དགུན་གཞུང་འདིར་ཏོག་དབྱིབས་ནད་དུག་ཅེས་པའི་འཇིགས་རུང་གི་ནད་ཡམས་འདིས་ཝུའུ་ཧན་ཞེས་པའི་གྲོང་ཁྱེར་གྱི་མིང་དེ་རྒྱལ་ཡོངས་ཕྱོཌ་བཞིར་ཁྱབ་ཅིང་། རང་རེའི་མེས་རྒྱལ་ཡང་ཀུན་གྱིས་དོ་སྣང་བྱེད་ཡུལ་དུ་གྱུར། སྙིང་རྗེ་མེད་པའི་ནད་ཡམས་འདིས་མི་རྣམས་ཀྱི་ལྷིང་འཇགས་ཀྱི་འཚོ་བར་བརྡབ་བསིག་ཆེན་པོ་བཟོས་སོང་། ནད་ཡམས་ཀྱི་མདུན་དུ་ང་ཚོས་ད་གཟོད་ཚེ་སྲོག་གི་རིན་ཐང་རྟོཌ་ལ་གཉེན་ཉེའི་བརྩེ་བ་ཚོར། དེ་བས་ཀྱང་མེས་རྒྱལ་གྱི་སྟོབས་ཤུགས་མིག་མཐོང་ལག་ཟིན་བྱུང་ལ། སྨན་དོན་མི་སྣ་སོཌ་ཀྱི་རང་སྲོག་བློས་གཏོང་གི་སྙིང་སྟོབས་ཀྱང་རིམ་གྱིས་ཚོར། ཆུང་བ་མི་སྒེར་དང་ཆེ་བ་ཁྱིམ་མཚེས་རྒྱལ་ཁབ་ཀྱི་མ་བསྐུལ་དང་བླངས་ཀྱི་རོགས་སྐྱོར་ཐོབ་ལ། སེམས་གཏིང་གི་སྨོན་འདུན་ཡང་ཚོར།
གོས་དཀར་ལྷ་རྗེ་ཚོས་རང་ཁྱིམ་ནས་བྲལ་ཞིང་རང་ཕྲུག་བསྐྱུར་ཏེ་གཞན་སྲོག་སྐྱོབ་པའི་དམག་སར་ཆས། ནད་དུག་དང་འཐབ་རྩོད་བྱེད་པའི་སྐར་ཆ་རེ་རེར་ཁོ་ཚོས་རང་ལུས་ཀྱི་ངལ་བ་ཁོག་ཏུ་མིད་ཅིང་། རང་སེམས་ཀྱི་གདུང་བའང་རྒྱང་རིང་དུ་བསྐྱུར། ཉིན་མཚན་རེ་རེར་ལུས་ཡོངས་བཏུམས་ཏེ་ཚ་བ་དང་ན་ཟུག་ཅི་འདྲ་ཡོད་རུང་། འཁང་ར་ཡེ་ནས་མེད་པར་སྔར་བཞིན་ནད་དུག་དང་དམག་འཐབ་བྱེད་བཞིན་ཚེ་སྲོག་རེ་རེ་གཤིན་རྗེའི་ཁ་ལས་བསྐྱབས། ཐ་ན་རང་ལུས་ངལ་བས་མནར་ཏེ་ཚེ་སྲོག་གི་དབུགས་རྒྱུན་ཆད་ལ་ཁད་ན་ཡང་ནད་དུག་དང་འཐབ་ཀྱིན་གཞན་སྲོག་ལ་རེ་བའི་འོད་སྣང་སྦྱིན་ཏེ་རང་སྲོག་བློས་བཏང་། ཡུན་རིང་གི་འཐབ་རྩོད་ཁྲོད། ཁ་རས་ནི་ཁྱེད་ཚོའི་ལུས་དང་བྲལ་མེད་ཡིན་ལ། བརྩེ་བ་ནི་ཁྱེད་ཚོའི་སེམས་དབུས་ལས་དོར་མ་མྱོང་། ཁ་རས་ཡུན་རིང་བརྒྱབ་པའི་རྗེས་ཤུལ་རེ་རེ་ནི་ཁྱེད་ཚོས་དཀའ་ངལ་དང་འཐབ་རྩོད་བྱས་པའི་དཔའ་རྟགས་རེ་རེ་ཡིན་ལ། བརྩེ་བ་ལས་འཁྲུངས་པའི་མེ་ཏོག་རེ་རེའང་ཡིན།
ནད་ལ་སྙིང་རྗེ་མེད་ཀྱང་། མི་ལ་བརྩེ་བ་ཡོད་པས་བརྩེ་ལྡན་གྱི་སྐྱེ་བོ་ཚོས་དངོས་བརྒྱུད་ཅི་རིགས་ལམ་ནས་ནད་དུག་སེལ་བར་མཁོ་བའི་དངོས་ཟོག་ཞལ་འདེབས་ཕུལ་ལ། འབྲེལ་ཡོད་ལག་རྩལ་མི་སྣས་རང་ནུས་ཡོད་རྒུ་ལེགས་སྐྱེས་ཕུལ་ནས་ཚེ་སྲོག་མང་དག་ཅིག་ནད་དུག་གི་འཇིགས་པ་ལས་ཐར་ཏེ་སླར་ཡང་ཉི་འོད་གསར་པ་ལོངས་སུ་སྤྱོད་རྒྱུ་བྱུང་། དེ་དག་ནི་བརྩེ་བ་ལས་འཁྲུངས་པའི་ཡིད་སེམས་འགུལ་བའི་བྱ་སྤྱོད་རེ་རེ་ཡིན་ལ། ནད་དུག་དང་འཐབ་རྩོད་དྲག་པོ་བྱེད་མཁན་གྱི་ལས་དོན་མི་སྣ་ཚོས་གནང་བའི་ཤ་ཚའི་གདམས་ངག་རེ་རེའང་ཡིན། ནད་ལ་སྙིང་རྗེ་མེད་ཀྱང་། མི་ལ་བརྩེ་བས་ཕྱུག་ཡོད། བརྩེ་ལྡན་མི་རྣམས་ཀྱི་སྟོབས་ཤུཌ་གཅིག་ཏུ་བསྒྲིལ་བས་ཡུན་རིང་མ་འགོར་བར་ནད་དུག་གི་བར་ཆད་ལས་ཐར་ངེས་སོ།
