བརྒྱད་པ་སེམས་བསྐྱེད་བསྟན་པ་ལ།
༧ སྨན་མཆོག་རྣམ་པར་རྒྱལ་བ་དེ། །
ནད་རྣམས་ཀུན་ལ་སྙོམས་སུ་འགྲོ། །
བྱང་ཆུབ་སེམས་བསྐྱེད་བསླབ་པ་དེས། །
ཉོན་མོངས་ཀུན་གྱི་གཉེན་པོར་འགྲོ། །
ཞེས་པས་ནི། དེ་ཡང་སྨན་རྣམས་ཀུན་ཀྱི་མཆོག་ཏུ་གྱུར་བ་ཨ་རུ་ར་རྣམ་པར་རྒྱལ་བ་དེ། རླུང་མཁྲིས་བད་གན་སོགས་ནད་ཡོད་དོ་ཅོག་གི་གཉེན་པོ་རུ་སྙོམས་སུ་འགྲོ་བ་དང་། དེ་བཞིན་དུ་བྱང་ཆུབ་སེམས་བསྐྱེད་ཀྱི་བསླབ་པ་དེ་ཞེ་སྡང་འདོད་ཆགས་གཏི་མུག་སོགས་ཉོན་མོང་པ་ཀུན་གྱི་གཉེན་པོ་རུ་འགྲོ་བ་ཡིན་ནོ་ཞེས་པའོ།
དེ་ཡང་བྱང་ཆུབ་ཀྱི་སེམས་བསྐྱེད་ཚུལ་ནི་གོང་ལྟར་སྐྱབས་གནས་རང་གི་མདུན་ཀྱི་ནམ་མཁའ་ལ་བསྒོམ། དེ་ལྟར་བསྐྱེད་པའི་སྐྱབས་གནས་ཡུལ་མཆོག་གནས་བཞི་ཡི་དམ་མཁའ་འགྲོ་སྲུང་མ་རྣམས། ནམ་མཁའ་ལ་སྐར་ཚོགས་བཀྲ་བ་དང་། བར་སྣང་ལ་སྤྲིན་ཚོགས་གཏིབས་པ་བཞིན་དུ་བཀྲ་དཔུང་ངེ། འོད་ཐིབས་སེ་བཞུགས་ནས།
བདག་སོགས་སེམས་ཅན་རྣམས་ལ་སྤྱན་གྱིས་གཟིགས་ སྙན་གྱིས་གསན། ཐུགས་སྐྱིས་དགོངས་ཏེ་སེམས་བསྐྱེད་ཀྱི་དཔུང་པོ་མཛད་པར་བསམ་ལ། དེ་དག་གི་སྤྱན་སྔར་འདི་ལྟར་ནམ་མཁའ་ཁྱབ་པའི་སེམས་ཅན་ཐམས་ཅད་བདག་གི་ཕ་མ་མ་བྱས་པ་གཅིག་ཀྱང་མེད་དེ། གཅིག་ཏུ་བདག་འཁོར་བར་འཁྱམས་ཡུན་རིང་། གཉིས་སུ་གནས་མཐོ་དམན་ཀུན་ཏུ་བརྒྱུད་དེ་ལས་སྣ་ཚོགས་བླང་པའི་ཕྱིར།
ཕ་མ་གྱུར་པའི་ཚེ་ཟས་ཞིམ་དགུའི་གསོས་གོས་འཇམ་དགུའི་གཡོག་བརྩེ་བའི་སེམས་ཀྱི་བསྐྱོངས་ཏེ་ད་ལྟའི་ཕ་མ་དང་ཁྱད་མེད་བྱས་ཡོད་ན། ཕ་མ་དྲིན་ཆེན་དེ་དག་ལས་ལོག་པར་ཞུགས་ལམ་ལོག་པར་འཁྱམས། ལེགས་ཉེས་བླང་དོར་ནི་མི་ཤེས། ཡང་དག་གི་ལམ་སྟོན་བཤེས་གཉེན་ནི་མེད། བཤེས་མེད་ལོང་བ་ཐང་སྟོང་དུ་འཁྱམས་པའི་བདག་གི་མ་རྒན་འདི་རྣམས་སྙིང་རེ་རྗེ། འདི་རྣམས་བདེ་བ་དང་ལྡན་པར་གྱུར་ཅིག། སྡུག་བསྔལ་དང་བྲལ་བར་གྱུར་ཅིག། བདེ་བ་དེ་དང་རྒྱུན་ཏུ་མི་འབྲལ་བར་གྱུར་ཅིག།
