....... ཁ་ནང་ལ་འཁོར་ནས་ལབ་པ།........
འཇམ.ཨརུ་ནག་པོ
མཚན་མོ་མུན་ནག་ཡིན་པའི་འཐད་ལུགས་དེ་འགྲིག་ཀྱང་།།
འུག་པར་འཇིག་རྟེན་གསལ་བོར་སྣང་བ་ཡང་མི་རྫུན།།
གཅིག་དང་ཀུན་གྱི་མཐོང་སྣང་གཅིག་གྱུར་དེ་དཀོན་པས།།
ཚད་ཤིང་གཅིག་གི་ཚད་མར་བསྒྲུབས་ཚུལ་དེར་དཔྱད་དགོས།།
དྲི་མེད་རིགས་པ་དྲང་བའི་རང་བཞིན་དེ་བརྗོད་ན།།
ྖངེས་དོན་ཆོས་ཀྱི་སྙིང་བོར་མི་རིང་བར་འདོད་ཀྱང་།།
རེ་དོགས་རླུང་གི་བསྐྱོད་པའི་རང་སེམས་ལ་བལྟས་ན།།
ཀུན་ཤེས་སྣང་བ་ཆུ་ནང་ཟླ་བ་ལས་མ་འདས།།
མཐའ་དབུས་གཞལ་དཀའི་ཤེས་བྱའི་མཁའ་ལམ་གྱི་ཁྱོན་ནི།།
ལྡིང་སྐོར་གཅིག་གིས་འཇལ་བ་མི་སྲིད་པར་སྣང་ཡང་།།
རང་ཉིད་འདབས་ཆགས་ཡིན་པས་དྲན་རྟོགས་ཀྱི་ངོས་ནས།།
གཤོག་ཟུང་མཐོང་ལ་གཏད་པའི་རྟ་གོན་དེ་ནོར་མེད།།
ཁྱོད་ལ་བབས་སོ་བརྟན་པའི་གཏད་སོ་ཞིག་མེད་ན།།
འགྱུར་བའི་ཀླུང་ཆེན་དཀྱིལ་གྱི་གྲུ་ཆུང་ཞིག་ནང་བཞིན།།
སྣང་ངོར་གྲུ་ཁེམ་ལག་ཏུ་ཡོད་ཡོད་ལྟར་སྣང་ཡང་།།
རྒྱུ་བའི་ཁ་ཕྱོགས་དེ་ཡི་རང་དབང་ན་མི་འདུག།
གནས་བ་མཐོང་དགོས་ཡལ་བའི་རྒྱུ་མཚན་ཡང་འཚོལ་དགོས།།
བདེན་པ་འཛིན་དགོས་རྫུན་གྱི་ཕུ་ཐག་ཡང་སྙེད་དགོས།།
འགྱུར་བ་བསྒྱུར་ན་ཆོག་པའི་བརྒྱུད་རིམ་དེ་བསྐྲུན་པའི།།
ཆོས་ཉིད་མ་མའི་ལག་གི་སྡེ་མིག་དེ་ལོན་དགོས།།
