རི་བོ་ཆེ།——རྨོངས་སད།
༢༡
སྙན་པའི་ངག་གི་འགྱུར་ཁུག་གླེང་ན་དབྱངས་ཅན་ཕྱག་གི་པི་ཝམ་མཁོ།།
རིག་བྱེད་གཏམ་གྱི་སྒོ་མོ་ཕྱེ་ལ་དབང་ཕྱུག་ཁྱབ་མཇུག་མེད་ཐབས་མེད།།
སྲོལ་རྒྱུན་རི་མོའི་མཛེས་ཆ་གཏོད་པར་བྲང་གི་མྱོས་བུམ་ཆ་གཅིག་བཞིན།།
ཅུང་ཟད་སྐུང་ལ་གསལ་པོར་ངོམ་པའི་རྩེད་མཚར་དེ་ཡང་ཕར་ལ་ཞོག།
༢༢
འདི་ནས་བདག་གིས་དབྱངས་ཅན་མ་ཡི་སྐུ་ཡི་མཚན་དཔེའི་ཟུར་ཙམ་ཞིག།
བརྗོད་པར་འདོད་ཀྱང་བདག་བློ་ཆུང་དྲག་ཁྱེད་ཉིད་ཤོང་བར་མི་འདུག་གོ།།
ག་ཤེད་ཅིག་ནས་ཐོས་ཀྱང་མྱོང་ལ་བརྗེད་ཡང་ཟིན་པའི་མག་མོག་ཅིག།
བརྗེད་ངེས་འདི་ལ་འདུག་ཙུག་མི་གདའ་དྲན་པའི་དཔལ་ཡོན་རྐུས་ནས་སོ།།
༢༣
གནག་སྣུམ་སྐྲ་ཡི་འདབ་མ་བཅིངས་ཏེ་རྒྱལ་བ་རིགས་ལྔ་དབུ་ལ་བཞུགས།།
སྐྲ་ལོའི་ཆུན་པོ་རྒྱབ་ཏུ་འཕྱང་ནས་ཕྲག་པའི་སྟེང་དུ་རེག་རེག་བྱེད།།
ཉི་ཟླའི་འོད་ཀྱི་རྣ་ཆ་ཐོགས་ནས་ཞལ་གྱི་འཛུམ་མདངས་ལྷུག་པོར་གྲོལ།།
དལ་གྱི་རྒྱས་པའི་དཔྲལ་བའི་དབྱིངས་ནས་མཚར་སྡུག་འོད་བུ་ལམ་སེ་ལམ།
༢༤
དཀར་ནག་མ་འདྲེས་སྤྱན་དཀྱུས་རིང་ཞིང་སྨིན་མའི་གར་སྟབས་ཡང་ཡང་བསྒྱུར།།
སྨིན་ལེགས་འོག་གི་བཞིན་ལེགས་མ་ཁྱེད་ལྷ་དང་བདུད་ཀྱིས་མཆོད་ཅིང་བཀུར།།
ལྤག་པ་སྲབ་ཅིང་བ་སྤུ་རྩེ་ནས་རེ་བྱ་འཇམ་པོ་ཐུ་ལུ་ལུ།།
ཤངས་ཀྱི་བུ་ག་ཅུང་ཟད་ཟུམ་ཞིང་དབུགས་ཀྱི་རྒྱུ་བ་འཇམ་ལ་དལ།།
༢༥
ཞལ་གྱི་པད་མོའི་འབྱེད་འཛུམ་རེ་ལ་ཡིད་ཀྱི་དབང་པོ་དྲག་ཏུ་ལྡང་།།
གདོང་གི་འཛུམ་ཆུང་སྟོན་ཐེངས་རེ་ལ་ཚོགས་དྲུག་ཡིད་ཀྱི་རྒྱུ་བ་འགག།
ཐུགས་རྗེ་བརྩེ་བའི་གཟིགས་ཕྱོགས་རེ་ལ་སེམས་ཀྱི་ངལ་དུབ་མ་ལུས་ཞི།།
གང་ཞིག་ཡིད་ལ་དྲན་པ་ཙམ་གྱིས་དགའ་དང་སྤྲོ་བའི་བ་སྤུ་གཡོ།།
༢༦
ཟིལ་པ་ཐོགས་པའི་མཆུ་སྒྲོས་གཙང་ལ་དུང་གི་སོ་ཕྲེང་ཁྲ་ལ་ལ།།
མགྲིན་པའི་མགུལ་གྱི་བུམ་བཟང་དེ་ལས་སྙན་པའི་འགྱུར་ཁུག་ལྷང་སེ་ལྷང་།།
དར་གྱི་ཨམ་རག་སྐུ་ལ་གསོལ་ཞིང་སྤྲིན་དང་ནམ་མཁའི་གཞས་ཡས་ནས།།
ཐུགས་རྗེ་བརྩེ་བའི་ལན་གཅིག་གཟིགས་དང་ཀྱེ་ཀྱེ་ཡིད་ཀྱི་ལྷ་མོ་ལགས།།
༢༧
མུ་ཏིག་རྡོག་གུ་མགུལ་དུ་བཏགས་ནས་ལྷ་ཡི་རྒྱན་དྲུག་གསོལ་བ་ན།།
སྲིད་གསུམ་བདག་པོ་དབང་ཕྱུག་གིས་ཀྱང་ཚུགས་ཀ་ཤོར་བའི་ལོ་རྒྱུས་གདའ།།
ཞི་ཞིང་ལྷོད་ལ་སྒེག་ཅིང་འཕྱོ་བའི་གོམ་འགྲོས་རེ་རེའི་སྟངས་སྟབས་ལས།།
ཚང་པ་ཆེན་པོས་དཀའ་ཐུབ་ཟློག་ནས་བརྩེ་བའི་ཟུར་མིག་ཁྱོད་ལ་འཕངས།།
༢༨
བཅུ་དྲུག་ལང་ཚོ་ལུས་ལ་འཆང་ཞིང་བརྩེ་དགའི་གླུ་དབྱངས་བླངས་ཙམ་ན།།
ཁྱབ་མཇུག་ཆེན་པོས་ཉི་ཟླ་བཟུང་ནས་ཁྱེད་ཀྱི་ཕྱག་ཏུ་ཕུལ་ཞེས་གྲགས།།
རྣམ་ཐོས་སྲས་ཀྱིས་སེང་གེའི་རྣ་རྒྱན་མི་བརྗེད་དྲན་པའི་རྟེན་དུ་བཞགས།།
ཀླུ་ཡི་རྒྱལ་པོས་ནོར་བུ་གཙུག་ཕུད་གཉེན་དང་འདུ་མའི་ཕྱག་རྟགས་ཕུལ།།
༢༩
མཛེས་འཛུམ་འོད་དང་འོད་ཟེར་འཕྲོ་ཞིང་བརྗིད་ཆགས་བརྩེ་བ་རི་ལས་བརླིང་།།
ཕྲ་ལ་ལྡེམ་པའི་སྐུ་གཟུགས་སྨྱུག་མ་བརྩེ་འཛུམ་རླུང་བུས་ཡང་ཡང་གཡོ།།
ཕྱག་ན་འཛིན་པའི་རྒྱུད་དྲུག་པི་ཝམ་ལྷ་ཡི་རྔ་བོ་ཆེ་བཞིན་དུ།།
སྙན་པའི་ཚིག་གི་རོལ་མོ་སྣ་ཚོགས་དབྱར་གྱི་ཆར་ལྟར་སིལ་ལི་ལི།།
༣༠
ཟླ་འོད་འཐུང་བའི་གཙང་པོ་འདི་ནས་ཡིད་ཀྱི་ཀོ་གྲུ་ཆུང་ཆུང་ཞིག།
རྐྱལ་རྐྱལ་སྒྲ་ཡིས་ཕར་ཕར་འདེད་ཅིང་དབྱངས་ཅན་མ་ཁྱོད་འཚོལ་བར་ཕྱིན།།
འཁོར་བའི་ཉིན་སྲིབ་ཇི་ལྟར་བརྒྱུད་ཀྱང་ཁྱོད་ཀྱི་ཞབས་རྗེས་མི་འདུག་པས།།
ད་དུང་ངས་ཁྱོད་མིང་ནས་འབོད་ཀྱིན་ཁྱོད་ཉིད་འཚོལ་བར་གང་དུ་འགྲོ།།
2021/10/6 མུ་འགོད་ཁག་གསུམ་པ།
