2024-10-10

༡:ལན། སློབ་དཔོན་ཐོན་མི་ནི་དུས་རབས་བདུན་པའི་དུས་སྟོད་དུ་འཁྲུངས་ཤིང་བོད་རྒྱལ་སྲོང་བཙན་སྒམ་པོའི་བློན་པོ་ཡིན་པ་དང་ཁོང་གིས་མཛད་པའི་བསྟན་བཅོས་བརྒྱད་ནི་ཐོན་མིའི་མདོ་རྩིས་སྒྲ་མདོ།སུམ་ཅུ་བ། རྟགས་འཇུག  ཀ་མད་སུམ་ཅུར་བསྒྱུར་བ། ཀླུ་དབང་མགུལ་རྒྱན། སྔགས་བཀླགས་ཐབས་མུན་པའི་སྒྲོན་མེ། སྡེབ་སྦྱོར་སྒྲིག་པའི་གཞི་མ། ཡི་གེའི་རྣམ་འགྱུར་གྱི་བཟོ་བཅས་ཡིན།

༢:ལན། རྒྱ་གར་གྱི་གསལ་བྱེད་སོ་བཞི་ནི། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ཀྵ། བཅས་ཡིན་ལ། དེ་དག་ལས་བོད་ལ་མཁོ་བའི་ཡི་གེ་ཀ་ཁ་ག་ང་། ཙ་ཚ་ཛ་ཉ། ཏ་ཐ་ད་ན། པ་ཕ་བ་མ། ཡ་ར་ལ་ཝ། ཤ་ཧ་ས་བཅས་བླངས།

༣:ལན། ཁོང་གིས་རྒྱ་གར་གྱི་དབྱངས་ཡིག་བཅུ་དྲུག་ལས་བོད་ལ་མི་མཁོ་བའི་དབྱངས་ཡིག་ཨཱ་ཨཱི་ཨཱུ་ཨཻ་ཨཽ་ཨཾ་ཨ༔་རྀ་རཱྀ་ལྀ་ལཱྀ་རྣམས་དོར་ཞིང་། གསར་དུ་བསྣན་པའི་ཡི་གེ་དག་ནི་སྟོད་དུ་ཅ་ཆ་ཇ་གསུམ་དང་སྨད་དུ་ཞ་ཟ་འ་གསུམ་བཅས་དྲུག་ཡིན།

༤:ལན། མིང་ཚིག་གཉིས་ཀྱི་རྩོམ་གཞིར་གྱུར་བའི་སྐད་ཀྱི་གདངས་དེ་ལ་ཡི་གེ་ཟེར་ཞིང་། ཡི་གེ་སྐྱེ་བའི་རྒྱུ་བཞི་ནི་གནས།བྱེད་པ།རླུང་། རྣམ་པར་རྟོག་པ་བཅས་བཞིའོ།

༥:ལན། ང་རོའི་རྣམ་པ་ཅན་གྱི་ཆ་ནས་བཞག་པའི་ཡི་གེ་དེ་དབྱངས་དང་། རང་གྲོགས་དབྱངས་དང་སྦྱར་ནས་རང་གི་བརྗོད་དོན་གསལ་བར་བྱེད་པ་གསལ་བྱེད་ཀྱི་དོན་ནོ།བོད་ཀྱི་ཡི་གེ་ཡིན་ན་དབྱངས་གསལ་གཉིས་གང་རུང་ཡིན་པས་མ་ཁྱབ་སྟེ་སྤྱི་ཞེས་བརྗོད་པའི་སྒྲ་ལྟ་བུའོ།

༦:མིང་གཞིའི་ཡི་གེའི་སྔོན་དུ་འཇུག་པས་ན་སྔོན་འཇུག་དང་། མིང་གཞིའི་ཡི་གེའི་རྗེས་སུ་འཇུག་པས་ན་རྗེས་འཇུག་ཟེར་ཞིང་། སྔོན་རྗེས་གཉིས་མིང་གཞི་ལ་འཇུག་པ་ཁྱབ་ཆེ་ཆུང་ཡོད།

