རྒྱལ་ཀུན་མཁྱེན་རབ་གཅིག་བསྡུས་འཇམ་པའི་དབྱངས།།
ངུར་སྨྲིག་གར་གྱིས་རྣམ་རོལ་ཙོང་ཁ་བ།།
དངོས་གྲུབ་ཀུན་སྩོལ་བཅོམ་ལྡན་གཤིན་རྗེའི་གཤེད།།
རྣམ་གསུམ་དབྱེར་མེད་ཞབས་ཀྱི་པདྨོ་ལ།།
གུས་པས་འདུད་དོ་བརྩེ་བས་རྗེས་སུ་ཟུངས།།
སྐྱེ་བར་བཏགས་པའི་མངོན་རློམ་ཚངས་པ་དང་།།
ཁེངས་དྲེགས་འབྱོར་བས་གཡེང་བའི་འདོད་ལྷའི་རིགས།།
མ་ཡིན་བློ་གསལ་ཚུལ་མཐུན་དོན་གཉེར་ཅན།།
སློབ་གཉེར་ཚུལ་བཞིན་བྱེད་པར་འདོད་རྣམས་ལ།།
གདམས་ངག་ཅུང་ཟད་སྦྱིན་ནོ་ཉོན་ཅིག་ཨང་།།
དལ་བའི་རྟེན་ཐོབ་རྒྱལ་བའི་བསྟན་དང་མཇལ།།
མཚན་ལྡན་བཤེས་དང་ཆོས་མཐུན་གྲོགས་ཀྱིས་བསྐྱངས།།
མཐུན་རྐྱེན་རྟེན་འབྲེལ་འཛོམས་པ་འདི་འདྲ་བ།།
ཡང་ཡང་རྙེད་པར་དཀའ་ལ་དོན་ཆེ་བས།།
ཕྱི་བཤོལ་སྤངས་ཏེ་སྙིང་བོ་ལོངས་ཤིག་ཨང་།།
ལས་ཀྱིས་བསྡུས་པའི་ཕ་ཡུལ་ཉེ་དུ་ཀུན།།
བཞག་སྟེ་རྒྱང་རིང་ཡུལ་དུ་སོང་ན་ཡང་།།
རྒྱུས་མེད་ཡུལ་ནས་དོན་མེད་མཛའ་བཤེས་སོགས།།
བསྡུས་ཏེ་རྣམ་གཡེང་བྱེད་པ་སྨྱོན་པ་ཡིན།།
འོང་དོན་ཐོས་བསམ་ལས་ལ་སྒྲིམས་ཤིག་ཨང་།།
སྒོ་གསུམ་དགེ་ལ་སྦྱར་ཕྱིར་མིང་དང་དོན།།
མཐུན་པའི་བཤེས་ཤིག་རང་གི་དགེ་རྒན་དུ།།
བསྟེན་ནས་ཆོས་ཀྱི་བྱ་བ་མ་ལུས་པའི།།
རྩ་བར་མཐོང་སྟེ་བཀའ་བཞིན་བསྒྲུབས་པ་ཡིས།།
རྟེན་འབྲེལ་མགོ་ནས་འགྲིགས་པར་གྱིས་ཤིག་ཨང་།།
སྡིག་གྲོགས་ཡིན་ཞེས་རྭ་ཅན་མི་འབྱུང་གིས།།
གཅེས་ཤིང་ཕན་པའི་ཟོལ་གྱིས་འཛུམ་བསྟན་ནས།།
རྩེ་རྒོད་གཡེང་བའི་གྲོགས་བྱེད་བག་མེད་ཀྱི།།
ལས་ལ་སྦྱོར་ཏེ་སྡིག་པའི་གྲོགས་ཡིན་པས།།
འགོ་བའི་ནད་བཞིན་རིང་དུ་སྤོངས་ཤིག་ཨང་།།
ཆ་རྐྱེན་ཡོད་ན་མི་བཟོད་མྱུར་དུ་བརླག།
