༡
ཤེས་རབ་དང་ལྡན་པ་དག་གི་སྐད་ཆ་ནི་སྤྱིར་བཏང་བའི་མི་རྣམས་ཀྱི་བསམ་བློ་ལས་རིམ་པ་དུ་མས་འཕགས་ཡོད་ལ། ཡང་ཕལ་ཆེ་བས་སྣང་མེད་དུ་བཏང་བའམ་གལ་ཆེན་དུ་བརྩི་མི་སྲིད་པའི་ཆེས་སྤྱིར་བཏང་གི་བསམ་བློའི་ཁོངས་སུའང་འདུས་ཡོད། དེ་བས་ན། ཁྱོད་རང་གིས་གཞན་གྱི་སྐད་ཆར་ཉན་ཤེས་པར་གྱུར་ན། སྐབས་དེར་ཁྱོད་རང་ཡང་བསམ་བློའི་གོ་རྟོགས་མཐོ་རུ་འགྲོ་གི་ཡོད་པའི་རྟགས་ཡིན་ནོ།།
༢
དཔེ་ཆ་ཀློག་པ་དང་། སློབ་སྦྱོང་བྱ་བ་ནི། གཅིག་གིས་གཅིག་ལ་སྐུལ་འདེད་གཏོང་དགོས་པ་དེ་སྲིད་དུ་དོན་དམ་པའི་དཔེ་ཀློག་དང་སློབ་སྦྱོང་མིན་ལ། ནམ་ཞིག་ན། ཟ་མ་ཟ་བའམ། ཇ་ཆང་འཐུང་བ་ལྟར་རང་བཞིན་གྱིས་ལས་དེ་ལ་འཇུག་པ་བྱུང་བ་ནས། སློབ་སྦྱོང་རྣལ་མའི་མགོ་བོ་ཚུགས་པ་དང་། ཤེས་རབ་རྣལ་མའི་སྒོ་ཁ་བྱེ་བ་དང་། མཁས་པ་རྣལ་མའི་ལམ་དུ་ཞུགས་པ་རེད་སྙམ།
༣
བྱིས་པའི་རྣམ་དག་གི་དགའ་བ་དང་བརྩེ་བ་ནི། གཡོ་དང་སྒྱུས་མ་སྦགས་ཤིང་། རྫུན་དང་ལྷད་མ་འདྲེས་པའི་གཉུག་གཤིས་ཀྱི་ངོ་བོ་དག་མ་ཡིན་པས། ཁོང་ཅག་གི་འཛུམ་མདངས་རེ་རེས་ང་ལ་ཚད་མེད་པའི་སྤྲོ་སྣང་སྟེར་ནུས་ཤིང་། ཁོང་ཅག་གི་དགའ་སྣང་རེ་རེས་ང་ལ་ཟད་དུ་མེད་པའི་སེམས་འགུལ་སྦྱིན། རྒྱུ་མཚན་དེའི་ཕྱིར། ང་ནི་བྱིས་པ་དག་ལ་ཁ་མཚར་ལབ་ཅིང་། རྩེད་མོ་བྱེད་པར་དགའ་བ་ཞིག་ཏུ་ངང་གིས་ངང་གིས་ཆགས་སོང་སྟེ། དེས་ནི་ཁོང་ཅག་ལ་དྲོད་སྣང་འཐོབ་ཅིང་། རང་ཉིད་ལ་བདེ་སྐྱིད་ཡོང་བས་སོ།།
བསམ་ཞིང་བསམ་ན། རང་གི་འདས་དོན་གྱི་ཕྱིར་དྲན་ཁྲོད་ནས་དོན་གནད་ཅི་ཡང་བརྗེད་ངས་སུ་འགྲོ་ཡང་། བརྩེ་བ་དག་མས་གྲོགས་སྒྲིག་པའི་བྱིས་པ་རྣམས་ནི། ནམ་དུའང་དཀོན་མཆོག་བཞིན་དུ་གསལ་ལེར་འཆར་བ་ལས་སེམས་ཀྱི་ཁོངས་ནས་བོར་ཞིང་ཡལ་མ་མྱོང་ཨང་།
༤
