美梦成真（上）……原来係咁！

粤声讲故|粤讲粤有趣

. ~..

| NO.1 |

壹仔今年5岁，佢乐观、善良、体贴，佢嘅笑容好似阳光咁温暖，喺佢眼里面，所有嘢都係美好嘅，係个好得人中意嘅细孥。

我偷偷地同你讲个秘密啊，佢有个好特别嘅能力——只要係佢发过嘅好梦，最终都会成真。

我都知你唔会信嘎了，係真嘎！

| NO.2 |

壹仔日日早餐食太阳蛋食到佢怕晒，有一日晚黑，佢梦到佢餐盘度嘅嗰两只太阳蛋长咗对翼飞走咗。

谂唔到第日早上，妈妈捰住（即拿着）早餐出嚟嘅时候，畀蹠蹠（粤音：扎扎）跳嘅失魂狗火箭磕（粤拼：kik1）咗下，嗰两只太阳蛋真係好似长咗对翼咁飞咗出去，划出一条好优美嘅弧线，就好似喺空中跳紧美妙嘅华尔兹。

| NO.3 |

有一次，佢梦到火箭搂住件红色披风，好似超人咁，打赢咗隔离屋嗰只成日“虾”（意为欺负，借音字，古越音无本字）佢嘅、叫做饼干嘅波斯猫。

第日中午，佢见到火箭同饼干又喺走廊度打交，饼干嘅女主人喺旁边腾（粤拼tang4，本字为冫質，意为身体因寒冷或恐惧而不自主的抖动）晒鸡咁隔开佢哋。一个唔觉意，佢围住嘅嗰条红色丝巾跌咗落嚟，啱好冚住打到一堆𨀤（意为杂乱无章地堆在一起）嘅火箭同饼干。

过咗一阵，火箭从红色丝巾里面鑽咗个头出嚟，佢揼到条脷好长，露出招牌式嘅傻笑，笑到对眼弯弯咁，一睇就知佢打赢咗。

嗰一刻，佢真係十足十搂住红色披风、威风凛凛嘅superman。

| NO.4 |

又有一次，佢梦到自己拥有一粒用佢个名嚟命名嘅小行星。

几日之后，佢同爸爸玩击球游戏，嗰一棍，佢打到个棒球冇雷公咁远，远到连影都见唔到。

佢相信，嗰个球已经飞到太空，成为一粒叫做壹仔嘅行星。

| NO.5 |

仲有一次，佢梦到条腰好似㨢（粤拼lang3，疑为百越遗音，未能考出本字）住两个水抱、成日话要减肥嘅妈妈，变成一个瓜子口面、身材窈窕嘅靓靓阿姨。

佢醒咗之后，即刻跳落床，静静鸡咁跑到爸爸妈妈间房度䁓（粤音：装，意为窥视）。佢见到妈妈嘅脸饼仲係好似十五嘅月亮咁圆先至放心，鑽返入被窦度继续瞓觉。

佢谂，呢个果然唔係好梦——如果妈妈变咗样，就唔係妈妈了！我仲（本字为重）係中意妈妈原来个样。

就靠佢呢个“美梦成真”嘅本事，壹仔一直都係无忧无虑嘅，对于读小学嘅事，佢都从来冇紧张过、担心过。不过，就喺佢读小学嘅第一日，佢终于感受到人生中嘅第一次困惑。

| NO.6 |

壹仔嘅隔离位係一个高高大大嘅男仔，叫阿力。

壹仔同佢打招呼，点知佢唔瞅唔睬，壹仔以为佢心情唔好，冇为意。落课嘅时候，壹仔畀佢磕咗脚，壹仔觉得佢肯定係唔觉意嘅，冇摆喺心度。做早操嗰阵，佢又喺壹仔背后搈（粤拼ung2）咗下，壹仔拧转头问：“你叫我啊？”“叫你？”佢擘大口好夸张咁笑，笑到个下巴都就嚟甩了。