༧:ལན། དེ་གཉིས་རྗེས་འཇུག་གི་རྗེས་སུ་སྦྱར་ཚེ་མིང་དེ་ཉིད་སྒྲ་གདངས་དྲག་པར་འགྱུར་བས་ན་ད་དྲག་དང་ས་དྲག་ཟེར་ཞིང་། དེ་གཉིས་ལས་ཡང་འཇུག་ད་ནི་རྗེས་འཇུག་ན་ར་ལ་གསུམ་དང་ས་ནི་རྗེས་འཇུག་ག་ང་བ་མ་བཞིའི་རྗེས་སུ་འཇུག

༨:ལན། ད་དྲག་ཡོད་མེད་ཀྱིས་དུས་གསུམ་སྐུལ་ཚིག་དང་སྒྲ་གདངས་ལ་འགྱུར་བ་ཆེར་མེད་པས་དོར་ལ། ས་དྲག་ཡོད་མེད་ཀྱིས་སྒྲ་གདངས་དང་མིང་རང་ངོས་ནས་འགྱུར་བ་ཆེ་ཕྱིར་མ་དོར་རོ།།

༩:ལན། སི་ཏུ་པཎ་ཆེན་གྱིས་གཞུང་འདི་ལ་ཤོ་ལོ་ཀ་སུམ་ཅུ་ཡོད་པས་ན་སུམ་ཅུ་བ་ཞེས་ཟེར་ཞིང་། པྲ་ཏི་རིན་པོ་ཆེས་ཀཱ་ལི་སུམ་ཅུའི་སྦྱོར་བ་རྒྱ་ཆེར་སྟོན་པས་ན་སུམ་ཅུ་བ་ཞེས་བཏགས་པར་འདོད་དོ།

༡༠:ལན། ཆོས་གཉིས་མ་འདྲེས་པར་སོ་སོར་འབྱེད་པར་བྱེད་པའི་སྒྲའི་ཆ་ཤས་སམ་ཚིག་ཕྲད་ཅིག་ལ་རྣམ་དབྱེ་ཞེས་ཟེར་ཞིང་། བོད་ཀྱི་རྣམ་དབྱེ་བརྒྱད་ནི། ༡ངོ་བོ་ཙམ་སྟོན་པ།༢ལས་སུ་བྱ་བ། ༣བྱེད་པ།༤དགོས་ཆེད། ༥འབྱུང་ཁུངས། ༦འབྲེལ་སྒྲ། ༧གནས་གཞི། ༨འབོད་སྒྲ་བཅས་སོ།

༡༡:ལན། དོན་གྱི་ངོ་བོ་ཙམ་བརྗོད་པས་ན་རྣམ་དབྱེ་དང་པོ་ཟེར་ཞིང་། མིང་ཡིན་ན་དོན་གྱི་ངོ་བོ་ཙམ་སྟོན་པས་མ་ཁྱབ་སྟེ། ཉི་མའི་འོད་ཟེར་ཞེས་བརྗོད་པའི་སྒྲ་ལྟ་བུ་མིང་ཡིན་ཡང་དོན་གྱི་ངོ་བོ་དང་ཁྱད་པར་སྦྱར་ནས་སྟོན་པའི་སྒྲ་ཡིན་པའི་ཕྱིར་རོ།།

༡༢:ལན། དོན་གྱི་ངོ་བོ་ཙམ་སྟོན་པའི་སྒྲ་ལ་མིང་དང་།དོན་གྱི་ངོ་བོ་དང་ཁྱད་པར་སྦྱར་ནས་སྟོན་པའི་སྒྲ་ལ་ཚིག་ཟེར་ཞིང་།མིང་ཚིག་གཉིས་མི་འགལ་ཏེ་སྒྲ་མི་རྟག་ཅེས་བརྗོད་པའི་སྒྲ་དེ་གཉིས་ཀ་ཡིན་པའི་ཕྱིར་རོ།།