མི་ཚེའི་ལམ་ཁ་ནས་སྙིང་གཏམ་ཡོད་ཚད་འཆད་ཆོག་པའི་བློས་ཐུབ་ཀྱི་གྲོགས་རེ་རྙེད་པ་ནི། འཁོར་བ་པའི་བསོད་ནམས་ངོ་མ་བོ་རེད། དེ་བས། མ་བརྟག་ན་མང་པོ་ཞིག་ཡོད་ཡོད་འདྲ་བ་ལ། དགོས་དུས་སམ་ཞིབ་ཏུ་བརྟག་ན་གྲོགས་ངོ་མ་མི་རྙེད་པ་དེ་འདྲར་ནམ་དུའང་འགྱུར་མི་རུང་བས། ཕན་ཚུན་ཡིད་ཆེས་ཤིང་། ཕན་ཚུན་སེམས་ཁུར་གནང་བའི་གྲོགས་རེ་ཡོད་དགོས་པ་རེད། དེ་འདྲའི་ཕྱིའི་གྲོགས་སྒྲིག་པ་ལ་དང་ཐོག་ནང་གི་གྲོགས་བསམ་པ་བཟང་པོ་ཞིག་ཤིན་ཏུ་གལ་ཆེ།
༥
སངས་རྒྱས་ཐབས་ལ་མཁས་ཤིང་ཐུགས་རྗེ་ཆེ་བ་དེས། འདུས་བྱས་ཀྱི་མཐའ་བཞི་གསུངས་པ་ལྟར། འབྲལ་དགོས་པ་དག་ནི་ཁྱོད་ཀྱིས་སེམས་ངལ་ལུས་ངལ་ཇི་ལྟར་བསགས་ཀྱང་མཐའ་འཇུག་ཏུ་བྲལ་འགྲོ་བས། ང་ཚོས་རང་ཉིད་ལ་གཅེས་སྐྱོང་ཡག་པོ་བྱས་ཏེ། ཁྱོད་ཀྱིས་མི་ཁུག་པའི་གྲོགས་དང་། ཁྱོད་ཀྱིས་མི་འགྲུབ་པའི་དོན་དག ཁྱོད་ལ་མི་འཚམ་པའི་གོ་ཐོབ། ཁྱོད་ཀྱིས་མི་ཐོན་པའི་བཅོས་མ་སོགས་ཡོད་ཚད་ཆུ་ལ་གཡུགས་རྗེས། ཆེས་གུ་ཡངས། ཆེས་རང་དབང་། ཆེས་ཟོལ་མེད་ཀྱི་རང་ཉིད་བྱས་ན་མི་ལེགས་སམ།
༦
གྲོགས་པོ་ལགས། ཁྱེད་ཀྱིས་མི་ཆུང་གིས་གཏམ་ཆེན་བཤད་ཀྱི་འདུག་མ་བསམ་རོགས། ལྷག་ཏུ་སུ་ཞིག་ལ་སློབ་གསོའམ་བཀོད་པ་གཏོང་གི་འདུག་མ་བསམ་རོགས། འདི་ནི་ད་ལྟའི་ཁོ་བོ་ཡི་བསམ་ཚུལ་ཟིན་བྲིས་སུ་ཕབ་པ་ཙམ་སྟེ། ལོ་རྗེས་མའི་རང་ཉིད་ཀྱི་གོ་བ་དང་གཤིབ་བརྡུར་བྱ་ཆེད་དུ་བྲིས་པ་ཡིན། དེ་བས་ན། ཁྱོད་ཀྱི་དགོངས་པར་མ་མཐུན་ཚེ་བསམ་ཤེས་ཡོད་པར་ཞུ་ལ། གཏམ་འདི་དག་ཀྱང་དྲན་ཚུལ་ཙམ་ལས་ད་ལྟ་ལག་ལེན་དུ་ཐེབས་ཀྱི་ཡོད་ཅེས་སྨྲ་ཡི་མེད། གང་ལྟར། མི་གཞན་ལ་འགྲན་བསྡུར་བྱེད་པ་ལས། རང་ཉིད་ཀྱིས་རང་ཉིད་ལ་འགྲན་བསྡུར་བྱས་ཏེ། རང་ཉིད་རང་ཉིད་ལས་རྒྱལ་བ་ཞིག་བྱ་རྒྱུ་དེ་ནི་བདག་གི་རེ་འདུན་ངོ་མ་ཡིན་ནོ།།
2016-12-30……༢༡༤༣-༡༡-༡ཉིན་བྲིས།