壹仔先至感觉到，阿力好似唔锺意佢，但係佢点谂都谂唔明，点解会有人喺第一次见面嘅时候就讨厌另外一个人嘅呢？

从嗰日开始，佢就成日畀阿力整蛊。

佢包到好靓嘅牛皮纸书套，会畀人画到花哩碌（本字为华历录）；佢个书包会莫名其妙出现喺厕所度；佢水壶里面嘅水会畀人滴咗辣椒油……

佢知道呢啲嘢都係阿力做嘅，但係佢从来都唔敢出声，佢怕一讲出嚟，会畀阿力报复得更加犀利。

壹仔嘅笑容越嚟越少了。

| NO.7 |

有一晚，佢梦到阿力趷下趷下咁返学，令佢第一次觉得阿力冇咁得人惊。

第二日，阿力真係趷下趷下咁行路，原来，係因为佢贪得意滥得敕，见到只大狗趴喺度休息，就走去踩狗尾，被嗰只大狗追咗九条街，一唔小心㩉到瘫瘫腰，仲扭亲只脚添。

只有壹仔知道，阿力拗柴其实係佢嗰个梦嘅作用。见到阿力个样咁狼狈，壹仔黯哑底（意为暗自）有啲开心，佢嘅嘴角唔经唔觉就向上翘了。阿力见到佢喺度偷笑，倔咗佢一眼。

冇几耐，壹仔发现，妈妈送畀佢嘅嗰支好靓嘅新铅笔，畀人拗成两截。

| NO.8 |

嗰日晚黑，佢又梦到阿力唔知点解直不甩咁瘫低。

几日之后，阿力喺操场笑一个高年级嘅学生打篮球屎波，就即刻食咗个波饼，当场晕低，听讲仲受咗轻微嘅脑震荡，因为咁，佢请咗两个礼拜嘅病假。

冇阿力喺度嘅嗰两个礼拜，壹仔觉得轻松咗好多，但同时，佢又有少少内疚。佢唔知道如果自己再梦到阿力发生乜更严重嘅事，应该点办。虽然佢好怕阿力，但係佢更加怕阿力因为佢而遇到乜嘢唔好嘅意外！

| NO.9 |

两个礼拜之后，阿力又返嚟了。

佢一坐低，就挨埋壹仔度，细细声问：“点啊，我唔喺度，你係唔係好开心呢？”“唔係啊！”“哼！”阿力冷笑咗声，冇再讲嘢。下午课间休息嗰阵，壹仔打开个笔盒，见到有只死曱甴喺度。佢最怕曱甴嘎了，当场吓到呆晒。

阿力见壹仔冇反应，又用水壶整湿壹仔嘅裤裆，然后大声嗌：“大家快啲睇，壹仔畀只死曱甴吓到濑尿啊！”听到全班同学嘅笑声，壹仔先反应过嚟，喊住跑出课室。

老师追问壹仔发生乜事，壹仔偷偷望咗阿力一眼，搏命咬住嘴唇，撒手兼拧头，乜都唔肯讲。

| NO.10 |

嗰日晚黑，壹仔梦到一部飞车冲埋阿力度，佢想叫阿力避开，但係佢点嗌都嗌唔出声。

眼睇住就嚟撞到了，佢即刻眯埋眼唔敢再睇。佢想逃走，佢要离开呢度，佢唔可以睇到嗰一幕！突然间，佢觉得自己变到好轻，轻到飘咗起嚟。佢擘大眼一睇，佢已经飞咗上天，好似棉花糖咁嘅云絮喺佢身边飘过，佢竟然变成咗一只纸鹞。佢望落去，地面已经离佢好远好远，远到佢乜都睇唔清楚。

佢醒返之后，呴（粤音：唞）咗啖大气。忽然，一阵大风吹埋嚟，将佢扯埋一边，佢先至发现，自己竟然瞓喺一望无际蔚蓝色嘅“床垫”上面——佢真係变成咗一只纸鹞，而且，唔知会畀嗰阵风吹去边度……

壹仔嘅梦仲未完

欲知后事如何

且听下回分解啦～

▎原创声明

语音编录、文案撰写 

/

“Eng咕咕猪”大力啤啤&啤啤夫

文案校对  |  刘晓刚

粤字书法  |  黄东波

漫画创作  |  梁嘉欣

版面设计  |  龙顺珊

责任编辑  |  崔毅

▎原文链接

https://mp.weixin.qq.com/s/QJcEJz0VbGlIsQQ2Kt5pjQ

本文为广韵刘声原创内容，未经允许不得转载，多谢合作！