ཕ་བླ་མས་གནས་ལུགས་རྟོགས་པས་སྨྱོན་ཚུལ་མཛད།།
བུ་ཐ་ཤུལ་གནས་ལུགས་མ་རྟོགས་སྨྱོན་ལ་ཁད།།
ཅི་སྣང་བ་སེམས་ལས་འཕྲུལ་བའི་ཀུན་རྫོབ་ཆོས།།
དོན་དམ་པའི་བདེན་པར་ཞེན་པའི་བློ་དེའི་ལན།།
མི་བརྒྱ་སྟོང་ཚོགས་དེ་ཀུན་རྫོབ་བློ་ཡིས་བསླུས།།
མིའི་གཙུག་གི་ནོར་བུས་བློ་དེ་དགྲ་བཞིན་བཅོམ།།
བུ་སྐལ་ལྡན་ཚོགས་ལ་གནས་སྣང་འཆོར་ཚུལ་བསྟན།།
བདག་བླ་མ་དེ་ཡང་མི་མཆོག་དེའི་རྗེས་འབྲང་།།
ད་བླ་མ་གནས་ལུགས་དོན་ལ་དབང་འབྱོར་བས།།
བུ་སྐལ་ལྡན་ང་ཡང་ལམ་དེར་བཀོད་འཆར་གནང་།།
དོན་དངོས་པོ་ཀུན་རྫོབ་བློ་ཡིས་བཟུང་ཚུལ་དང་།།
དོན་དམ་པར་རིགས་ངོར་གནས་ཚུལ་ཚུལ་བཞིན་གསུང་།།
ད་བུ་ང་མི་འདུག་མི་མེད་ནགས་ཁྲོད་འགྲོ།།
རྗེ་བླ་མས་གསུང་བའི་ཆོས་དེ་ཉམས་སུ་ལེན།།
ཉོན་མོངས་བའི་སེམས་དེའི་བྲན་ལས་ཐར་བ་བྱ།།
བདག་གཅེས་འཛིན་སེམས་དེའི་གཡོག་དུ་མི་བྱའོ།།
བསྐང་ན་འཚིམ་རྒྱུ་མེད་པའི་འདོད་བློ་དང་།།
གཅེས་ན་ཞི་རྒྱུ་མེད་པའི་ཁོང་ཁྲོའི་སེམས།།
ད་ནི་བདག་རྒྱུད་རང་བཞིན་རྣམ་དག་སྐུ།།
མ་གཡོག་མ་གཡོག་རང་སར་ཞི་བར་མཛོད།།
-----ངག་བློ་རྒྱལ་གྱིས་བྲིས།