༡༣:ལན། དངོས་མིང་འདོད་རྒྱལ་ནི་རྒྱུ་མཚན་མེད་པར་ཡུལ་དེ་ལ་ཐོག་མར་འདོད་པ་ཙམ་གྱིས་བརྡ་སྦྱར་བ་ཡུལ་དེའི་མིང་དུ་ཆགས་པ་འདོད་པ་ལྟར་རྒྱལ་བར་གྱུར་པས་དངོས་མིང་འདོད་རྒྱལ་དང་བཏགས་མིང་རྗེས་གྲུབ་ནི་འདྲ་འབྲེལ་རྒྱུ་མཚན་དུ་བྱས་ནས་དོན་དེ་ལ་ཕྱིས་སུ་བརྡ་སྦྱར་བའི་མིང་ལ་ཟེར་ཞིང་། དཔེར་བརྗོད་རིམ་བཞིན། ཀ་བ་ཞེས་བརྗོད་པའི་སྒྲ་དང་། མི་སྟོབས་ཅན་ལ་སེང་གེ་ཞེས་བརྗོད་པའི་སྒྲ་ལྟ་བུའོ།།

༡༤:ལན། རྫོགས་ཚིག་གི་མིང་གཞན་སླར་སྡུད་ཅེས་པ་ནི་རང་གི་རྗེས་དེ་མ་ཐག་ཏུ་རང་གི་ཚིག་གྲོགས་འབྱུང་བ་སྡུད་པའམ་མི་འབྱུང་བར་བྱས་པས་ན་སླར་སྡུད་དང་།རང་གི་མཇུག་དེ་མ་ཐག་ཏུ་ཚིག་རང་གི་ཟླ་བོའམ་གྲོགས་པོ་འབྱུང་བ་བསྡུས་པའམ་མི་འབྱུང་བར་བྱས་པ་ན་ཟླ་སྡུད་ཅེས་ཟེར།

༡༥:ལན། ལ་དོན་གྱི་ཕྲད་བདུན་ལས་རང་དབང་ཅན་གྱི་ཕྲད་གཉིས་ཡོད་པ་དང་། ཕྲད་བདུན་པོའི་ཚབ་ཏུ་ཕལ་ཆེར་ལ་གཅིག་པུ་འཇུག་པས་ན་ལ་དོན་ཞེས་ཟེར་ཞིང་། ལ་དོན་གྱི་འཇུག་ཡུལ་ལ་རྣམ་དབྱེ་གཉིས་པ། བཞི་བ།བདུན་པ། དེ་ཉིད།ཚེ་སྐབས་བཅས་ལྔ་ཡོད།

༡༦:ལན། རྣམ་དབྱེ་སྦྱར་སའི་གཞི་དེ་ལ་བྱ་བ་ཞིག་བྱས་པའམ་བྱེད་པ་ཙམ་སྟོན་པ་རྣམ་དབྱེ་གཉིས་པ་དང་། རྣམ་དབྱེ་སྦྱར་སའི་གཞི་དེ་ལ་བྱ་བ་ཞིག་བྱས་པའམ་བྱེད་པ་ཙམ་སྟོན་པ་མ་ཡིན་པར་རྣམ་དབྱེ་སྦྱར་སའི་གཞི་དེའི་ཆེད་དུའམ་དོན་དུ་བྱ་བ་བྱས་པར་སྟོན་པ་ནི་རྣམ་དབྱེ་བཞི་བའོ།། དཔེར་བརྗོད་རིམ་བཞིན། ཡུལ་དབུས་སུ༷་སོང་། ཡོན་ཏན་ལོན་པ་རུ༷་བརྩོན་འགྲུས་བསྐྱེད་ལྟ་བུའོ།

༡༧:ལན། རྟ་ལ་དུག་བྱིན་ཞེས་པ་ནི་བྱ་བ་བྱེད་པ་ཙམ་སྟོན་པས་ན་རྣམ་དབྱེ་གཉིས་པ་དང་རྟ་ལ་རྩ་བྱིན་ཞེས་པ་ནི་རྣམ་དབྱེ་སྦྱར་སའི་གཞི་སྟེ་རྟའི་ཆེད་དུའམ་སླད་དུ་བྱ་བ་བྱས་པར་སྟོན་པས་རྣམ་དབྱེ་བཞི་བའོ།།

