文/拾麦穗的路人
今朝我要讲咯《戏说老王》，迭个老王是啥人呢，大家猜猜看。
迭个老王呢伊是我先生。几日天前头么我帮伊讲，各趟子九三开年会搞联欢活动，叫我表演只节目，我唱歌么要跑调咯，跳舞么踏不牢节奏咯。咯那能办呀？拿么老王讲：侬好讲脱口秀咯呀。我讲：脱口秀么要有内容好讲咯呀，无么啥内容好讲。拿么老王讲：无么啥内容好讲嘛就讲讲我呀。咯么我就等伊特句闲话呀。所以我今朝的《戏说老王》是经过老王同意咯，有许可证咯，否则我在外头瞎讲八讲，回转去要吃排头咯。
老王么有几句经典闲话。一句叫做“王字颠倒写’。我喊伊做啥个事体，伊总归讲，包啦我身上保证做好，做不好么我王字颠倒写。个么王字颠倒写么还是王呀。所以有晨光我叫伊做个事情，伊忘记特做了，我就讲，托人托了个“王伯伯”。各么老王还有一句经典闲话叫：聪明的脑袋不长毛。今朝我就重点讲讲特只故事。
老王还是小王咯晨光，头发长得还是蛮欣咯，否则我也不会看中伊咯。
不晓得啥晨光起，大概十几年前头哇，伊头顶心咯头发就越来越稀越来越稀，出现了一个地中海，周围一圈头发，而且面积越来越大。个么老王就开始喜欢戴帽子了，进进出出戴牢只帽子。等辣屋里相也戴牢只帽子，炒菜么也戴牢只帽子、吃饭么也戴牢只帽子。有晨光出门忘记特戴帽子了，还会得重新回转去拿。
个么老王也蛮苦闷咯，有一趟，伊寻牢伊各爷倒班账，伊讲：阿伯，我头发长得加少，全像侬呀，侬那能养得我头发加少？公公对伊望了望，慢吞吞咯讲：侬讲侬像我，个我觉得我头发要比侬多么？各记么伊吃瘪。
有一趟同学聚会，发觉不少同学全长白头发了，咯么老王讲：侬特全拉长白头发了，我倒白头发不大长，我对伊望了望讲：侬头发都不大长，拿啥个去变白头发啊。各记我晓得，我讲得伊蛮辣手咯，蛮触伊心境咯。
有一趟辣我侄子屋里厢过年，老王老酒吃多了，觉着热了，就拿帽子脱特了。个么侄子屋里厢有个囡，也就是我的侄孙囡，4、5岁的样子，坐啦老王咯对面，对伊格头望发望发，然后从高凳子上爬下来，答答答跑到老王咯边攮厢，拿了只帽子够发够发帮伊戴上去。个么老王就讲：哦谢谢妹妹哦谢谢妹妹哦。我在旁边看着就问了：妹妹，侬做啥要特老公公戴帽子？小姑娘嘴一撇讲：老公公只光榔头难看S啦，戴戴满。
个么老王也觉得自家的光榔头难看，总是想弥补一下。过了段晨光，伊帮我讲，伊要跟伊同事一道到医院里去种头发。个麻我总归支持伊喽，种出头发来麻老王要变小王各呀。伊就拿了几千块钞票到医院里去了。从医院里回来，我望望伊只头呒啥变化，就问伊，头发种的那能？伊讲：不种了。问伊为点啥不种，伊讲医生讲了三句闲话：侬下趟点不要来了，你的头发种不出来咯，毛囊全S特啦。我一听么，欧耶，特个医生蛮有职业道德咯，种不出来就种不出，不瞎种。假使种不出也要帮伊种，各要浪费多少财力物力啊。我各记头真想送面锦旗给各个医生。
那么老王也S心了。开始买各种各样的帽子，春秋咯，热天式咯，冷天式咯，薄咯，厚咯，皮咯，棉咯，还有钓鱼戴咯，烧菜戴咯。
个么我就对伊讲，你各秃顶么长了侬头顶心上，侬自家又看不到咯，屋里厢人么又不嫌贬侬难看，侬做啥在屋里厢也戴牢只帽子，看着难过萨啦。阿好推板点勿要加认真。后来伊就好一点了。
有一趟，屋里厢人一淘看电视，电视的节目主持人呢是个光头。老王就在旁边讲：剃只光头倒也蛮好看咯，我像啥也去剃只光头。我以为伊瞎讲讲，不睬伊。过了几日天伊又讲要去剃光头，我讲不同意，难看S啦。伊申请了几趟呢我全不同意，后来伊也不管了，自家跑到理发店剃了只光头回来，各我也呒没办法了。伊还讲：剃光头一点也不合算，15块洋钿，三记二记就剃好了。啥人叫侬头发长了加少喽，收费嘛一样收咯呀对不啦。侬有本事么头发多长点。
后来后面咯头发又长出来了，伊到淘宝上买了一把电动剃头刀，在卫生间里对牢镜子自家剃，剃好后叫我帮伊看看较，我看了一眼讲蛮灵蛮灵，伊就上班去了。回转来我吃排头了，原来伊后脑波上有一小撮头发无没剃特，我呒没帮伊看出来。后来再剃嘛伊门槛精了，前头一块镜子，后头一块镜子，后脑勺照得萨萨清。现在三日两横头剃一趟，经常剃得光秃秃畅畅亮。
各么特十几年下来呢，老王从一开始不接受秃顶，到最后愿意剃个光头。现在，啥人再跟伊讲头发的事体，伊就理直气壮地讲：聪明的脑袋不长毛，侬有我聪明不啦？侬讲伊心态好代？
从老王的事体告诉我们：人生中总归有这样那样的不称心，积极地面对伊，接受伊，生活依然是美好的。
