图片发自简书App

   广州话嘅“噏”字，除咗作为动作嘅之外，主要作为“讲”字意思嘅贬义运用，如周街都听倒嘅“乱噏廿四”，“乱噏英语”。

   一个“噏”字可以“噏”出四句广州歇后语，唔信？且由我一一道来。

   第一句系：山草药——噏得就噏。广州人以前跌打扭伤钟意用山草药，有时赶时间，揾倒几味主要嘅草药唔理齐全与否就照噏落去。咁往往就会以偏盖全，唔够准确甚至捕风捉影。所以呢句歇后语运用时经常加个“米”字，如听到人话你加咗工资实际上又冇咁事，你就会讲：你米山草药——噏得就噏啦！

   第二句：秀水大头菜——系又噏，唔系又噏。原来南海秀水区地专产优质大头葱菜，喺菜地收割后就全部摞去噏（腌制），噏完拣好的留低卖，唔合格嘅抛弃。呢种唔理三七廿十一一于噏咗先算嘅做法就好似啲三姑六婆加油添醋甚至无中生有，用呢句歇后语形容佢哋就最恰当不过嘞。

   第三句就少听啲：阿均卖鱼头——好噏唔噏（。不过系有典故啵。话说从前有个卖鱼佬叫阿均，专卖新鲜鱼头，称俾顾客时鱼嘴仲会噏噏下，生意好到不得了。有日阿均照常劏条新鲜鱼，招呼顾客过嚟买，点知顾客望嚟望去居然话唔见鱼嘴噏噏，阿均睇下又的确如此，唔知咩嘢事。个客埋怨几句走咗无几耐，个鱼头竟然又识噏噏嘴，阿均激到一把火：有客唔噏，冇客噏，你真系好噏唔噏！从此，呢句歇后语就流传落嚟，逐渐摞嚟讽刺啲该做唔做或者唔睇场合、唔合时宜乱嚟一通嘅话语。

   第四句系本人根据坊间流传嘅二叔公故事（详见本报3月18日《经典二叔公》）而作：二叔公自称老大——乱噏嘢。二叔公排行第二是无法改变嘅事实，二叔公自称老大唔系乱噏嘢又系咩嘢？

   不过，但愿我呢篇嘢，唔系山草药同大头菜，又唔系阿均卖鱼头，更加唔系二叔公自称老大。你话呢？