རྩྭ་ཐང་ཕྱིར་དྲན་གྱི་ཞོགས་པ།
ཞོགས་མེས་བརྩམས།
སྒྲིབ་པ་མེད་པའི་མཁའ་དབྱིངས་སུ་སྤྲིན་དཀར་གྱི་ལུག་ཁྱུ་འཕྱོ་ཞིང་། རྩྭ་ཐང་ཀན་ནས་གཡུ་འབྲུག་གི་དབྱིབས་དང་མཚུངས་བའི་དུ་བ་སྔོན་མོ་ཞིག་འཇའ་འོད་ཀྱི་དར་ཐག་བཞིན་མཁའ་རུ་འཐེན། འདི་ནི་ལྷ་དང་མིའི་བར་ལ་གཉེན་སློང་གི་འབྲེལ་ཐག་གསར་བ་ཞིག་སྐྲུན་བཞིན་ཡོད་པ་མ་ཡིན་ནམ། ཡང་། སྤྲིན་དཀར་གྱི་ལུག་ཁྱུ་དེའི་ཅུང་འོག་ན། དཔའ་ངར་འགྱིང་བའི་གངས་རིའི་སོ་ཕྲེང་ནི་གླིང་དཀར་ཧོར་ལ་ཆས་པའི་གཏམ་རྒྱུད་བཞིན་དཔའ་ཞིང་བརྗིད་ལ་དྲག་པོའི་ཟིལ་ཤུགས་དང་ལྡན། ལྗོངས་འདིར། དབྱར་གསུམ་སྦྲང་ཆར་གྱི་འོ་མ་འཇོ་ཞིང་། དགུན་གསུམ་ཁ་བ་ཡི་མེ་ཏོག་ཐོར། སྟོན་གསུམ་གསེར་མདོག་གི་འབྲུ་རིགས་ལྡེམ་ཞིང་། དཔྱིད་གསུམ་དྲོད་འཇམ་གྱི་རླུང་བུས་སྐྱེ་དངོས་ཀྱི་ཚེ་སྲོག་ལང་ཚོ་བསྐྲུན། རྩྭ་ཐང་འདིའི་མཛེས་སྡུག་བརྗོད་པ་དང་བྲལ་ཞིང་། བསྟོད་བསྔགས་ཀྱིས་རྫོགས་ཤེད་ཅིག་འབྲི་བའི་སྙན་ངག་མཁན་ཡང་མ་མཆིས།
གྲོགས་པོ་ལགས། འདོ་རིགས་རྟ་ཕོའི་རྨིག་སྒྲ་གནས་འདི་ནས་ཐོས་ལ་། ཐུལ་དཀར་འབྲི་མོའི་ངུར་སྒྲ་གནས་འདི་རུ་ཁྱབ། ལུག་ཁྱུ་རི་ལུང་ལ་བཀྲམ་པའི་མཛེས་སྡུག་དང་། རི་གླུ་གཙང་བོ་ལ་འདྲེས་པའི་དབྱངས་རྟ་སོགས་སུས་ཀྱང་མ་བཅོས་མ་སླད་པར་རྩྭ་ཐང་འདིའི་ཤ་གསེང་རུས་གསེང་དུ་ཁྱབ་ཡོད་པས། ཁྱོད་ཀྱང་མ་སྡོད་པར་རྩྭ་ཐང་འདི་རུ་ཐེངས་གཅིག་བལྟ་རུ་ཕེབས་དང་། འདི་ལས་ཕ་ས་སྨུག་པོའི་དྲོད་ཁོལ་དང་ཕ་ཁྱིམ་གྲུ་བཞིའི་གསང་བ་རྟོགས་ཡོང་།
མཚར་སྡུག་གི་རྩྭ་ཐང་། དྲན་ཡིད་ཀྱི་རྩྭ་ཐང་། ང་ཚོ་ཕྱིར་ལོག་འདོད། ང་ཚོ་འབྲོག་པ་ངོ་མ་ཡིན། ང་ཚོ་ཁྱོད་ཀྱི་སྲུང་དམག་ཡིན། ང་ཚོ་ཕྱིར་ལོག་ནས་ཁྱོད་དང་མཉམ་པོར་འཚོ་འདོད། རྩྭ་ཐང་ལགས། ང་ཚོའི་ཕྱིར་མིག་གིས་ཁྱོད་ཀྱི་བྱམས་བརྩེ་འཚོལ་ཡོད།
2021.10.3
