གྲི༌གུམ༌བཙན༌དང༌ཁྲི༌སྲོང༌ལྡེ༌བཙན༌གྱིས༎ ང༌ཡི༌སྲིད༌དང༌ཁྱོད༌ཀྱི༌བོན༌སྲིད༌ཞེས༎རྒྱལ༌ཁྲི༌གསེར༌གྱི༌ལྷུན༌པོ༌བརྟན༌ཕྱིར༌དུ༎ བོན༌གྱི༌ལོ༌པན༌རུ༌བཞིར༌བདེ༌གཤེགས༌ཞེས༎ བཀའ༌ཡི༌འཁོར༌ལོ༌ཁོར༌མོ༌ཡུག༌དུ༌སྐོར༎བྲག༌དཀར༌བྱ༌རྒོད༌དམུ༌རི༌སེང༌གེ༌ཞེས༎ ད༌ཆའི༌ཐེ༌བོར༌འབོད༌པའི༌རྫོང༌གི༌ཆར༎ རྒྱ༌བོད༌མཚམས༌སུ༌མཆིས༌པའི༌རྣམ༌མཁྱེན༌པས༎ རང༌ཆོས༌ཉི༌མའི༌གསེར༌འོད༌མི༌སྒྲིབ༌ཕྱིར༎. རང༌རྒྱུད༌མི༌ཆད༌སྐལ༌བར༌སྤེལ༌བའི༌ཕྱིར༎ རང༌ལུས༌རིན༌ཆེན༌མི༌ཤོར༌སྲུང༌བའི༌ཕྱིར༎ གནས༌འདིར༌སླེབས༌ནས༌གནས༌འདིར༌འཚོ༌བའི༌ཀླགས༎ བསྟན༌པ༌གང༌ཞིག༌གནས༌སུ༌སྤེལ༌སྤེལ༌བས༎ བོན༌གྱི༌བསྟན༌པས༌གནས༌མིའི༌ཡིད༌འཕྲོག༌ལ༎. གནམ༌གྱི༌བོན༌དང༌ས༌བོན༌མྱི༌བོན༌ཞེས༎དགེ༌བའི༌ཚུལ༌གྱིས༌འཇུག༌པ༌ལེགས༌བྱས༌པས༎ འབྲུག༌དཀར༌གཙང༌བོའི༌ངོགས༌ཀྱི༌གནས༌ཆེན༌འདིར༎ བསྟན༌པ༌གང༌གིས༌འབྲོང༌གི༌རྭ༌རྩེ༌དང༌༎ སྟག༌གི༌མཆེ༌བ༌རྣོན༌པོའི༌འཇིགས༌པ༌ནས༎ སེང༌ཕྲུག༌རང༌གི༌ང༌རོ༌སྒྲོག༌བཞིན༌མུས༎ ཞང༌གཤེན༌བསྟན༌པའི༌འོག༌མིན༌གཙོ༌བོར༌འགངས༎ གནས༌འདིར༌བདེ༌བར༌གཟིམས༌ཞོར༌གནས༌འདི༌སྲུང༌༎ འདི༌བཞིན༌སྐལ༌བ༌དུ༌མའི༌རྗེས༌སུ༌ནི༎ བཙན༌པོའི༌ལུགས༌གཉིས༌མ༌ཆིངས༌འཐོར༌བ༌དང༌༎ སིལ༌བུའི༌དུས༌སུ༌སྐྱོ༌གར༌འཁྲབ༌འཁྲབ༌མཐར༎ དཔལ༌ལྡན༌ས༌སྐྱས༌ཆོས༌སྲིད༌སྐྱོང༌བའི༌བབ༎ རྒྱུ༌དང༌རྐྱེན༌མང༌གེགས༌སུ༌གྱུར༌བ༌དང༌༎ཧོར༌དང༌གཞན༌གྱི༌རླུང༌ནག༌འཚུབ༌ནས༌ནི༎ གཉའ༌གནོན༌ཐུབ༌ཚོད༌ལས༌སྐྱེད༌རང༌ལུས༌དང༌༎ ཐ༌མའི༌རང༌རྩིས༌གཡབ༌མོ༌མི༌ཤོར༌ཕྱིར༎ རི༌རབ༌ལྟར༌གྱི༌འཁར༌བར༌བརྟེན༌ནས༌ནི༎དགོན༌མང༌ལོགས༌ནས༌ས༌སྐྱའི༌བུ༌དགོན༌དང༌༎ སྡེ༌མང༌ལོགས༌ནས༌ས༌སྐྱའི༌ལྷ༌རུས༌སུ༎ བསྒྱུར༌ནས༌བསྟན༌པ༌གང༌ལས༌ལོགས༌སུ༌ནི༎ ནང༌བའི༌བསྟན༌ལ༌ཐོག༌མའི༌ཕྱག༌འཇུས༌ཙམ༎
བསམ༌འགྲུབ༌རྒྱ༌མཚོས། ༢༠༡༧.༩.༣༠