མེད་ན་མི་བཟོད་བུ་ལོན་སྟོང་འཇལ་བྱེད།།
ཅི་བྱས་ཆོས་ཀྱི་གེགས་སུ་འགྲོ་བ་འདི།།
གྲོགས་ངན་འདུ་འཚོགས་མང་བོའི་སྐྱོན་ཡིན་པས།།
བསེ་རུ་ལྟ་བུར་གནས་པར་གྱིས་ཤིག་ཨང་།།
མིང་ལ་མཐུན་རྐྱེན་ཟེར་ཡང་ཆོས་ཕྱོགས་ལས།།
ཉམས་བྱེད་འདོད་ཡོན་བདུད་ཀྱི་གཡབ་མོ་སྟེ།།
འདོད་ཆུང་ཆོག་ཤེས་སྔོན་བྱོན་དམ་པ་རྣམས།།
དབུལ་བས་མ་མནར་དོན་གཉིས་རྩེར་སོན་པས།།
འཕྲལ་ཕུགས་ཁེ་ཉེན་གང་ཆེ་དཔྱོད་ཅིག་ཨང་།།
གདོལ་སྤྱོད་ཁྱིམ་པའི་རྗེས་འཇུག་གཡོ་ཁྲམ་མཁན།།
ཆོས་མིན་སྤྱོད་པའི་ཐན་སྙེ་མགོ་འཕང་མཐོ།།
ལྟོ་སྐྱ་གོས་ཧྲུལ་ཐོས་དང་ཚུལ་ཁྲིམས་ཀྱི།།
བཅུད་ལྡན་སྙེ་མའི་མགོ་བོ་དམའ་ན་ཡང་།།
གཏན་གྱི་སྐྱིད་སྡུག་འདྲ་འདྲ་མིན་ནོ་ཨང་།།
བླ་མ་ལ་གུས་མཐོ་ལ་ཕྲག་དོག་མེད།།
དམན་ལ་བརྩེ་སོགས་ནང་ནས་དུལ་གྱུར་ན།།
ཕྱི་བལྟས་ཅོལ་ཆུང་སྐྱེ་བོས་མངགས་ཚད་ལ།།
མི་ཉན་གྱོང་བོར་སྣང་ཡང་སྐྱོན་མེད་པས།།
ཕྱི་འཇམ་ཁོང་རྩུབ་སྤྱོད་པ་སྤོངས་ཤིག་ཨང་།།
མངོན་མཐོ་ངེས་ལེགས་ཡོན་ཏན་ཀུན་གྱི་རྒྱུ།།
བསྟན་པའི་གཞི་མ་ལྷག་པའི་ཚུལ་ཁྲིམས་འདི།།
རྣམ་གྲོལ་དོན་གཉེར་ལམ་གྱི་སྲོག་ཡིན་ཀྱང་།།
ཚུལ་འཆོས་སྤྱོད་པ་འདི་ཡིས་ཐར་དཀའ་བས།།
བསླབ་ཁྲིམས་ངོ་ལྐོག་མེད་པར་སྲུངས་ཤིག་ཨང་།།
ཀུན་སྤྱོད་གཙང་བས་གཞན་གྱི་ཡིད་དུ་འཐད།།
སྨྲ་བ་ཉུང་བས་ཕོག་ཐུག་གཡེང་བ་མེད།།
དད་བརྩོན་དྲན་ཤེས་བརྟན་པོས་ཉིན་རེ་བཞིན།།
ཡོན་ཏན་ཡར་ཚེས་ཟླ་ལྟར་འཕེལ་འགྱུར་བས།།
སྒོ་གསུམ་བག་དང་ལྡན་པར་གྱིས་ཤིག་ཨང་།།
དང་བོ་ཐོས་པའི་སྒྲོན་མེ་མ་སྦར་ན།།
ཀུན་ནས་ཉོན་མོངས་སྲིད་པའི་སྐྱོན་མཚང་དང་།།
རྣམ་བྱང་ཐར་བའི་ལམ་གྱི་བགྲོད་ཚུལ་སོགས།།
