氹老婆的笑話情書 (港式口語風格冩作) - 第五章
2202Feb19 旁晚
韓紅印售貨員芷荺今早whatapps通知殺手女皇同生果皇后, 真正韓版辛辣麵今日返咗貨, 留咗每人兩pack比妳地, 今晚我放工前好嚟攞! 兩人大約晚上七時左右分別到來買辛辣麵同其它韓國食品, 二人正想離開時, 芷荺叫停並喺收銀後面拎咗本雜誌出嚟講, “呢本係城中熱爆嘅女性雜誌Cosmopolitan S 中文叫大都會女性, 裏面嘅尤物大師專訪我期期追, 今期講女人好小氣, 我都末睇, 有冇興趣一齊睇?” 的確呢個題目撻著咗殺手女皇同生果皇后嘅好奇心! 三個女仔又再次圍埋一齊, 芷荺讀出內容,“好多拍拖或結咗婚嘅男仕都會抱怨身邊女人小氣, 尤其係嗌交嗰陣時, 都會話妳淨喺記得我啲衰嘢, 我對妳好嗰啲你又唔講。” 尤物大師批評呢啲會咁講嘅男仕真係好膚淺, 不過唔可以怪曬𠳔哋, 主要係因為男性嘅思維模式同女性唔同, 男性感情思維一般都係直線式, 就好似蠻牛一樣, 淨係識得向前衝, 唔識轉彎。 實情喺女方將你對嘅好藏喺心底, 歷久常新, 偶然回味, 甜在心頭。你睇幾多男人有難, 唔係背後嘅女人出嚟撐咩! 之所以經常將身邊男人啲衰嘢掛喺嘴邊, 係想提醒𠳔喺愛我的路上, 你呀仲有成條青馬大橋咁大嘅進步空間, 請你繼續努力愛我吧!” 芷荺講到呢度停一停, 望下身邊兩位女性, 果然大家都好認同, 變成三隻在水邊覓食嘅紅鶴, 係咁點頭。芷荺繼續讀, “但各位姊妹必須注意, 指責男方嘅時機同埋頻率係相當重要, 切忌操之過急及太頻繁, 避免畀我哋經常「專人訓練」, 練成左耳入右耳出。另外女方表達時的聲線、語氣、態度會對男方會否作出改變有非常直接的影響。過往各位姊妹一定係粗聲粗氣一輪嘴咁發表對對方的不滿, 從今天起大家不妨先撳住自己把火, 改為用高八度或磁性聲音慢慢講, 再加兩滴委屈眼淚, 可能會收到預期之外嘅效果 。男方可能會發覺點解妳嗌交都咁有吸引力, 而自動棄械投降成為妳嘅俘虜。各位姊妹我係尤物, 你都可以係尤物, 下期見。” 一篇似是而非, 似有還無嘅文章, 睇到三位女性心花怒放, 覺得終於有衛道之士為𠳔哋發聲。相約下期再約埋一齊睇。爽朗嘅芷荺特別開心, 因為今日結識到兩位同聲同氣嘅好姊妹。