ཆགས་སྡང་གི་ཉོན་མོངས་པ་དང་བྲལ་བར་གྱུར་ཅིག།
དེ་ལྟར་བྲལ་ནུས་པར་སྐྱབས་གནས་དཀོན་མཆོག་གསུམ་པོས་བདག་ལ་བྱིན་གྱིས་རླབས་དུ་གསོལ་ལོ་སྙམ་དུ་སེམས་བརྩེ་གཅིག་དུ་བསྐྱེད་པར་བྱའོ།
༧ འཁར་བ་བཅང་དང་གསེར་ཉོ་གཉིས། །
ཁྱད་པར་ཆེ་བ་ཇི་བཞིན་དུ། །
བདག་དོན་བས་ཀྱང་གཞན་གྱི་དོན། །
སེམས་བསྐྱེད་དགེ་སྤྱོད་ཁྱད་པར་ཆེ། །
ཞེས་པས་ནི། དེ་ཡང་ལག་ལ་འཁར་བ་བཟུང་ནས་སློང་མོ་བྱེད་བཞིན་འགྲོ་བའི་སྤྲང་པོ་དང་། གསེར་ཉོ་ནས་འགྲོ་མཁན་གྱི་ཚོང་དཔོན་གཉིས་ལ་ཧ་ཅང་གི་ཁྱད་པར་ཆེན་པོ་ཡོད་པ་ནང་བཞིན་དུ། བདག་རང་གི་དོན་དུ་དགེ་བ་བསྒྲུབ་ནས་སེམས་བསྐྱེད་པ་ལས། གཞན་སེམས་ཅན་ཀུན་གྱི་དོན་དུ་ཡིན་སྙམ་ནས་སེམས་བསྐྱེད་དེ་དགེ་བ་སྤྱོད་ན་གཞན་ལས་ཁྱད་དུ་འཕགས་པ་ཡིན་ནོ།
དེ་ཡང་གོང་ནས་བཤད་པའི་སེམས་བསྐྱེད་དེ་ལ་གནག་རྫི་ལམ་མཁན་གྲུ་པ་ལྟ་བུ་སེམས་བསྐྱེད་ཚུལ་གཉིས་ཡོད་པ་ཡིན་དེ། དེ་ཡང་གནག་རྫི་ལྟ་བུ་དེ་ནི་གནག་རྫིས་ཕྱུགས་རྣམས་རྩྭ་ཆུ་རྙེད་པ་དང་། གཅན་གཟན་སོགས་ཀྱིས་མི་འཚེ་བར་བྱས་ཏེ་སྔོན་དུ་དེད། རང་ཉིད་དེའི་ཕྱི་བཞིན་འབྲངས་ཏེ་རྗེས་ནས་འོང་བ་དང་འདྲ་བར་སྔོན་མ་ཁམས་གསུམ་གྱི་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ལ་བཀོད་ནས། དེའི་རྗེས་སུ་རང་ཉིད་སངས་རྒྱ་བར་འདོད་པ་དང་། ལམ་མཁན་ནི་དང་པོར་རང་ཉིད་ཀྱིས་ལམ་ཤེས་པར་བྱས་ནས་རང་ལ་ལམ་རྒྱུས་ཡོད་པ་དང་། དེའི་རྗེས་སུ་གཞན་མ་རྣམས་ལ་ལམ་བསྟན་ནས་ཁྲིད་པ་དང་འདྲ་བར་ཐོག་མར་རང་ཉིད་