བླང་དོར་ཇི་ལྟར་བྱ་བ་མི་ཤེས་པས།།
ཐོས་པས་བློ་མིག་སྦྱངས་བར་གྱིས་ཤིག་ཨང་།།
དོན་གྱི་རྒན་པོ་ཚིག་གི་འཁར་བ་ལ།།
བརྟེན་ཕྱིར་གཞུང་ཚིག་བློ་འཛིན་མི་བྱེད་པར།།
དཔེ་ཀློག་ཙམ་དང་ངག་སྒྲོས་ཐན་ཐུན་གྱིས།།
ཉིན་རེ་འགྲོ་ཐབས་དེས་ཀྱང་མི་ཕན་པས།།
དཔེ་འཛིན་སྐྱོར་སྦྱངས་ཡུན་དུ་གྱིས་ཤིག་ཨང་།།
གཞུང་ཚིག་མང་དུ་བཟུང་སྟེ་བསྐྱར་ན་ཡང་།།
དོན་ལ་མི་སེམས་རིམ་གྲོའི་ཆོས་ཀློག་དང་།།
ནེ་ཙོའི་འདོན་པ་ལྟ་བུ་བརྒྱ་ཚར་གྱིས།།
བརྗོད་བྱའི་གནད་ལ་སྒྲོ་འདོགས་མི་ཆོད་པས།།
དོན་ལ་བརྟག་དཔྱད་ཞིབ་མོ་གྱིས་ཤིག་ཨང་།།
ཀུན་བྱང་འཇུག་ལྡོག་ཚུལ་ལ་མ་རྨོངས་ཤིང་།།
ཚོགས་ཀྱི་དབུས་སུ་སྨྲ་མཁས་དཔལ་འདོད་ན།།
ད་ལྟ་བཟའ་བཏུང་གཉིད་ཀྱི་བདེ་བ་ལ།།
ཆགས་པའི་སྐྱིད་ཆོས་འདི་ཡིས་མི་འགྲུབ་པས།།
དཀའ་སྤྱད་སྡུག་རུས་བཟོད་པར་གྱིས་ཤིག་ཨང་།།
ཉིན་རེར་ཟས་ཀྱང་མི་དྲན་བརྩོན་འགྲུས་རྩོམ།།
ཞུགས་མ་ཐག་ནས་མཁས་པའི་གོ་འཕང་འདོད།།
ཞག་གསུམ་ལོན་ཚེ་རྗེས་མེད་གཡེང་བས་ཁྱེར།།
དེ་འདྲ་དེ་ལ་ཅི་ཡང་མི་ཡོང་བས།།
བརྩོན་པ་ཆུ་བོའི་རྒྱུན་བཞིན་སྟེན་ཅིག་ཨང་།།
དཀོར་དང་སྒྲུབ་པས་བྱིང་ཞིང་རྨུགས་པའི་སྟེང་།།
ད་དུང་ཟས་དང་གཉིད་ཀྱི་ཚོད་མི་རིག།།
ལང་ཤོར་བློ་ངན་འཕྲོ་ཞིང་རྒོད་པའི་ཐོག།།
ཕྱི་ཕྱིར་འཆལ་གཏམ་དུ་མས་གཡེང་བ་སོགས།།
དགག་བྱའི་རིགས་ལ་བསྒྲུབ་བྱར་མ་འཛིན་ཨང་།།
སྐྱོན་ཡོན་བླང་དོར་རིང་གིས་མི་བྱེད་པར།།
གྲགས་སྐམ་འུད་ཀྱི་རྗེས་སུ་འབྲང་ན་ཡང་།།
ཉེས་སྐྱོན་སུ་ཡིས་ལག་པས་མི་སེལ་ལ།།
ཡོན་ཏན་སུས་ཀྱང་ཁ་རུ་མི་ལྡུག་པས།།
བླུན་པོ་ཆུ་སྣ་གར་ཁྲིད་མ་བྱེད་ཨང་།།
