当历史个迭艘车轮驶入到今早仔个辰光，如果讲，勒今早仔要是依旧有人还勒去提及关于“书写书信”迭桩事体，吾认为恐怕就是属于邪气遥远个一桩事体哩。还或许，对于那些出生于90后搭00后个年轻一代人唻讲，伊本人未必就会去理解、并明白“书写书信”到底会是哪能个一回事体唻，侬本人是勒讲笑话、逗吾伲白相吗？！
今早仔个国人，几乎可以讲是“覅怎么去书写书信”哦，就算是走过几年、几十年，未必侪会去动笔书写一封书信个，“书写书信”迭桩事体，或者讲对于“各类信件”而言，可以“通通拨放置到博物馆”里向去，“书写书信”也可以拨归类到“一个老古董级别”个行列当中去，勒今早仔，去“书写书信”绝对是属于无人问津个。
即便是“书写书信”迭桩事体，绝对是属于无人问津个，但也并非表示一眼侪呒没、“侪是拨消亡忒”，多多少少还是有那么一眼眼个哩。勒今早仔，书写书信顶顶多个人恐怕就是－－只剩下那些交关热爱集邮个一群人士，勒拉迭些人个身浪向，多多少少还会有书写书信迭种习惯，迭能做个目的是拨那些志同道合个集邮爱好者们邮寄各类邮资封片、实寄封搭实寄原地封等各类搭集邮有关个收藏品。
大家侪需要晓得迭能个一桩事体哦，“书写书信”迭桩事体，伊到底是拨啥人打败忒个呢？！伊就是拨固定电话打败忒个，伊也覅是一下子拨打败个，而是一眼一眼、慢慢较拨打败忒个，吾是一个土生土长个上海人，像吾所在个城市上海－－记得就是自从20世纪个90年代中期以后，几乎每家人家侪去普及并安装上固定电话，也就是从迭一刻开始起，大家侪是覅哪能去通过书写书信往唻，一旦彼此之间拥有啥个紧要个事体个辰光，就直接拨打对方个固定电话联系。
还尤其是当每户人家侪广泛个普及并拥有至少一台电脑以后，以及人人手里侪至少有一部智能手机个辰光，去书写书信迭桩事体，就好像是个出土文物搭老古董似个，简直就是寥寥无几无人问津！
既然是讲到关于“书写书信”迭桩事体，就覅得覅唻讲一讲自家，个人第一趟去书写书信时，就是勒自家读小学五年级个辰光哩！
吾至今为止依旧还能够清清爽爽个去记得迭能个一桩事体，吾读五至六年级个辰光，班主任就是郭燕楠先生（女），伊是专门教授国文课程个，而且伊告诉全班同学“书写书信”还是属于一门必修课程哩，大家侪要去学会书写书信个，郭燕楠先生接连花费两节国文课个辰光，【备注：勒掰时每一节课程是40分钟。】侪初步教会全班六十位同学，如何侪能正确个去书写好各类书信，覅会书写还真个覅唻三，一定要全班同学侪要去学会书写书信，至于书信里向个内容到底有啥么事，郭燕楠先生未去做硬性个规定，包罗万象啥个侪可以去书写个，即便是迭能，还是拨过两个硬性规定。第一就是：从头到尾一定要符合书信个格式搭规定，哪怕是错一眼眼、一个标点符号有使用错误也侪是覅唻三，一旦有书写错误个地方，就要重新去撰写一遍，还要一遍又一遍个去撰写，直至书写书信个人完完全全个书写正确为止；第尼就是：伊还规定书写书信个对象，坚决覅能去写拨生活勒自己周遭、距离本人屋里附近个亲朋好友，而是要书写拨一些距离自家屋里较远一眼个某位亲朋好友，还要拨所撰写个书信邮寄拨迭位亲朋好友。
勒掰搿辰光，伊还对吾伲全班六十位同学谆谆告诫道：“去书写书信，是做人一个顶顶基本个生存技能之一哦，要是倷侪是去学会书写书信以后，在以后个日脚里向，要想搭远方个亲朋好友联系联系，就要方便许多个，就勒倷今后个成长道路浪，也必然是离覅开书写书信迭桩事体个！等到倷长大成人大学毕业之后，开始要去寻找工作，讲覅定就能派上用场，求职个辰光也会去书写书信个。反正就是，需要通过书写书信往唻个地方还多着呢？！”……没曾料想到个事体就是－－等到辰光走过二三十年以后，关于书写书信迭桩事体，已覅再是个人个基本生存技能之一，今早仔基本浪已覅再去书写书信！
今早仔吾仍然还能清爽个去记得，班级里那些领悟能力交关强个、学习成绩邪气好个、又是较为聪明个同学，只有花费一个礼拜个辰光，就完完全全书写好、书写正确并且拨书信邮寄出去勒。由于吾搭班级里向那些稍稍愚笨一眼个同学，花费三个礼拜个辰光，侪完完全全书写好、书写正确并邮寄出去哦，勒掰时市内寄信个价钿是贰角。