༡༨:ལན།མ་ཁྱབ་སྟེ། མེ་ཏོག་ལ༷་ཆུ་འདྲེན།ལྟ་བུའོ།

༡༩:ལན།རྣམ་དབྱེ་བདུན་པ་ནི་གཞི་ཞིག་ཏུ་ཆོས་གཞན་ཞིག་གནས་པ་སྟོན་པར་བྱེད་ཅིང་།ཚིག་ཕྲད་དེ་ཉིད་ནི་ལ་དོན་གྱི་ཚིག་ཕྲད་སྦྱར་ས་དེ་ཉིད་ཀྱི་ངོ་བོ་ཉིད་དུ་གྲུབ་པར་སྟོན་པས་དེ་ཉིད་ཅེས་བྱ་ཞིང་། རུ་བ་ཁ་མལ་ན་ཡོད་ཅེས་པ་དང་ནད་པ་ཁ་མལ་ན་ཡོད་ཅེས་པ་གཉིས་ལས་སྔ་མ་ནི་འབྲོག་པའི་རུ་བ་སྔར་གྱི་གཞི་དེར་ཡོད་པར་སྟོན་པས་གནས་གཞི་དང་ཕྱི་མ་ནད་པའི་ནད་ཀྱི་ངོ་བོ་འཕོ་འགྱུར་མ་བྱུང་བར་སྔར་གྱི་ངོ་བོར་གནས་ཡོད་པར་སྟོན་པས་དེ་ཉིད་ཡིན་ནོ།།

༢༠:ལན།

༢༡:ལན། ལོ་ལྔ་ལ༷་གྲུབ་འབྲས་མི་དམན་པ་ཞིག་གྲུབ།

༢༢:ལན། ཀྱི་སོགས་ལྔ་བོ་གང་རུང་ཡིན་ན་རྣམ་དབྱེ་དྲུག་པའི་ཕྲད་ཡིན་མི་དགོས་ཏེ་དེ་ལྟ་མོད་ཀྱི༷་ལྟ་བུ་མི་མཐུན་པའི་ཚིག་རྒྱན་ལ་འཇུག་པ་སོགས་དུ་མ་ཡོད་དོ།

༢༣:ལན། དེའི་དོན་ནི་ཚིགས་བཅད་ལྟ་བུའི་རིགས་ལ་ཚིག་གི་སྡེབ་མི་འཁྲུགས་པའི་ཕྱིར་ཏུ་རྣམ་དབྱེ་དྲུག་པའི་ཕྲད་འི་ལྟ་བུ་མིང་གཞིའི་རྗེས་སུ་མི་སྦྱོར་བར་ཕྲད་ཡི་སྦྱོར་དགོས་པའི་དོན་ཏེ་དཔེར་ན།བདག་གི་མ་ཡི༷་བྱམས་སེམས་ཆེ།། ལྟ་བུའོ།།

༢༤:ལན། རྣམ་དབྱེ་འདི་གཉིས་ཀྱི་ཕྲད་ལ་དབྱངས་ཨི་དང་ལྡན་པའི་རྒྱུ་མཚན་གྱིས་ཨི་ལྡན་གྱི་རྣམ་དབྱེ་ཟེར་ཞིང་། གསུམ་པའི་དཔེར་བརྗོད་ནི། ཡབ་ཀྱིས་གསུང་།ལྟ་བུ་དང་། དྲུག་པའི་དཔེར་བརྗོད་ནི། གངས་ཀྱི་སེང་གེ ལྟ་བུའོ།

༢༥:ལན། མིང་དང་དོན་གཞན་དང་འཕྲད་པ་ལ་མ་ལྟོས་པར་རང་སྟེང་ནས་བརྗོད་དོན་སྟོན་མི་ནུས་ཤིང་།དེ་དག་དང་འཕྲད་ན་བརྗོད་དོན་གསལ་བར་བྱེད་ནུས་པས་ཚིག་ཕྲད་ཅེས་བྱ་ཞིང་། རྣམ་དབྱེ་དང་ཚིག་ཕྲད་གཉིས་ལ་ཡིན་མིན་གྱི་མུ་བཞི་ཡོད་དེ། ༡བུམ་པ་ཞེས་བརྗོད་པའི་སྒྲ་ལྟ་བུ།༢ ད༷ང་སྒྲ་ལྟ་བུ། ༣གསེར་གྱི་བུམ་པ་ཞེས་པའི་ཚིག་ཟུར་གྱི་གྱི༷་ལྟ་བུ།༤ཀ་བ་ལྟ་བུ།