ཟབ་ཟབ་མན་ངག་ཟེར་དགུ་ཚོལ་བ་དང་།།
ཐོབ་ཐོབ་མང་པོའི་རྣམ་གྲངས་གསོག་བྱེད་ཅིང་།།
སྒྲ་སྙན་སྨན་རྩིས་སོགས་ལ་མགོ་འཁོར་བ།།
གཞུང་ལུགས་ཐོས་བསམ་རྣལ་མའི་གེགས་ཡིན་པས།།
རྩ་བ་བོར་ནས་ཡལ་ག་མ་འཛིན་ཨང་།།
རང་རང་གཞུང་གི་བརྗོད་བྱ་དགོས་དོན་སོགས།།
མ་མཐོང་ཤག་འགྱེད་ཚིག་འཁྲི་སྐམ་པོ་དང་།།
རིགས་པས་དཔྱད་པ་མི་བཟོད་གོ་ཐོབ་ཀྱི།།
བམ་བཤད་འདིས་ཀྱང་བརྡར་ཤ་མི་ཆོད་པས།།
གོ་རིགས་ཟུང་དུ་འབྲེལ་བར་སྐྱོངས་ཤིག་ཨང་། །
འཁྲུལ་བྲལ་གཞུང་རེ་ངོས་བཟུང་གཞིར་བྱས་ནས།།
གཞན་རྣམས་དེ་དང་སྦྱར་ནས་དཔྱོད་པ་ལས།།
གང་བྱུང་དཔེ་ལ་ལྟ་ཞིང་ཐམས་ཅད་ཀྱི།།
རྗེས་སུ་འབྲངས་པ་ཤེས་རབ་འཆལ་འགྱུར་བས།།
རང་ལུགས་གཏད་སོ་ཡོད་པར་གྱིས་ཤིག་ཨང་།།
དཔྱད་པས་ངེས་པ་ལམ་ཙམ་རྙེད་ན་ཡང་།།
ཆོས་ཚུལ་ཟབ་པའི་ཐག་གཅོད་མི་སྔ་ཞིང་།།
འགྲིག་འགྲིག་མང་བོས་རྣམ་རྟོག་རྒྱ་སྐྱེད་པས།།
དཔྱད་པ་མ་ཐལ་གཞུང་ལ་འཁྲིལ་བཞིན་དུ།།
རྒྱས་བསྡུས་འཚམ་པའི་དཔྱད་ཚུལ་གྱིས་ཤིག་ཨང་།།
མ་རིག་མུན་སེལ་ཐོས་པའི་མེ་སྦར་ཡང་།།
ང་རྒྱལ་དུ་བའི་ངོ་བོར་འཁྱིལ་བ་ཡིས།།
ཕྱི་ཕྱིར་སྐྱོན་ཡོན་མཐོང་བ་སྒྲིབ་བྱེད་ལ།།
ཆོས་སུ་སོང་ན་ཤེས་རྒྱུད་དུལ་དགོས་པས།།
སྙེ་མ་ལོང་བ་མགོ་འཕང་མ་མ་མཐོ་ཨང་།།
མཐོན་པོའི་སྒང་ལ་ཆུ་བོ་མི་ཆགས་པས།།
དམན་ས་བཟུང་སྟེ་གུས་པའི་བརྟུལ་ཞུགས་ཀྱིས།།
ཆོས་མཐུན་བློ་ཁ་མཐོ་བ་ཐམས་ཅད་ལས།།
བློ་སྐྱེད་གང་ལོན་བྲེ་སོག་ཕུལ་སོག་གིས།།
སྒྲོ་འདོགས་འཕྲལ་དང་འཕྲལ་དུ་ཆོད་ཅིག་ཨང་།།
དབུ་ཚད་ཟུང་དུ་འཇུག་པའི་ལྟ་བ་དང་།།
ཆོས་མངོན་མཛོད་དང་ཕ་རོལ་ཕྱིན་པའི་སྒོམ།།