སངས་རྒྱས་ཀྱི་གོ་འཕང་ཐོབ་པར་བྱས་ནས། དེའི་རྗེས་སུ་སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་པར་འདོད་པ་ལམ་མཁན་ལྟ་བུ་དང་། གྲུ་པ་ནི་རང་དང་གྲུར་ཞུགས་པའི་མི་ལ་སོགས་པ་ཐམས་ཅད་མཉམ་དུ་ཆུའི་ཕ་རོལ་ཏུ་འགྲོ་བར་འདོད་པ་ལྟར། རང་དང་གཞན་སེམས་ཅན་ཐམས་ཅད་དུས་གཅིག་ལ་མཉམ་དུ་སངས་རྒྱས་ཀྱི་གོ་འཕང་ཐོབ་པར་འདོད་པ་གྲུ་པ་ལྟ་བུའོ།
དེ་ལྟའི་སེམས་བསྐྱེད་ཀྱི་རྩིས་ཟིན་ན་དགེ་བ་གང་དང་གང་བསྒྲུབ་ན་སྟོབས་ཆེ་བ་དང་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་རྒྱུ་མ་ནོར་བར་འགྲོ་བས་སེམས་བསྐྱེད་ཀྱི་ཟིན་པ་གལ་ཆེའོ།
༧ ཅི་སྲིད་རྒྱ་མཚོ་མ་ཟད་པར། །
དེ་སྲིད་ཆུ་བོ་མི་ཟད་བཞིན། །
ཅི་སྲིད་འཁོར་བ་མ་སྟོངས་བར། །
དེ་སྲིད་བྱང་སེམས་མི་འཛད་དོ། །
ཞེས་པ་ནི། དེ་ཡང་ཅི་སྲིད་མཐའ་ཡི་རྒྱ་མཚོ་ཆེན་པོ་དེ་ཉིད་མ་ཟད་ཀྱི་བར་དུ། དེ་སྲིད་རྒྱ་མཚོར་ཐིམ་པའི་ཆུ་ཕྲན་དང་ཆུ་བོ་ཐམས་ཅད་ཀྱང་མི་འཛད་པ་བཞིན་དུ།
ཅི་སྲིད་འཁོར་བ་མཐའ་མ་སྟོངས་ཀྱི་བར་དུ། དེ་སྲིད་བྱང་སེམས་དང་བྱང་སེམས་ཀྱི་ཟིན་པའི་དགེ་རྩ་དང་བསོད་ནམས་ཀྱི་ཚོགས་དག་ནི་ཟད་པར་མི་འགྱུར་རོ།
དེས་ན་དེ་ལྟའི་སེམས་བསྐྱེད་དེ་ཁམས་གསུམ་སེམས་ཅན་ཀུན་གྱི་དོན་དུ་སྨོན་ཅིང་འཇུག་ལ་བསླབ་ཅིང་བསྒྲུབ་ཏེ།
དང་པོ་རང་ཉིད་གཙོ་བོར་འཛིན་པའི་སེམས་བསྐྱེད་སྤོང་བར་བྱ་ཞིང་སྙིང་རྗེ་དང་པོ་རྩ་བའི་མ་ལ་དམིགས་ནས་བསྒོམ་གསུངས་པ་ལྟར། དང་པོ་འདི་ལྟར་རང་ལ་དུས་དང་རྣམས་པ་ཐམས་ཅད་དུ་བདེ་བ་དང་སྐྱིད་པ་སོགས་ལེགས་པའི་རྒྱུ་ཅི་ཙམ་ཡོད་ན་འདོད་པ་བཞིན་དུ་སེམས་ཅན་གཞན་རྣམས་ཀྱང་དེ་བཞིན་འདོད་པས་རང་རང་སོ་སོའི་འདོད་པ་བཞིན་དུ་འབྱུང་བར་གྱུར་ཅིག་སྙམ་དུ་བདག་གཞན་མཉམ་པར་བྱ་བའི་སེམས་བསྐྱེད་ལ་འབད་ཅི་ཐུབ་བྱ་ལ། དེ་ནས་སྡུག་བསྔལ་གྱི་ཤིན་ཏུ་གདུང་བའི་སེམས་ཅན་ལ་འདི་འདྲའི་སྡུག་བསྔལ་གྱི་མནར་ཞིང་བཟོད་བླག་མེད་པ་འདི་ང་དང་ངའི་ཕ་མ་ཡིན་ན་ཅི་བྱེད་སྙམ་པའི་ངང་ནས་ཕ་རོལ་པོའི་སྡུག་བསྔལ་ཡོད་ཚད་རང་རྒྱུད་ལ་བླང་ནས་ཕ་རོལ་པོ་སྡུག་བསྔལ་དང་བྲལ་ན་ཅི་མ་རུང་བདེ་བ་དང་ལྡན་ན་བདག་རེ་དགའ་སྙམ་དུ་བདག་གཞན་བརྗེ་བའི་སེམས་བསྐྱེད་ལ་བསླབ་པར་བྱའོ།
དེ་ནས་ཀྱང་གཞན་སེམས་ཅན་འཁོར་བར་འཁྱམས་ཤིང་སྡུག་བསྔལ་ལ་སྤྱོད་པ་འདི་དག་སྙིང་རྗེ་དྲག་པོ་ཤས་མི་བཟོད་པའི་ངང་ནས་འདི་དག་བདེ་བ་དང་ལྡན་ན་བདག་དམྱལ་བར་ཡིན་ཀྱང་འགྲོ་སྙམས་ཤིང་དངོས་སུའང་གཞན་ཀྱི་སྡུག་བསྔལ་རང་ཐོག་ཏུ་ལེན་ཅི་ཐུབ་ལ་རྩེ་གཅིག་ཏུ་འབད་པ་ནི་རང་བས་གཞན་གཅེས་ཀྱི་སེམས་བསྐྱེད་ཞེས་བྱའོ། དེ་ལྟར་སེམས་བསྐྱེད་པའི་དགོས་པ་ནི།
དེ་ལྟར་བོན་ཐམས་ཅད་ཀྱི་ཉིང་ཁུ། ལམ་ཐམས་ཅད་ཀྱི་སྙིང་པོ་བྱང་ཆུབ་མཆོག་ཏུ་སེམས་བསྐྱེད་པ་འདི་རྒྱུད་ལ་སྐྱེས་པ་ཙམ་གྱིས་དགེ་བའི་རྩ་བ་ཅི་བསགས་པ་ཐམས་ཅད། འཁོར་བའི་དྲི་མས་གོས་པར་མི་འགྱུར་བ་དང་།
ཁོང་ཁྲོ་སོགས་ཉོན་མོངས་དབང་གི་དགེ་བ་མི་འཛད་པ་དང་། དུག་ལྔ་ལ་སོགས་བདག་འཛིན་ཐ་དག་དྲུང་ནས་འབྱིན་པ། ཚེ་འདི་ཕྱི་གཉིས་ཀྱི་བསམ་པ་ཅི་བཞིན་ཏུ་འགྲུབ་པ་ལ་སོགས་ཕན་ཡོད་བསམ་གྱི་མི་ཁྱབ་པ་ཡོད་དོ།
དེས་ན་དུས་དང་རྣམ་པ་ཀུན་ཏུ་སེམས་བསྐྱེད་ཀྱི་གྲོགས་སྦྱིན་པ་དང་ཚུལ་ཁྲིམས་སོགས་ཕར་་ཕྱིན་བཅུ་ལ་བསླབ་པ་དང་། དངོས་གཞི་བདག་གཞན་བརྗེ་བ་སོགས་ཡང་དག་པའི་སེམས་བསྐྱེད་ལ་བསླབ་པ་ཅི་ནུས་ཀྱང་གལ་ཆེའོ
གཞུང་དོན་བརྒྱད་པ་སེམས་བསྐྱེད་བསྟན་པའོ།
