图片发自简书App
个女喺外地，头先微博@我，话最近听到一首歌，歌名叫《父亲的肩头》，啲歌词好正，讲出佢嘅心声，特噔发嚟，提前作为女儿畀爹啲嘅父亲节感谢语。“爸爸的肩头 最高的山丘 是我挡风遮雨的城楼 好多年以后 长成大家闺秀 你还一直把我放在衣兜 ”就尼段词已经睇到我感动，个女咁生性，当初同老婆一起凑女啲辛苦再大都值得。下边几句更令我感慨万千：“女儿是父亲心里的暖流 是他一生最大的成就 爸爸的肩头 最后的码头 是我后方坚强的港口 ”，不禁令我责任感同自豪感一齐悠然而生。哦，原来仲有排做，唔使旨意咁快收工，乖女，收到喇！
天底下父母对仔女嘅爱都系深情厚意、毫无保留，但老窦对女嘅爱往往又有啲讲唔出嘅特别，尤其个女有事，会第一时间冲出嚟（到个女有男朋友或者老公时就唔一定够佢快），会特别宠（老婆成日系咁话我），正如歌词咁讲，就算大个咗都想一直放喺衣兜。总之，老窦对女嘅感情有啲会深到唔使讲理由。香港无线电视台最近热播嘅电视剧《心战》中嘅父亲靳兆楠（由老牌名演员郑少秋饰演）就系典型，全世界都认为喺廿十五年前畀人绑架而失踪嘅女儿已经唔喺人世，但喺就凭住对个女嘅爱一直坚信女儿尚在，坚持寻找。每年都想象个女嘅年龄爱好做一份生日礼物，以致要堆满几个箱。女儿嘅房间摆设依旧，却一尘不染。真系感天动地，睇到你心酸眼湿。
我相信剧中靳兆楠一定会喺父亲节前同个女重逢。我亦好开心可以收到远方女儿提前发嚟嘅父亲节感谢语。