བསྟན་པའི་ནང་མཛོད་འདུལ་བའི་སྤྱོད་པ་རྣམས།།
མ་ཚང་བསླབ་གསུམ་ཡ་བྲལ་འགྱུར་བའི་ཕྱིར།།
བཀའ་པོད་ལྔ་ལ་ཚང་བར་སྦྱོངས་ཤིག་ཨང་།།
དཀའ་བས་བསགས་པའི་མང་ཐོས་ནོར་བུ་ཡང་།།
བརྗེད་ངེས་རྐུན་པོས་དལ་གྱིས་འཇོམས་བྱས་ཏེ།།
རིན་ཆེན་གླིང་ནས་སྟོང་བར་ལྡོག་སྲིད་པས།།
རྒྱུན་དུ་གོམས་འདྲིས་དྲན་ཤེས་བརྟན་པོ་ཡིས།།
གང་ཤེས་བརྗེད་པ་མེད་པར་སོགས་ཤིག་ཨང་།།
སྙིགས་དུས་བློ་དང་བསོད་ནམས་དམན་པའི་ཕྱིར།།
ལྷག་པའི་ལྷ་དང་ཡི་དམ་ཆོས་སྲུང་ལ།།
རྩེ་གཅིག་གསོལ་འདེབས་ཕྱག་མཆོད་མཎྜལ་སོགས།།
ཚོགས་བསགས་སྒྲིབ་སྦྱོང་འབད་པ་དྲག་པོ་ཡིས།།
ཞིང་གི་མཐུ་ལ་རྒྱབ་བརྟེན་གྱིས་ཤིག་ཨང་།།
ཐུན་མོང་ལམ་སྦྱངས་སྔོན་དུ་མ་སོང་ཞིང་།།
གཞུང་དོན་ལྟ་བའི་བློ་མིག་མ་ཕྱེས་པར།།
ཆོ་གའི་ངག་འདོན་བྱང་བ་ཙམ་ཞིག་གིས།།
གསང་སྔགས་འཆང་བའི་གྲལ་དུ་མི་ཚུད་པས།།
བསྟན་ལ་རིམ་པ་བཞིན་དུ་སློབས་ཤིག་ཨང་།།
གསང་ཆེན་རྒྱུད་ཀྱི་རྒྱལ་པོའི་སྨན་ཧྲོག་རྣམས།།
སྦྱོར་བར་བསྡེབས་པ་བསྐྱེད་རྫོགས་རིམ་པ་སོགས།།
ཡིན་ཕྱིར་གཞུང་ལུགས་ཆེ་རྣམས་ཡལ་བོར་ནས།།
མན་ངག་ཁོ་ནར་དགའ་བ་གནས་མིན་པས།།
རྩ་བཤད་སྦྱར་ཏེ་རྒྱུད་དོན་ཚོལ་ཅིག་ཨང་།།
གསང་སྔགས་དེ་ཡང་འཕྲལ་གྱི་རྐྱེན་སེལ་ལམ།།
ཚེ་དང་ནོར་སྒྲུབ་དབང་སྡུད་མངོན་སྤྱོད་སོགས།།
ཚེ་འདིའི་ལག་ཆ་ཁོ་ནར་འཁྱེར་བ་ནི།།
ས་མཆོག་ཙན་དན་སོལ་བར་བྱས་འདྲ་བས།།
ཆོས་ཀྱིས་ངན་སོང་བསྒྲུབས་པ་མ་བྱེདཨང་།།
སྔགས་གཞུང་ཐོས་བསམ་བྱས་པའི་ཉིང་དགོས་སུ།།
རྒྱལཀུན་དགོངས་པ་གཅིག་གྱུར་རྟག་པའི་དཀའ།།
དངོས་གྲུབ་རྩ་བ་དམ་ཚིག་བསྲུང་བ་འདིར།།
འབབ་པའི་ཚུལ་ལ་གོ་བ་གཏིང་ཚུགས་པས།།
གཏན་འདུན་འཆུག་པ་མེད་པར་གྱིས་ཤིག་ཨང་།།
ཁྱད་པར་ལྟ་བ་སྙིགས་མའི་དུས་སྐབས་འདིར།།
དམ་བཅའ་ཙམ་གྱིས་མཁས་རློམ་སྐྱེ་བོ་ཡི།།
སྔོན་མེད་ལེགས་བཤད་སྐད་ཀྱི་འཆལ་གཏམ་ཡང་།།
བསོད་ཆུང་ཤེས་འཆལ་རྣམས་ཀྱི་རྣར་འགྲོ་བས།།
རི་བོང་ཅལ་གྱི་རྗེས་སུ་མ་རྒྱུགས་ཨང་།།
འཇམ་པའི་དབྱངས་ཀྱིས་ཉིན་བཞིན་གདམས་པ་ཡིས།།
རྒྱལ་བའི་དགོངས་པ་མཐའ་དག་མངོན་གྱུར་པ།།
བློ་བཟང་རྒྱལ་བ་ཡིས་ཀྱང་མ་ཐོན་པའི།།
གསར་བཤད་ཕྲ་མེན་མ་ཡི་སོ་ནམ་དེས།།
ཕན་ལས་གནོད་པ་ཆེ་བས་སྒྲིམས་ཤིག་ཨང་།།
ཐུགས་བཅུད་ཟབ་མོར་བསྔགས་པ་ཙམ་མིན་པར།།
རྒྱན་དྲུག་མཆོག་གཉིས་གྲུབ་ཆེན་ཐམས་ཅད་ཀྱི།།
རང་གཞུང་དཔང་བོར་བཞུགས་པའི་མདོ་རྒྱུད་ཀུན།།
གསལ་བྱེད་རྒྱལ་བ་གཉིས་པའི་ལུགས་བཟང་འདིར།།
བློ་རྩེ་གཅིག་ཏུ་དྲིལ་ཏེ་འཇུས་ཤིག་ཨང་།།
གར་རྒྱུགས་ཕྱོགས་སུ་དཀྱུས་སྟོན་བྱེད་པ་བཞིན།།
དང་བོ་ཉིད་ནས་གཅིག་ཤེས་གཉིས་ཤེས་ཀུན།།
སྲིད་པར་འཁྱེར་བའི་དམུ་རྒོད་སེམས་ཀྱི་རྟ།།
འདི་ཉིད་གདུལ་ཐབས་ཁོ་ནར་འཁྱེར་བ་ཡིས།།
ཐོས་བསམ་ཆོས་སུ་འགྲོ་བར་གྱིས་ཤིག་ཨང་།།
འཁོར་ལོ་བཞི་ལྡན་རྟེན་བཟང་ཐོབ་སྐབས་འདི།།
འཁོར་བའི་འཆིང་བ་གཅོད་པའི་དུས་ཡིན་པས།།
འཁོར་གསུམ་སྐོར་བའི་ཐབས་ཙམ་མ་ཡིན་པར།།
འཁོར་ལོ་གསུམ་གྱི་དགོངས་དོན་ངེས་རྙེད་ནས།།
འཁོར་གསུམ་དག་པའི་དགེ་སྦྱོར་གྱིས་ཤིག་ཨང་།།
ཆོས་ཀྱི་རྩ་བ་བསམ་པའི་བཟང་ངན་ཡིན།།
ཆོས་ཀྱི་སྒོ་འབྱེད་རྣམ་དག་ཐོས་པ་ཡིན།།
ཆོས་སུ་སོང་ཚད་འདི་སྣང་ཞེན་ལོག་ཡིན།།
ཆོས་ཀྱི་སྙིང་བོ་ཐབས་ཤེས་ཟུང་འཇུག་ཡིན།།
ཆོས་ལ་ཆོས་བཞིན་སྤྱོད་པར་གྱིས་ཤིག་ཨང་།།
