གཞན་སེལ།
རྟགས་སྒྲུབ་པ་ནི་འདི་ནས་བཟུང་སྟེ་སྟོན་ལ་ཞེས་པའི་རྟགས་དང་འདི་སྒྲའི་བསྙེགས་ས་ངོས་འཛིན་རྒྱུ་མེད་པའི་ཕྱིར། མ་ཡིན་པར་ཐལ། དོན་གྱི་རང་གི་ངོ་བོ་གཅིག། ཞེས་པའི་གཞུང་འདིས་སྒྲ་ཡི་སྟེང་དུ་ཚད་མ་གཞན་དང་སྒྲ་གཞན་འཇུག་པར་སྒྲུབ་པ་ཡིན་ན་ཊིག་ཆེན་ལས་མི་དགོས་པར་གསུངས་པ་གཉིས་འགལ་མིན་དང་གྲངས་ཅན་སོགས་ཀྱིས་སྒྲ་རྟོག་སྒྲུབ་འཇུག་ཁས་ལེན་དགོས་པའི་རྒྱུ་མཚན་སོགས་གང་། མ་ཡིན་པར་ཐལ། འདིའི་སྐབས་ཀྱི་སེལ་འཇུག་གསར་སྒྲུབ་ཀྱི་སྦྱོར་བ་ཡོད་མེད་དང་སེལ་འཇུག་གི་དོན་སོགས་མེད་པའི་ཕྱིར། མ་ཡིན་པར་ཐལ། དེ་མིན་རྣམ་པར་བཅད་པའི་སྒོ་ནས་འཇུག་ཚུལ་དང་དགག་བྱ་དངོས་སུ་བཅད་པའི་སྒོ་ནས་འཇུག་ཚུལ་གཉིས་ལ་ཁྱད་པར་མེད་ཡོད་དང་དེ་གཉིས་ཀྱི་ཚད་སོ་སོ་ནས་མེད་པའི་ཕྱིར། དགག་བྱ་དངོས་སུ་བཅད་ནས་འཇུག་ཚུལ་སོགས་ཇི་བཞིན་བཞག་ན། འོ་ན་རྒྱང་ཕན་པའི་རྒྱུད་ཀྱི་ཐར་བ་མེད་པར་འཛིན་པའི་བློ་ཆོས་ཅན། དགག་བྱ་དངོས་སུ་བཅད་ནས་འཇུག་པའི་བློ་ཡིན་པར་ཐལ།འདོད་པའི་ཕྱིར། འདོད་ན། རང་རྒྱུད་ལྡན་གྱི་གང་ཟག་ལ་དགག་བྱ་ཤར་བ་སྔོན་དུ་སོང་བའི་སྟོབས་ཀྱིས་ཡུལ་ལ་འཇུག་པའི་བློ་ཡིན་པར་ཐལ། དགག་བྱ་དངོས་སུ་བཅད་པའི་སྒོ་ནས་ཡུལ་འཇུག་པའི་ཕྱིར། མ་ཁྱབ་ན་ཁྱབ་པར་ཐལ། གཞི་དེ་བློའི་ཡུལ་ལ་མ་ཤར་བར་གཞི་དེ་བཀག་པའི་བཀག་པ་བློའི་ཡུལ་ལ་ཤར་ཚུལ་མེད་པའི་ཕྱིར། དེར་ཐལ། སྤྱོད་འཇུག་ལས། བརྟགས་པའི་དངོས་ལ་མ་རེག་པར།། དེ་ཡི་དངོས་མེད་འཛིན་མ་ཡིན།། ཞེས་གསུངས་པའི་ཕྱིར་དང། གཞན་དགོངས་པ་རབ་གསལ་ལས། བརྟགས་པའི་དངོས་པོ་སྟེ་དགག་བྱའི་སྤྱི་ལེགས་པར་བློ་ལ་མ་ཤར་ན།དགག་བྱ་དེ་མེད་པ་ལེགས་པར་འཛིན་མི་ནུས་པར་གསུངས་པས། ཞེས་གསུངས་པའི་ཕྱིར། འདོད་ན། རྒྱང་ཕན་པ་ཆོས་ཅན། ཐར་པ་ཡོད་པ་བློའི་ཡུལ་ལ་ཤར་བའི་གང་ཟག་ཡིན་པར་ཐལ། དེའི་ཕྱིར། འདོད་ན། ཐར་བ་དང་ཐམས་ཅད་མཁྱེན་པ་སོགས་བློའི་ཡུལ་ལ་ཤར་པར་ཐལ། འདོད་པའི་ཕྱིར།འདོད་ན། སྟོང་ཉིད་ཡང་བློའི་ཡུལ་ལ་ཤར་པར་ཐལ། དེའི་རྒྱུད་ལ་སྟོང་ཉིད་མེད་འཛིན་ཡོད་པ་གང་ཞིག་་དེས་ཡང་དགག་བྱ་ཤར་བ་སྔོན་དུ་སོང་བའི་བློ་ཡིན་པའི་ཕྱིར། གཞན་ཡང་། དམ་བཅའ་རྒྱུད་ཀྱི་ཕྱི་དོན་མེད་པར་འཛིན་པའི་བློ་ཆོས་ཅན། རང་རྒྱུད་ལྡན་གྱི་གང་ཟག་ལ་དགག་བྱ་ཤར་བ་སྔོན་དུ་སོང་ནས་ཡུལ་ལ་འཇུག་པའི་བློ་ཡིན་པར་ཐལ། དགག་བྱ་བཅད་ནས་ཡུལ་ལ་འཇུག་པའི་བློ་ཡིན་པའི་ཕྱིར། འདོད་ན། དམ་བཅའ་བ་ཆོས་ཅན།སྟོང་ཉིད་ཀྱི་དགག་བྱ་བློ་ཡུལ་ལ་ཤར་བའི་གང་ཟག་ཡིན་པར་ཐལ། ཕྱི་རོལ་དོན་གྱིས་སྟོང་པའི་དགག་བྱ་བློ་ཡུལ་ལ་ཤར་པའི་གང་ཟག་ཡིན་པའི་ཕྱིར། འདོད་ན། སྟོང་ཉིད་ཀྱི་དགག་བྱ་ངོས་ཟིན་པར་ཐལ་ལོ། གོང་དུ་ཕྱི་དོན་མེད་པར་རྟོགས་པ་ལ་དགག་བྱ་ཤར་བ་སྔོན་དུ་འགྲོ་དགོས་ཀྱང་ཕྱི་དོན་མེད་པར་འཛིན་པ་ལ་དགག་བྱ་ཤར་བ་སྔོན་དུ་འགྲོ་མི་དགོས་ཟེར་ན། ཕྱི་དོན་མེད་པར་རྟོགས་པའི་བློ་ཆོས་ཅན། དགག་བྱ་ཤར་བ་སྔོན་དུ་སོང་པར་ཐལ། འདོད་པའི་ཕྱིར། འདོད་ན། ཕྱི་དོན་བློའི་ཡུལ་ལ་ཤར་ན་དགག་བྱ་བློའི་ཡུལ་ལ་ཤར་བའི་ཁྱབ་པར་ཐལ། འདོད་པའི་ཕྱིར། འདོད་ན། གྲངས་ཅན་པ་ཆོས་ཅན། དེར་ཐལ། དེའི་ཕྱིར། མ་གྲུབ་ན། གྲངས་ཅན་པ་ཆོས་ཅན། རང་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་གྲུབ་པ་བློའི་ཡུལ་ལ་ཤར་པའི་གང་ཟག་མ་ཡིན་པར་ཐལ་ལ། འདོད་ན། གྲངས་ཅན་པ་ཆོས་ཅན། རང་སྐྱ་བའི་བདག་བློའི་ཡུལ་ལ་ཤར་པའི་གང་ཟག་མ་ཡིན་པར་ཐལ། འདོད་ན། དེ་ཆོས་ཅན། རྟག་གཅིག་རང་དབང་ཅན་གྱི་བདག་བློའི་ཡུལ་དུ་ཤར་པའི་གང་ཟག་མ་ཡིན་པར་ཐལ།འདོད་ན། གྲངས་ཅན་པ་ཆོས་ཅན། རྟག་གཅིག་རང་དབང་པའི་བདག་བློའི་ཡུལ་དུ་ཤར་པའི་གང་ཟག་ཡིན་པར་ཐལ། ཕྱི་རོལ་པའི་རྩ་བའི་གྲུབ་མཐའ་བློའི་ཡུལ་དུ་ཤར་པའི་གང་ཟག་ཡིན་པའི་ཕྱིར། དེར་ཐལ། ཕྱི་རོལ་པའི་གྲུབ་མཐའ་ངོས་ཟིན་པའི་ཕྱིར། མ་གྲུབ་ན། དྲང་སྲོང་སེར་སྐྱས་རང་གི་གྲུབ་མཐའ་ངོས་མ་ཟིན་པར་ཐལ་ལོ། ཕྱི་དོན་ངོས་ཟིན་ན་དགག་བྱ་ཤར་མི་དགོས་ན་ཡང་དགག་བྱ་ཤར་ཚུལ་གང་། ཕྱི་དོན་དགག་བྱ་ཡིན་པ་ངོས་ཟིན་ཚུལ་ལ་སྦྱར་ན་ཡང་དེ་ངོས་ཟིན་ན་ཕྱི་དོན་མེད་པ་ངོས་ཟིན་འགྲོ་བའི་ཕྱིར། ་གོང་དུ་རྒྱང་ཕན་པའི་རྒྱུད་ཀྱི་ཐར་བ་མེད་པར་འཛིན་པའི་བློ་སོགས་རང་རྒྱུད་ལྡན་གྱི་གང་ཟག་ལ་དགག་བྱ་ཤར་བ་སྔོན་དུ་མ་སོང་ཟེར་ན། འོ་ན་ཐར་བ་བློ་ཡུལ་ལ་ཤར་བའི་གང་ཟག་ཡིན་ན་ཐར་བ་ཁས་ལེན་པས་ཁྱབ་པར་ཐལ། འདོད་པའི་ཕྱིར། འདོད་ན་དགག་བྱ་བློ་ཡུལ་ལ་ཤར་ན་དགག་བྱ་ཁས་ལེན་པས་ཁྱབ་པར་ཐལ། མ་ཁྱབ་སེམས་ཙམ་པ་ཆོས་ཅན་ཟེར་ན། འོ་ན་ཕྱི་དོན་དགག་བྱ་ཡིན་པ་བློ་ཡུལ་ལ་ཤར་ན་དགག་བྱ་བློ་ཡུལ་ལ་ཤར་བས་ཁྱབ་པར་ཐལ། འདོད་ན། གཞི་ཅིག་ཐར་བ་ཡིན་པ་བློ་ཡུལ་ལ་ཤར་ན་ཐར་བ་བློ་ཡུལ་ལ་ཤར་བས་ཁྱབ་པར་ཐལ། འདོད་ན། གྲངས་ཅན་ཆོས་ཅན། དེར་ཐལ། དེའི་ཕྱིར། འདོད་ན། དྲི་མ་སེམས་དང་འབྲེལ་རུང་ཡིན་པ་བློ་ཡུལ་ལ་ཤར་པར་ཐལ། ཐར་བ་བློ་ཡུལ་ལ་ཤར་པའི་ཕྱིར། འདོད་མི་ནུས་ཏེ། དྲི་མ་སེམས་དང་འབྲེལ་རུང་ཁས་མི་ལེན་པའི་ཕྱིར་ཏེ། དྲི་མ་སེམས་ཀྱི་རང་བཞིན་ཞུགས་པར་ཁས་ལེན་པའི་ཕྱིར། གཞན་གྲངས་ཅན་པས་ཐར་པ་ཡིད་ཀྱིས་ཁས་ལ྄ེན་པས་དེའི་རྒྱུད་ལ་ཐར་བ་འཛིན་པའི་བློ་ཡོད་དགོས་ལ། དེའི་རྒྱུད་ཀྱི་ཐར་བ་འཛིན་པའི་བློ་ཐར་བ་འཛིན་པའི་བློ་མ་ཡིན་པའི་ཕྱིར། གཞན་གྲངས་ཅན་པའི་རྒྱུད་ལ་ཐར་བ་དང་ཐམས་ཅད་མཁྱེན་པ་འཛིན་པའི་བློ་ཡོད་པར་ཐལ། དེ་འབྲས་བུར་འཛིན་པའི་བློ་ཡོད་པའི་ཕྱིར་ཏེ། མི་མཐུན་པའི་རྒྱུ་ལས་སྐྱེས་པར་འཛིན་པའི་བློ་ཡོད་པའི་ཕྱིར། དེར་ཐལ། ཀུན་མཁྱེན་མི་མཐུན་པའི་རྒྱུ་ལས་སྐྱེས་པར་འཛིན་པའི་བློ་རྒྱུད་ལྡན་གྱི་གང་ཟག་ཡོད་པའི་ཕྱིར་ཏེ་ཀུན་བཏགས་ཡིན་པའི་ཕྱིར།
