༄༅།།རྗེ་དྲན་ཤེལ་གྱི་ཨ་དརྴ།
ར་ལ་བྱོན་པའི་མདངས་འཛིན་ལྟ་ངན་དེས།།
ཁ་བའི་ལྕུག་ཕྲན་བསྣོལ་བའི་ཞིང་ཁམས་ཀྱི།།
ཆོས་སྲིད་སྲོག་སྙིང་ལྔ་ཟུང་རིག་པའི་ནོར།།
གཞོམ་འདོད་ཀླན་ཀ་གྲངས་མང་འཚོལ་ཙ་ན།།
སྨྲ་བ་མེད་པའི་བརྟུལ་ཞུགས་ལན་བརྒྱར་བསྩལ།།
ཆོས་དང་ཆོས་ཉིད་རྣམ་པར་འབྱེད་བྱེད་ལ།།
མེད་ཐབས་བྲལ་བ་ཨི་ལྡན་སོར་མོའི་གྲངས།།
གྲངས་ཀྱི་ལྕི་ཞེས་སྔར་སྲོལ་ཡོངས་གཏོར་ནས།།
ཡ་མ་ཟུང་གི་རྗོད་བྱེད་བཀྲམ་པ་ན།།
ཐལ་འགྱུར་གཅིག་གིས་མིང་གི་ལྷག་མར་མཛད།།
བོད་པ་ཚང་གི་སྤྱི་བོ་གནམ་བསྟན་ཀུན།།
བག་འཁུམས་དྲན་ཞིམ་ཡམས་ཀྱིས་གནར་བའི་ཚེ།།
གསུམ་གཉིས་ནོར་འཛིན་སྒེག་མོར་དབང་བསྒྱུར་བའི།།
མེས་པོའི་ལོ་རྒྱུས་ནད་བརྒྱ་སེལ་བའི་སྨན།།
དྲན་འཛིན་གཟེངས་སུ་སྟོད་བྱེད་ཡང་ཡང་བསྟབས།།
གངས་ལྗོངས་ལོ་པཎ་ཡོངས་ཀྱི་སྤྱི་མེས་མཆོག།
ཀུན་ཏུ་བཟང་བོའི་བརྡ་སྤྲོད་རྒྱ་མཚོ་ལ།།
འཇུག་འདོད་བློ་གསལ་ཚོགས་རྣམས་ངལ་བའི་ཚེ།།
ཞལ་ཤེས་མན་ངག་སྟོང་གིས་རྒྱས་བཏབ་པའི།།
འཇུག་ངོགས་རིན་ཆེན་གྲུ་གཟིངས་ལེགས་པར་བསྐྲུན།།
སྔ་རབས་བརྡ་སྤྲོད་སྨྲ་བའི་མགྲིན་ལམ་ནས།།
ཐོན་གྱང་འདྲེན་བྱེད་ཟས་སུ་མ་གྱུར་བ།།
ཚོགས་གསུམ་སྟོང་ལྡན་འདབ་མའི་ཚེམས་ཕྲེང་ཀུན།།
ཡོངས་སུ་ངོམ་བྱེད་སྣང་བའི་མགོན་པོ་གང་།།
ཕྱི་རབས་བློ་གསལ་དགའ་སྟོན་འཕེལ་བའི་རྒྱུ།།
ཕར་ཕྱིན་ལྔ་བའི་མཚན་འཆང་མགོན་ཁྱོད་ཀྱིས།།
ལུགས་གཉིས་གཙུག་ལག་སྤེལ་བའི་རྔ་བོ་ཆེ།།
ཞི་བདེ་རྒྱ་མཚོའི་བར་དུ་རྡུང་བ་ན།།
ཆོས་རྒྱལ་མེས་དབོན་རྣམ་གསུམ་དགྱེས་པའི་འཛུམ།།
རྟ་བདུན་འོད་དང་འགྲོགས་ནས་ས་ལ་སྤྲོ།།
རིག་གཞུང་ཕྱོགས་ཀྱི་གྲངས་ལ་དབང་འབྱོར་བའི།།
སློབ་དཔོན་ཁྱོད་དང་ཐོན་མི་ཨ་ནུ་མཆོག།
ཐ་དད་མེད་ཀྱང་ཐ་དད་སྣང་བ་དང་།།
གཅིག་ཏུ་ཟད་ཀྱང་དུ་མར་སྟོན་པ་འདིས།།
སྒྱུ་མའི་ལུས་ཕྲ་མྱ་ངན་གནས་ལ་བཀོད།།
ཡང་དར་བསྟན་པའི་ཉི་མ་འོད་པོ་ཆེ།།
གངས་ལྗོངས་སྤྱི་མཐུན་ལས་ཀྱིས་ཤར་བ་ན།།
བརྒྱུད་ལྡན་བླ་མའི་ཕྱག་ལེན་མ་ནོར་ཞིང་།།
དམ་ཚིག་གཙང་མ་སྲེད་ལྷད་མ་ཤོར་བའི།།
དབང་ཁྲིད་ལུང་གསུམ་ལུ་གུ་རྒྱུད་དུ་སྤེལ།།
ཟལ་མོ་སྒང་བའི་བླ་ཚེ་སྲོག་གསུམ་གྱི།།
རྨུ་ཐག་ཡང་དྲངས་མཛད་འཕྲིན་སྙེ་མའི་འབྲུ།།
ཡངས་པའི་ནོར་འཛིན་འདི་ན་ཤོང་མིན་ཞེས།།
སྔོན་མེད་འཇིག་རྟེན་བསྐྲུན་ལ་མེས་པོའི་བློ།།
ངལ་བའི་ཁུར་གྱིས་ནོན་ལ་སྙིང་རྗེ་འཆོར།།
མི་བསྲུན་བསམ་སྦྱོར་ངན་པའི་གདུག་རྩུབ་ཀྱིས།།
ལྷ་འདྲེ་གདོན་བགེགས་ཞེས་པའི་མིང་གི་སྒྱོགས།།
ཉེས་པས་དབེན་ཡང་སྟུད་མར་འཕངས་ན་ཡང་།།
བགྲང་ཡས་རྒྱལ་སྲས་འཇུག་ངོགས་སྤྱོད་འཇུག་ལ།།
ཐུགས་དམ་མཐིལ་དུ་གནང་བ་ཨེ་མ་ཧོ།།
ཕུལ་བྱུང་མཛད་འཕྲིན་ཟླ་བའི་མ་མ་ལས།།
སྐྲ་རྩེར་བླངས་པའི་ཆ་ཤས་ཕྲ་མོ་ཙམ།།
ཡི་གེ་ཞེས་པའི་རི་མོར་བཀོད་པ་འདིས།།
འདི་འདྲའི་སྐྱེས་ཆེན་དག་གི་ངང་ཚུལ་ལ།།
སེར་སྐྱ་ཡོངས་ཀྱིས་ཉམས་སུ་ལེན་པར་ཤོག།
ཅེས་པ་འདི་ནི་༧སློབ་དཔོན་རིན་པོ་ཆེ་གང་གི་ཡང་སློབ་ཏུ་གཏོགས་པ་ལུགས་གཉིས་ནོར་གྱིས་བཀྲེན་ཞིང་འཕོང་བའི་མུ་ལྟོ་བ་རོང་ངར་འཇམས་དབྱངས་བསོད་ནམས་ཀྱིས་མེ་བྱ་ལོའི་ཧོར་ཟླ་བཅུ་བའི་ཚེ་བརྒྱད་ཉིན་བྲིས་པ་ཛ་ཡནྟུ།།
ཁ་པར།13519419710
发自我的iPad