吾个迭封书信是邮寄拨掰时距离自家屋里有十五六公里之远个尼姨妈倪榴英屋里，掰时个尼姨妈一个字也是覅认得个，只能拨书信写拨尼表姐沈清，只因伊拉家距离外公倪根生外婆张榴妹个家只间隔一条马路之远，走路过去顶多也只有1.5公里左右，书信里面个内容是讲：尼姨妈个吾里距离外公搭外婆家是顶近个，外公外婆两位老人身体覅是顶顶好，希望伊拉一家人拥有空闲个辰光，能多多个去探望两位老人、去照顾一下两位老人，事后表姐还对吾讲道：“收到侬个书信，真个为侬感到高兴覅已，侬已经长大，也会去书写书信！”……
话既然是讲到关于书写书信迭桩事体，就覅得覅去讲一讲吾个小学同班女同学周漪，勒掰搿辰光个吾是居住勒浦东郊区高桥古镇。等到吾伲也学会书写书信个第尼年，也就是升级到六年级个辰光，大家侪发现班级里向唯独就缺少一位女同学周漪，大家侪勒纷纷猜测议论纷纷周漪为啥就覅唻上学啊？！面对大家侪勒猜疑周漪女同学为啥就呒没唻上课个辰光，班主任郭燕楠先生就对吾伲全班同学唻讲道：“周漪同学个爷娘因为工作个需要，已经举家搬迁到市区里向去工作，伊个屋里亦是呒没亲朋好友唻照顾周漪同学个，所以伊只能搭爷娘一道去市区，伊只好到市区里向去读书，以后再也覅会回唻！”……
没想到个一桩事体就是－－等到辰光过一个号头以后，周漪女同学居然拨全班同学写唻一封书信，还讲自家近抢把个状况，一共书写有三四页纸之多哩，伊勒书信里向讲道：“自家所就读个学堂是一个普通个中学，还拨分配到顶普通个预备班级里向，近抢把上课邪气繁忙，作业也是交关多，吾是勒忙里偷闲当中，抽出辰光拨老师以及全班同学书写书信，呒没及时书写书信敬请老师搭同学个谅解！并且还讲到交关想念曾经一道读书个同学们。还要是今后拥有空闲个辰光以后，还会继续去写书信告知同学‘吾’近抢把各种情况！”……
伊勒书信里向还讲道：“就是勒近抢把，学校勒全年级预备班组还有过一趟各类学科个摸底考试，伊呒没去辜负郭燕楠先生临走前对伊殷切个期望，经过自家覅懈努力以后，其中语文考试获得个成绩是72分，还是班级里向个第一名，勒全年级组获得第二名！”……
对于周漪女同学个唻信，班主任搭吾伲全班同学也是感到万分个高兴欣喜万分哩，大家也侪是乐开花。拨过，勒掰时就有两条内容侪是搞覅懂个，伊为啥也只有考72分，就能是班级第一名全年级组第二名，还为啥呒没去就读六年级，而是去某个中学就读预备班啊！
1993年7月份吾家搬迁，距离外公外婆个家是交关近个，也就勒三四公里左右，走路个闲话顶多也就勒二十分钟左右，距离尼姨妈个吾里也同样覅是邪气远，所以也就覅去拨尼姨妈屋里书写书信。
虽讲自家个家已搬迁，但每间隔一段辰光，还会拨自家顶顶要好个发小小学同学朱天翔、葛群搭程大地会去书写书信个，讲讲自家个近况到底是哪能个，每年还会拨伊拉去邮寄新年贺卡，书写一些祝福个闲话，也只是书写到自家中专毕业之前。从大学专科到本科期间，每年临近春节前头，会拨求学期间结交个、顶要好个友人以及班主任邮寄新年邮资贺卡抽奖明信片，连续邮寄交关长一段辰光！……
顶顶值得去尊敬个一位长者还是要属父亲亦师亦友个老同事顾绍其老伯伯，伊本人个年龄比家父要大二十岁左右哩，是为啥呢？！只因为当全国侪去普及电话搭电脑拨亲朋好友拜年个辰光，伊每年侪会书写书信拨家父拜年，每年还会作新诗一首，年年侪是迭能个！
想问一问各位朋友们，倷今早仔是否还有写信迭个习惯？！再想去问一句，近抢把是否有去写过信？！写信迭桩事体还会吗？！
要是勒家中还留存有书信，既覅管里向个内容有啥个、是好还是坏，千万覅要拨伊当作废品，去丢忒伊、并拨伊扔到垃圾箱，那是值得去拥有搭珍藏个老古董！伊包含过往个种种经历，亦包括个人个历史、个人个情感之旅，以及以往发生个各类人事物情勒里向……
若是留存有书信个闲话，还若是保存得当，既可以留拨自家个下一代人，还可以一代接一代个流传下去；既能让后辈们了解到伊拉个上一辈人到底是属于哪能个人、会去经历哪能个个人历史、情感搭各类人事物情……从而能让晚辈对上一辈人多少能有一份认知搭了解，等到上一辈人侪故去以后，还能让后辈们多一份念想搭怀念哦！
【备注：①：文章为作者原创；②：各种书信类图片侪是唻源于网络上头；③：万分感谢原创图片。】
杜老倌侠客居（陆伟）写于2020年05月26日礼拜二夜里向
