[1992年版锡伯语小学语文课本第一册第20课]

ajige šanyan gūlmahūn tašan be takaha

emu alin meifehe de emu meyen ajige aššasu banjimbihebi. emu inenggi, ajige gucusa suwayan indahūn i boode tuwa latuha be sabufi, geren embade acafi tuwa be mukiyebuki seme, ajige gūlmahūn i duka de genefi hūlame kaicame, "ajige šanyan gūlmahūn, ajige suwayan indahūn i boode tuwa latuhabi, muse hūdun genefi ajige suwayan indahūn de aisilame tuwa be mukiyebuki!" seci, ajige gūlmahūn uju be uce i siden deri tucibufi gisureme, "ajige suwayan indahūn boode tuwa latuhangge minde ai dalji, bi generakū!" sefi, uju be dosibufi uce be yaksiha.

emu inenggi, ajige šanyan gūlmahūn tulesi tucifi sence tunggiyeme birai hešen de jifi tuhan be duleme yabure de, ajige šanyan gūlmahūn gūnin werišehekū bethe ufarafi bira de tuheke. ajige šanyan gūlmahūn ebišeme bahanarakū ofi hešen ci tucire arga akū, muke i dolo amba jilgan i kaicame, "ergen be aitubu! ergen be aitubu!" sehe bici, ajige suwayan indahūn, ajige honin, ajige buhū ... donjifi gemu feksime jihe. geren jing bekterefi ajige šanyan gūlmahūn be aitubure arga akū iliha erinde, ajige suwayan indahūn neneme bira de ketkeneme dosifi, geren i emgi ajige šanyan gūlmahūn be aitubuha.

ajige šanyan gūlmahūn gisureme, "geren de baniha! ajige suwayan indahūn de banihalambi!" serede, ajige honin gisureme, "ere oci meni giyan i icihiyara baita." sehe. ajige šanyan gūlmahūn yertefi uju be gidaha.