我小辰光最欢喜的事体就是到外婆屋里去白相。
阿拉外婆是个旧时代的女性，头高头挽了个发髻，裹了个小脚，走起路来颠发颠发，我牢怕伊会得摔跤。外婆人缘吓好，弄堂里叫伊22号阿娘，有啥好吃个么事，伊会得一家一家分享。
一到放假阿拉就吵了要到外婆屋里去。这个辰光到上海去要坐船个，十六埔码头上去再坐电车。记得刚刚上小学一年级，阿爸姆妈无没空送，我就带了阿弟阿妹，三个小鬼头就坐船到上海去，电话里讲好阿拉表哥到码头高头来接个，结果伊跑错特码头了，无没接着，还好阿拉三个小人记得外婆屋里的门牌，来勒好心人个帮助底下坐三轮车到了外婆屋里，外婆开心煞特了，告诉隔壁邻居讲：革三个小人牢聪明个，加许多路，又是坐船又是坐电车，寻着屋里了。
阿拉小个辰光，是七十年代，条件勿是牢好，么事牢少个，买啥么事都要票，还要排队，我就跟了阿姐去排队买小菜，买肉要排队，买豆腐要排队，有辰光两个人排勿过来，就用只篮头排队，前头人买好跑脱，后头个人会得帮侬篮头往前头踢过去艾，勿会插队。
外婆平常辰光牢节约个，阿拉几个小人去了，交关好吃个么事都拿出来拨阿拉吃。伊平常早上头吃泡饭酱瓜，阿拉去了伊就去买粢饭油条豆浆，到现在我也觉得粢饭油条豆浆是标配，粢饭里夹啥么事都无没夹油条好吃，因为这里厢有外婆个情结。。外婆是宁波人，伊做个宁波汤团交关好吃，咬一口，嘴巴里都是芝麻猪油个香味。外婆做个笋干烧肉也牢好吃个，到现在无没忘记特。我记忆当中小辰光吃过好吃个么事大多数都是外婆屋里吃石个。生煎包、小馄饨、敲扁橄榄、梳打饼干、麦乳精，交关交关，都是童年美好个记忆。
阿弟小辰光牢调皮个，四岁个辰光一个人瞎跑，跑得远了勿认得屋里了，来勒马路边廊哭，还好有个阿姨送伊到派出所，外婆急煞特了，穷哭啰，警察把弟弟送回来，外婆送了一面锦旗、一本语录本拨警察谢谢人家。
外婆带拨我个记忆牢多牢多个，几天几夜讲勿完。留了下趟再讲。
