ཚུལ་འཆོས་ཅན།
ཁུ་སིམ་གྱི་མཚན་མོ་འདིར།
ཆུང་མ་དང་བུ་མོ་གཉིས་ཀྱི་སྔུན་སྒྲ་དང་སྡེབ་ནས།
ཁོ་བོས་སྙན་ངག་འཁྱར་འཁྱོར་ཞིག་གི་ལམ་ལ་ཆས།
ཉིན་གཅིག་གི་ལས་ཀའི་དཀའ་ཚེགས་དང་འཁང་ར་ཐམས་ཅད་རྒྱབ་ཏུ་སྐྱུར་ནས།
མཚན་མོ་འདིའི་དབེན་འཇགས་ལ་ལོངས་སུ་སྤྱོད།
མཚན་མོ་འདིར།
ཁོ་བོ་ཉིད་འཇིག་རྟེན་འདིའི་ཡོད་ཚད་དུ་སྣང་ལ།
ཁོ་བོར་དབང་བའི་ཡོད་ཚད་ཀྱང་མཚན་མོ་འདིའི་འཇིག་རྟེན་ཁོ་ན་ཡིན་སྲིད།
མཚན་གཞུང་འདི་ནས།
ཁོ་བོས་ཉིན་གཅིག་གི་སྡུག་ཡུས་ཡོད་དོ་ཅོག་རུམ་ཁོང་དུ་བཅུག
ཉིན་གཅིག་གི་ལོ་རྒྱུས་ཡོད་ཚད་ས་འོག་ཏུ་སྦས་ནས།
རྨི་ལམ་གྱི་འཇིག་རྟེན་ཞིག་གི་དབྱིངས་སུ་འཐིམ།
རྨི་ལམ་གྱི་ཞིང་ཁམས་དག་ན།
ཁོ་བོ་ཉིད་འཇིག་རྟེན་འདིའི་སྒེར་གཅོད་པ་ཞིག་ཡིན་འདུག་ལ།
ཁོ་བོས་སྒེར་གཅོད་ཐུབ་པ་ཡང་རྨི་ལམ་གྱི་ཞིང་ཁམས་ཙམ་ལས་མ་འདས།
༢༠༡༨.༡༢.༤
