མདུན་ནས་དགེ་ཚུལ་སློང་གི་སྡོམ་པ་མནོས། དེ་ནས་བོད་ཡུལ་སྙན་པ་རབ་ཏུ་འབར་བའི་ཆོས་སྡེ་ཆེན་པོ་རྫ་སེར་ཤུལ་མཐོ་རིམ་ནང་བསྟན་སློབ་གླིང་སྟེ་མདོ་སྔགས་ཀྱི་རབ་འབྱམས་པ་དབྱར་གྱི་མེ་ཏོག་བཞིན་དུ་སྐྱེས་དང་སྐྱེ་བཞིན་པའི་ཁམས་པའི་མ་ཡུམ་སློབ་གྲྭར་ཞུགས་ཏེ་གནམ་གྱིས་ས་བཀབ་པ་ལྟ་བུ་བཤེས་གཉེན་དུ་མའི་ཞབས་རྡུལ་སྤྱི་བོས་མཆོད་དེ། ལམ་གྱི་རྩ་བ་བཤེས་གཉེན་བསྟེན་ཚུལ་ནས་མ་ནོར་བ་བྱས་ཏེ་དབུ་བསྡུས་གྲྭ་ནས་སློབ་གཉེར་བྱེད་མགོ་བརྩམས། ལོ་ལ་ཟླ་བཞག་ཟླ་ལ་ཉིན་བཞག་སྟེ་བསྡུས་གྲྭ་ཁག་གསུམ་དང་བློ་རྟགས་དང་གྲུབ་མཐའ་ཕར་ཕྱིན་སོགས་འཛིན་གྲྭ་གོ་རིམ་བཞིན་དུ་བརྒྱུད་དེ་ལོ་རྒྱུགས་དང་ལོ་ཕྱེད་ཀྱི་རྒྱུགས་སྤྲད་རབ་དང་རིམ་པའི་ཁྲོད་ནས་ཨང་དང་པོའི་བྱ་དགའ་ཡང་མི་ཉུང་བ་བླངས་ཏེ་དགེ་རྒན་རྣམ་པས་བསྔགས་བརྗོད་ཀྱི་མེ་ཏོག་སྟོར། མདོ་ཁམས་འཇང་དགུན་ཆོས་ཞེས་མཚན་སྙན་གླིང་ན་གྲགས་པའི་ཚད་མའི་རིག་པ་སྨྲ་བ་བགྲང་གིན་པའི་ཁྲོད་ནས་ཕུལ་བྱུང་གི་བྱ་དགའ་ཡང་གང་མང་མང་ཐོབ། དབྱར་གནང་དང་དགུན་གནང་གི་སྐབས་སུ་ཕ་ཡུལ་གྱི་ཡིག་རྨོངས་སེལ་བའི་ལས་གཞིའི་མགོ་འཛིན་མཛད་དེ་གསབ་སྦྱོང་འཛིན་གྲྭ་བཙུགས་ཏེ་སུམ་རྟགས་དག་གསུམ་སོགས་ཅི་ནུས་ཀྱིས་འཁྲིད། ཁོས་ཞར་དང་ཞོར་ནས་བརྡ་སྤྲོད་དང་སྙན་ངག་ལ་ཡང་མི་དམན་པ་སྦྱངས། རྗེས་ནས་ལབ་དགོན་དུ་ཚོགས་ཞུགས་བྱས་ཏེ་དགེ་བའི་བཤེས་གཉེན་དུ་མའི་ཞབས་སུ་གུས་པས་བཏུད་དེ་གཞུང་ལུགས་ལ་བསམ་ཐོས་བྱས་མོད། སེར་ཤུལ་ཐུབ་བསྟན་སྙན་གྲགས་མཆོག་གི་བཀའ་ལྟར་རང་དགོན་གྱི་དཔེ་འཁྲིད་དགེ་རྒན་དུ་བསྐོ་བཞག་མཛད། ད་ལྟ་ཕ་ཡུལ་དུ་དགེ་བཤེས་ཆེན་མོ་སེར་བྱེས་ལྷ་རམས་པ་ཁྲི་ཟུར་བསྟན་འཛིན་ཡོན་ཏན་མཆོག་དང་ལྷན་དུ་ལམ་རིམ་དང་བློ་སྦྱོང་སོགས་འཁྲིད་བཞིན་མཆིས་སོ།། ཚིག་གིས་སྤུད་པའི་བརྗོད་བདེ་རིག་པས་དབེན།། གཤིས་སྦྱོང་ཤེས་བརྩོན་ཟུང་གིས་ཕོངས་གྱུར་ཀྱང་།། ཚེ་རབས་ལས་ཀྱིས་སྦྲེལ་བའི་རྡོ་རྗེ་སྤུན།། ཀུན་ནོར་གུས་པོས་བྲིས་པར་དགེ་ལེགས་འཕེལ།། ཀུན་ནོར་ཚང་།