རྣམ་མང་གཞུང་ལུགས་ཟབ་ཡངས་ཆུ་གཏེར་ལས།།
རྣམ་དག་ཐོས་པའི་ནོར་བུ་ལེན་པའི་ཚུལ།།
རྣམ་པར་བཤད་པའི་མིག་སྨན་ཐུར་མ་ཡིས།།
རྣམ་གྲོལ་དོན་གཉེར་ཡོངས་ཀྱི་མིག་ཕྱེ་སྟེ།།
རྣམ་ཀུན་མཁྱེན་པའི་དཔལ་ལ་སྤྱོད་གྱུར་ཅིག།
ཅེས་མདོ་སྔགས་ཀྱི་གཞུང་ལ་སློབ་གཉེར་བྱེད་ཚུལ་གྱི་བསླབ་བྱ་ནོར་བུའི་གླིང་དུ་བགྲོད་པའི་ལམ་ཡིག་ཅེས་བྱ་བ་འདི་ནི།སྤྱིར་དེང་སང་བསྟན་པ་སྙིགས་མའི་མཐར་སོན་པའི་དབང་གིས་ཉམས་ལེན་དགོས་པའི་གཏམ་ཙམ་ཡང་ནུབ།ཐོས་བསམ་དགོས་པའི་གཏམ་ཙམ་ཡོད་ཀྱང་།གང་ལ་ཐོས་པ་བྱ་བའི་ཡུལ་དང་། ཐོས་པ་ཇི་ལྟར་བྱེད་པའི་ཚུལ་སོགས་ལེགས་པར་ཤེས་པ་ཤིན་ཏུ་དཀོན་པར་སྣང་བས།འདི་འདྲ་ཞིག་འབྲི་འདུན་སྔར་ནས་ཡོད་པའི་ཐོག་ཉེ་ཆར་དར་ཧན་པེའི་ལིའི་ཤོག་ནས་བློ་དང་ལྡན་པ་དགེ་སློང་དཀོན་མཆོག་རྡོ་རྗེས་བསྐུལ་བའི་ངོར་༧བཔ་དཀོན་མཆོག་བསྟན་པའི་སྒྲོན་མེས་ཐོས་དོན་རྒྱུད་ལ་སྦྱར་བའི་ཉམས་ལེན་མ་ཐུབ་ཀྱང་།བླ་མ་གོང་མ་ཞིག་གི་མིང་ཙམ་ལ་སྐྱབས་སུ་མཆི་བར་གྲྭ་རྐྱང་དཀྱུས་མའི་ལུགས་བཞིན་སློབ་གཉེར་ལ་སྡུག་རུས་ཅུང་ཟད་བྱས་པའི་རང་མྱོང་དང་།དམ་པ་གོང་མའི་གསུང་རྒྱུན་ལ་བརྟེན་ནས་རགས་རིམ་ཞིག་བྲིས་པའི་མཚམས་སུ་ད་ལྟ་ཕན་པར་སྨྲས་ཀྱང་གོ་བ་དཀོན་པར་སྣང་བས་དགོས་པ་མི་འདུག་སྙམ་ནས་བ་པའི་ཚེ།བསྟན་ལ་གཅིག་ཏུ་སྨན་པའི་ལྷག་བསམ་དང་མཁྱེན་རབ་ཀྱི་དབང་ཕྱུག་དམ་པ་དགོན་པའི་ཁྲི་ཐོག་པ་དཀོན་མཆོག་རྒྱལ་མཚན་པས་འདིའི་འཕྲོ་བསྐང་སྟེ་ཆ་ཚང་ཞིག་དགོས་ཞེས་ནན་ཏན་གནང་བ་བཞིན་མཇུག་གྲུབ་པར་བྱས་པའི་ཡི་གེ་བ་ནི་དགེ་སློབ་དཀོན་མཆོག་ཀུན་དགས་བགྱིས་པ་འདིས་ཀྱང་དོན་གཉེར་ཅན་རྣམས་ལ་ཕན་པར་གྱུར་ཅིག།།།
