图片发自简书App

     广州某网站时不时随机抽取两种美食进行PK，睇下边个受欢迎。最近呢次系白云猪手对萨其马，结果，前者以较大优势胜出。

    白云猪手系广州名菜之一。其制作方法系将猪手洗净斩件先煮熟，再放到流动嘅泉水漂洗一日，捞起再用白醋、白糖、盐一齐煮，等冷却后浸泡数小时，即可食用。食落皮爽脆，肉肥而不腻，带有酸甜味，醒胃可口。由于泉水取自白云山，故名为白云猪手。点解偏偏系白云山泉水呢？重有典故：古时候，白云山上有座庙，庙后有段长流不息嘅甘甜清泉，庙内有个调皮又为食嘅和尚仔。有一日，佢趁师父外出，偷偷去集市买咗啲猪手，啱要落锅煮时师父突然返嚟，和尚仔擒擒青将猪手掟落庙后山泉中。过咗几日，总算盼到师父又外出喇，佢鸡咁脚走去山泉边将啲猪手捞番上嚟——— 咦，猪手唔单止冇变坏，反而重白净靓仔咗。和尚仔再加啲糖同白醋一齐煮熟。食落猪手唔肥唔腻，又爽又甜，和尚仔喜出望外。后来，白云猪手呢味菜式重流出咗坊间。

    无独有偶，萨其马呢种食品亦系有来历嘅。传说清朝时广州一位姓萨嘅满洲将军，钟意骑马打猎，每次打猎后都要食点心，而且唔能够重复。有一次萨将军出门打猎前，特别吩咐厨师要整啲新鲜嘢，厨子整整下，唔小心将沾上蛋液嘅点心炸碎了。点知偏偏呢个时候将军返咗嚟催要点心，厨师火滚咁闹咗句：“杀那个骑马的！”慌慌忙忙将点心攞出嚟。谂唔到，萨将军食咗之后相当满意，佢问呢味点心叫乜名，厨师回答：“杀骑马。”结果萨将军听成咗“萨骑马”。结果，大家以后都叫呢种食品做“萨骑马”喇。

   今次白云猪手之所以受欢迎过萨其马，估计系广州人怕多糖同油腻。但系萨其马亦有包装易携带嘅优点。总之每一种食品能够长期流传肯定有其道理。可唔可以咁讲：食在广州扬天下，今古内外竞芳华；白云无尽山泉清，猪手劈低萨其马。