2018-08-27

གནམ་ས་ཁ་ཐག་ཉེ་བའི་རི་གྲོང་འདི།།
གནའ་གཏམ་བསྟར་ལ་བརྒྱུས་པའི་བང་མཛོད་ཡིན།།
ལོ་རྒྱུས་སྙན་ལ་རིང་མོའི་འབྱུང་ཁུངས་ཡིན།།
ཁྱོད་ལ་ལས་ཀྱིས་བསྐོས་པའི་གནས་མལ་ཡིན།།

ཡར་ན་དགུང་སྔོན་གཡུ་ལོའི་གུར་དུ་ཕུབ།།
བར་ན་འཇའ་སྤྲིན་རི་མོ་ཐགས་སུ་བཀྲ།།
མར་ན་ནོར་འཛིན་ཡངས་པའི་གདན་དུ་བཏིངས།།
དབུས་ན་ཁྱོད་ལ་ཕ་གཞིས་གསེར་དུ་ཆགས།།

གདོད་ནས་དག་པ་ཕྱྭ་དང་གཡང་གི་ཁྱིམ།།
མེས་པོ་རང་ཚུགས་ཅན་ཚོའི་བཞུད་ཤུལ་ཡིན།
ཕ་རུས་གསེར་གྱིས་མ་རུས་དུང་ལ་ཤན།།
རིགས་རུས་ཕུན་སུམ་ཚོགས་པའི་ཁྱིམ་རྒྱུད་ཡིན།།

ཕ་སེམས་ཁྱོད་ལ་་ཤོར་ནས་གཏམ་གྱིས་བསུས།།
མ་སེམས་ཁྱོད་ལ་ཆགས་ནས་འཛུམ་གྱིས་བསྐྱངས།།
རང་སེམས་དབྱིངས་ལ་ཞུགས་པའི་ལུས་ཀྱི་ཆར།།
ཤེས་རབ་རྩལ་དུ་སྤྲུགས་པའི་བརྡ་འདི་གསོལ།།

ཉི་མ་རིམ་སོང་ལོ་དང་ཟླ་བར་གྱུར།།
ལོ་ཟླའི་འཁོར་བསྐྱོད་མི་རྟག་སྒྱུ་མའི་གཤིས།།
ཡིན་ནོ་ན་ནིང་བཞུད་པའི་དེ་རིང་ཉིན།།
ཁྱོད་ལ་སྐྱེས་སྐར་མེ་ཏོག་ཆར་དུ་སྙིལ།།

ད་ནི་ལང་ཚོའི་མེ་ཏོག་གསར་པའི་མདངས།།
དུས་ཀྱི་ཆར་རླུང་དྲག་པོའི་ཧྲག་བར་ནས།།
ལྷད་མེདའཛུམ་པའི་འདབ་ལོ་རིང་བརྐྱངས་ཏེ།།
ཡངས་པའི་སྐྱེད་ཚལ་མཛེས་པའི་རྒྱན་དུ་ངོམ།།

བློ་དང་རིག་པ་སྒྲིམས་ནས་མདུན་དུ་བསྐྱོད།།
ཁ་སེམས་ཁོག་རྒྱ་ཡངས་པོས་ཕུགས་འདུན་འཚོལ།།
ཡ་རབས་ཀུན་སྤྱོད་ལེགས་པོས་རང་ཚུགས་ཟུངས།།
རིག་གནས་ཤེས་བྱའི་སྒོ་ཐེམ་ངང་གིས་འགྲིམས།།

དེ་རིང་ཉི་ཟླ་སྐར་གསུམ་ཁྱོད་ལ་ཡག།
ས་གཞིའི་ཕང་ན་བཀྲ་ཤིས་རྟེན་འབྲེལ་གྱི།།
ཤིས་ཚིག་མེ་ཏོག་གཏོར་བའི་མཛེས་སྡུག་ཁྲོད།།
ངག་རིག་ཏམྦུ་ར་ཡི་སྐྱེས་འདི་དཀྲོལ།།

                                      ༢༠༡༨ ། ༨ ། ༢༧