དངོས་མིང་ལ་སྒྲོལ་མ་སྐྱབས་སུ་འབོད་པའི་ན་གཞོན་གཞས་པ་ཁོ་ནི། མདོ་སྨད་ལྷོ་རྒྱུད་ཀྱི་ཀླུ་ཆབ་སྔོན་མོ་དལ་གྱིས་འབབ་པའི་ཡུལ་གྱི་འབྲོག་སྡེ་ཞིག་ཏུ་ལང་ཚོའི་ལྟེ་ཁྲག་བརྡོལ་ཞིང་། འབྲོག་ཕྲག་རྣལ་མ་ཞིག་གི་འཚོ་བ་རིམ་གྱིས་བསྐྱལ། ཕ་ཡུལ་གྱི་རུ་སྡེ་ཆུང་ཆུང་དེ་ནི་ཁོ་ལ་མཚོན་ན་གླུ་གར་གྱི་སྟེགས་བུ་ཆེན་པོ་ཞིག་ཡིན་ཏེ། ལང་ཚོའི་གཉོམ་ལག་འཕེལ་བའི་གོམ་སྟབས་རེ་རེའི་གསེང་དུ་དམངས་ཁྲོད་གླུ་གར་སྒྱུ་རྩལ་གྱི་བག་ཆགས་ཟབ་མོ་འདྲིས་ཡོད། དེ་ལྟར། ཀླུ་ཆུ་རྫོང་མ་ངེས་སློབ་ཆུང་ལ་ཞུགས་ཤིང་དབྱངས་གསལ་སོ་བཞིའི་མེ་ཏོག་གི་མཆོད་པ་ཤེས་བརྩོན་གྱི་ལག་ཟུང་མཉེན་པོས་འཐུ་འགོ་བརྩམས། རིམ་བཞིན་རྫོང་བོད་འབྲིང་དང་མཚོ་སྔོན་མི་རིགས་སློབ་ཆེན་སོགས་སློབ་གྲྭ་ཆེ་འབྲིང་ཆུང་གསུམ་བརྒྱུད་ཅིང་། ཞོར་དུ་ཆུང་ནས་རུས་ལ་ཟུག་པའི་གླུ་གཞས་སྒྱུ་རྩལ་གྱི་དུངས་ཤའང་ཉམས་པ་མེད་པར་འཕེལ་རྒྱས་ཀྱི་རིམས་པ་རེ་རེ་བརྒལ། སློབ་ཆེན་གྱི་འཚོ་བ་ནི་སྒྱུ་རྩལ་གྱི་ནམ་མཁའ་ཞིག་ཡིན་ལ། བརྩེ་དུང་གི་གླིང་ཕྲན་ཞིག་ཀྱང་ཡིན་པས། ཁོའི་སྒྱུ་རྩལ་ལས་རིགས་ལ་དགའ་བའི་རྣམ་འགྱུར་རེ་རེའི་ཁྲོད་དུ་བརྩེ་དུང་གི་ས་བོན་རེ་རེ་འཁྲུངས།
གཟེངས་རྟགས་གཙོ་ཤས་ལ།
༢༠༠༢ལོར་ཀན་ལྷོ་བརྙན་འཕྲིན་ཁང་གིས་གཙོ་བསྒྲུབ་བྱས་པའི་ཁུལ་ཡོངས་ཀྱི་སློབ་འབྲིང་སློབ་མའི་དམངས་གཞས་འགྲན་བསྡུར་ཁྲོད་ཨང་གསུམ་པའི་གཟེངས་རྟགས་ཐོབ།
༢༠༠༦ལོར་མཚོ་སྔོན་མི་རིགས་སློབ་ཆེན་གྱི་སློབ་རའི་ཕུལ་བྱུང་གླུ་བ་བཅུའི་འགྲན་བསྡུར་ཁྲོད་ཨང་དང་པོའི་གཟེངས་རྟགས་ཐོབ།
༢༠༡༠ལོར་ཀན་ལྷོ་ཁུལ་གྱི་འཇོན་ནུས་ཅན་གྱི་གླུ་བ་བཅུའི་གྲས་སུ་ཚུད།
ཀླུ་ཆབ་སྔོན་མོ་དམངས་ཁྲོད་སྒྱུ་རྩལ་ཚོགས་པའི་ཚོགས་གཙོ་དང་།ཀན་ལྷོ་རོལ་མོ་བའི་ཐུན་ཚོགས་གྱི་ཚོགས་མི།ན་རོ་གཞས་ཚོགས་ཀྱི་ཚོགས་མི་བཅས་ཡིན།