༢༦:ལན། སྡོམ་ཚིག་ནི། ག་ད་བ་ས་ད་དྲག་མཐར།། ཀྱང་ཐོབ་ང་ན་མ་ལ་རའི།། མཐའ་རུ་ཡང་ནི་སྦྱོར་བ་སྟེ།། རྗེས་འཇུག་མེད་དང་འ་ཡི་མཐར།། འང་དང་ཡང་གཉིས་ཅི་རིགས་སྦྱོར།། ཞེས་པ་དང་། མཐུན་པའི་ཚིག་རྒྱན་ནི་མཛེས་ཀྱང་མཛེས།ལྟ་བུ། མི་མཐུན་པའི་ཚིག་རྒྱན་ནི་ཕྱུག་ཀྱང་སེར་སྣ་ཆེ།ལྟ་བུ།

༢༧:ལན། རྒྱན་སྡུད་ནི་རྣམ་དབྱེ་གསུམ་པ་དང་དྲུག་པའི་ཡི་གེའི་སྦྱོར་ཚུལ་ལས་འཕྲོས།

༢༨:ལན། འདི་གཉིས་མི་འདྲ་སྟེ། སྤྱིར་ལྷག་བཅས་ནི་ཚིག་དོན་གཉིས་ཀའམ་གང་རུང་གི་ལྷག་མ་འདྲེན་པ་ཞིག་དགོས་ལ་དེ་སྒྲ་དོན་དགུ་ལ་འཇུག་པའི་ལྷག་བཅས་ནི་རྗོད་བྱེད་ཚིག་གི་ལྷག་མ་ཙམ་འདྲེན་པ་ཡིན་པས་མི་འདྲའོ།

༢༩:ལན། ལྷག་བཅས་ཀྱི་ཕྲད་ནི་ཏེ་དེ་སྟེ་ལ་ནས་་བཅས་ལྔ་ཡིན་ཞིང་། ལྷག་བཅས་ལ་དབྱེ་ན་མཚམས་སྦྱོར་བའི་ལྷག་བཅས། དམ་བཅའ་བའི་ལྷག་བཅས། གཞན་འདྲེན་པའི་ལྷག་བཅས་བཅས་གསུམ་ཡོད། རིམ་ཅན་དུ་མཚམས་སྦྱོར་བའི་ལྷག་བཅས་ནི་ཕྱག་འཚལ་ཏེ་བཤད། ལྟ་བུ་དང་། ཅིག་ཅར་དུ་མཚམས་སྦྱོར་བའི་ལྷག་བཅས་ནི་མདའ་འཕངས་ཏེ་ཕོག ལྟ་བུའོ།

༣༠:ལན། འབྱེད་སྡུད་སྐབས་ཀྱི་སྡུད་པ་ལ་དབྱེ་ན་གསུམ་ཡོད་པ་དང་། ཕྱོགས་གཅིག་ཏུ་སྡུད་པ་ནི་དཔེར་ན་དཀར་པོའམ།སེར་པོའམ།དམར་པོའམ།སྔོན་པོ་ནི་རྩ་བའི་ཁ་དོག་གོ། ལྟ་བུ་དང་།སྔ་མར་སྦྱར་བའི་ཆོས་ཕྱི་མར་སྡུད་པ་ནི་དཔེར་ན། དཀར་པོ་ནི་རྩ་བའི་ཁ་དོག་སྟེ། དམར་པོའམ།སེར་པོའམ།སྔོན་པོ་ཡང་ངོ་།ལྟ་བུ། ཕྱི་མར་སྦྱར་བའི་ཆོས་སྔ་མར་སྡུད་པ། དཀར་པོའམ།སེར་པོའམ། དམར་པོ་འམ། སྔོན་པོ་ཡང་རྩ་བའི་ཁ་དོག་གོ། ཞེས་པ་ལྟ་བུ།