ང་ནི་དཔྱིད་དུས་ཀྱི་མེ་ཏོག་ཆུང་ཆུང་ཞིག
ང་ལ་སྦྲང་ཆར་ལྟ་བུའི་སློབ་གསོ་ཡི་མཛུབ་སྟོན་དགོས
ང་ལ་ཉི་འོད་བཞིན་འཇམ་པའི་དགེ་རྒན་གྱི་བྱམས་བརྩེ་མཁོ
ང་ལ་དཔྱིད་རླུང་ལྟ་བུའི་ཁྱིམ་བདག་གི་སྐྱོར་མ་དགོས
ང་ནི་དཔྱིད་དུས་ཀྱི་མེ་ཏོག་ཆུང་ཆུང་ཞིག
ཤེས་རིག་གི་ཆུ་ཕྲན་ལྷུང་ལྷུང་འབབ་སའི་སྤང་ཐང་འདི་ན
ང་ཡི་དབྱངས་གསལ་གྱི་ཟེའུ་འབྲུ་རྣམ་པར་བཞད་ཡོད
ང་ཡི་མདུན་སྐྱོད་གླུ་སྒྲ་སྤོབས་པས་བཏེགས་ཡོད
ང་ནི་དཔྱིད་དུས་ཀྱི་མེ་ཏོག་ཆུང་ཆུང་ཞིག
ང་ཡི་ཕྲག་ན་སྐྱ་ཐིང་ཐིང་གི་ས་གཞི་འདིའི་འབྱུང་འགྱུར་ཡོད
ང་ཡི་འཚར་ལོངས་ནི་གངས་རི་དང་སྦྲ་ནག་གི་རེ་བ་ཡིན་པས
ང་ལ་ཆར་རླུང་གི་ཁྲོད་ནས་མགོ་བོ་མི་སྨད་པའི་བརྩོན་སེམས་དང་སྤོབས་པ་ཡོད
ང་ནི་དཔྱིད་དུས་ཀྱི་མེ་ཏོག་ཆུངཆུང་ཞིག
ང་ཡི་ལང་ཚོ་ཤེས་རབ་ཀྱིས་མ་རྒྱས་ན
ས་ཆེན་གྱིས་བསྐྱངས་བའི་དྲིན་ལན་ཤོར་འགྲོ
དཔྱིད་རླུང་གིས་བཅོལ་བའི་རེ་བ་ཡལ་འགྲོ
ང་ནི་དཔྱིད་དུས་ཀྱི་མེ་ཏོག་ཆུང་ཆུང་ཞིག
རླུང་བུ་བསིལ་བསིལ་འདི་ང་ཡི་བརྩོན་པ་ཡིན་པས་རི་རབ་ཀྱི་དཔུང་བས་མི་ཁོག
སྤྲིན་པ་ལང་ལོང་འདི་ང་ཡི་ཕུགས་བསམ་ཡིན་པས་ཤེས་རིག་གི་གནམ་འཕང་སྟོད་འགྲོ
ཆར་བ་ཟམ་ཟིམ་འདི་ང་ཡི་སེམས་པ་ཡིན་པས་དག་གཙང་གི་རང་གཤིས་་ལྡན་ཡོད
ང་ནི་དཔྱིད་དུས་ཀྱི་མེ་ཏོག་ཆུང་ཆུང་ཞིག
ཤར་ན་བརྗིད་པའི་རྨ་ཆེན་གངས་རིའི་ང་ལ་ཞུམ་མེད་ཀྱི་སྤོབས་པ་སྩལ་ཡོང
ལྷོ་ན་བཞུར་བའི་རྨ་ཆུ་སྔོན་མོས་ང་ལ་མདུན་སྐྱོད་ཀྱི་སྙིང་སྟོབས་སྐྱེད་ཡོང
ཕྱོགས་བཞིར་འགྱིང་བའི་རྩེ་ལྷ་བཅུ་གསུམ་གྱིས་ང་ལ་འགན་འཁྲི་དང་རེ་བ་བཅོལ་ཡོད
ང་ནི་དཔྱིད་དུས་ཀྱི་མེ་ཏོག་ཆུང་ཆུང་ཞིག
ས་ཆེན་གྱིས་ང་ལ་ཚེ་སྲོག་དང་ལང་ཚོ་སྩལ་བས
ང་ཡི་རྣམ་པར་གྲོལ་བའི་ཟེའུ་འབྲུས་ས་ཆེན་གྱི་མུན་པ་སེལ་ཐུབ་པར་སྨོན
ང་ནི་དཔྱིད་དུས་ཀྱི་མེ་ཏོག་ཆུང་ཆུང་ཞིག
སྦྲང་ཆར་གྱིས་ང་ལ་ཤེས་རབ་ཀྱི་འདབ་མ་སྩལ་བས
ང་ཡི་རྣམ་པར་བཞད་པའི་འདབ་མའི་ངོས་ན་བསླབ་བྱ་ཡི་ཟིལ་བ་ཁྲོམ་ཁྲོམ
ང་ནི་དཔྱིད་དུས་ཀྱི་མེ་ཏོག་ཆུང་ཆུང་ཞིག
དབྱངས་གསལ་གྱི་དཔྱིད་རླུང་འབྲི་བཞིན་འཚར་ལོངས་བྱུང་དུས
ང་ལ་རྫ་ཆུ་བཞིན་དྭངས་གཙང་གི་སློབ་གསོ་ཞིག་དགོས
ང་ནི་དཔྱིད་དུས་ཀྱི་མེ་ཏོག་ཆུང་ཆུང་ཞིག
ཤེས་རིག་གི་ཆར་ཟིལ་འཐུ་བཞིན་ཟེའུ་འབྲུ་བཞད་དུས
ང་ལ་དཔྱིད་ཀ་ལྟ་བུའི་ལྷད་མེད་ཀྱི་བརྩེ་བ་དྲོན་མོ་མཁོ
