༡ངོ་སྤྲོད་དང་སྒུལ་ཤུགས་
སྒོ་ཁྱི་ནི་བོར་སོང་བའི་ཕྱིང་ཞྭ་དང་རལ་བ་འཚོལ་མཁན་ཡིན
སྒོ་ཁྱི་ནི་རྩྭ་ཐང་བྱེ་འགྱུར་གྱི་ཨ་བྲ་གསོད་མཁན་ཡིན
སྒོ་ཁྱི་ནི་རྟ་ཐོག་གི་ཇག་པ་ཕྲེང་འཛིན་དེ་ཡིན་པས
ང་ཡི་ཟུག་སྐད་གླུ་རུ་སྒོམ་མཁན་མེད་ཀྱང
མགྱོགས་ལམ་དྲང་ཤ་ཅན་དེ་བརྒྱུད་དུས་ཅི་ཞིག་བོར་སོང་བ་ཤེས་པར་གྱིས
ལ་གཞས་ཙམ་ལས་བྲིས་མེད་པའི་ཤོག་ལྷེ་གཅིག་གི་མིག་ཆུ་མཐོང་བྱུང
གྱོད་གཞི་ཙམ་ལས་འབྲི་མ་ཐུབ་པའི་ལྕགས་སྨྱུག་ཅིག་གི་ངུ་སྐད་ཐོས་བྱུང
ད་དུང་ཆོན་ཐག་ཆད་པའི་སྦྲ་ནག་གི་ཚོར་བ་འཁྱག་རླུང་དུ་རྒྱུ་བ་མཐོང་བྱུང
འགུལ་སྐྱོད་མ་བྱས་པའི་ཕ་བོང་དེས་སྔར་བཞིན་རི་སྲིབ་ཀྱི་གྲང་ངར་མྱོང་གི་འདུག་པས
སྒོ་ཁྱི་ཁྲིད་སྟེགས་སུ་ཡོང་ནས་སློབ་ཁྲིད་བྱེད་འགོ་བརྩམ
“ངའི་སྨྱུ་གུ་འདིས་ཁྱོད་ཚོ་གང་དུ་ཐོན་ཡོད་པ་ཤེས་པར་གྱིས”
ཁྱི་ར་ཆར་བས་བཤིག་སོང ཁྱི་སྣོད་རླུང་གིས་ཁུར་སོང
མཚན་རླུང་ལ་འཐབ་ནས་ཟུག་སྐད་རྒྱབ་ཀྱང་ཁྱི་རྐུན་ཟེར
ལྕགས་ཐག་ཕར་གཡུག་ནས་ཡ་ཁྱིམ་དུ་བསྡད
“འདྲ་མཉམ་ནི་གནམ་སྔོན་པོས་གནང་བའི་ཐོབ་ཐང་ཡིན”
༢ སྒོ་ཁྱིའི་རེ་འབོད
ཤིང་དགུན་ལ་མི་ཤི་དབྱར་ལ་རུལ་འགྲོ
གངས་ཙག་གིས་མི་ཐུབ་ཉི་མས་བཞུ་འགྲོ
ལྷིང་འཇགས་ལ་མགོ་བོ་བསྙེས་ནས་ཝུ་ཆང་འཐུང
སྒོ་ཁྱི་ཟུག་དུས་མི་རྣམས་གཉིད་ཚར་བས་ཡིན
ཀ་ཡེ རྟ་ལ་སྒ་ཆས་རྒྱོབ ཁྲབ་ལ་རྒྱུན་ཐག་སྡོམ
མཚན་མོ་ནི་འཐབ་ར་ཞིག་ལས་མགྲོན་ཁང་ཞིག་གཏན་ནས་མིན
བཙའ་ནས་སྐྱ་བོར་གྱུར་བའི་སྒོ་ཤིང་ནི་རླུང་གི་རྩེད་ཆས
ཆག་ནས་ཤུལ་ཙམ་མེད་པའི་སྒེའུ་ཁུང་ནི་ཁུག་རྟའི་འཕུར་ལམ
མཚན་མོའི་སྐར་མ་བལྟ་སའི་ཁང་བ་འདིའི་བདག་པོ་སུ་ཞིག་ཡིན
སྒོ་ཁྱིས་སུ་ཞིག་འབོད་པའི་ཟུག་སྐད་རེ་རྒྱབ་ནས་ཕ་གའི་ཉག་ཁར་བལྟས
ཙན་དན་ཕྲེང་བ་འཛིན་པའི་བདག་པོ་རལ་བ་ཅན་དེ་ཕྱིར་ཕེབས་ཡོད་དམ
དངུལ་དཀར་གའུ་ཅན་གྱི་བདག་མོ་དུང་རལ་ཅན་དེ་ཕྱིར་ཕེབས་ཡོད་དམ
སྐད་འཕྲིན་གྱི་དྲིལ་སྒྲ་གཅིག་གྲགས་གཉིས་གྲགས
མགྱོགས་འཕྲིན་ལས་ཐད་གཏོང་གཅིག་ཐོན་གཉིས་ཐོན
བརྡ་རྟགས་མེད་ས་ནས་གན་རྐྱལ་དུ་ལོག་སྟེ་ནམ་མཁར་བལྟས
ཁྲ་ལམ་ལམ་གྱི་སྐར་ཚོགས་དེའང་སྐྱ་རེངས་ཀྱི་ཀློང་ནས་ཡལ་འགྲོ
སྒོ་ཁྱི་ལྷས་མཐའ་ནས་བསྡད་དེ་ཆང་འཐུང་འགོ་བརྩམ
གོ་ཐོས་སུ་ཆང་གིས་སྐྱོ་སྣང་སེལ་ཐུབ་ཟེར
༣ སྒོ་ཁྱིའི་འགུལ་སྐྱོད
རྗེས་ཤུལ་དེའང་ཁ་ཆར་དང་བུ་ཡུག་གིས་བསུབ་ལ་ཉེ
བཙའ་ཆགས་པའི་འབྲོང་རྭ་དེས་ཅི་ཞིག་བཤད་ཀྱིན་འདུག
སྦྲ་ཐེད་པོ་འདིའི་བདག་པོ་རླུང་གིས་ཁུར་ཚུལ་ལ་ཉན་ན
སྟོན་མཇུག་གི་ཁུར་མོང་བགྲེས་པོ་ཙམ་ལས་ཅི་ཡང་མིན་པ་འདྲ
སྒོ་ཁྱི་ཡ་ཁྱིམ་དུ་བསྡད་ནས་བགྲོ་གླེང་བྱེད་འགོ་བརྩམས
ཁྱོད་ཀྱིས་རང་ཉིད་བོར་འདུག་པས་ལག་གི་དབྱུག་པ་ཞོག་ལ་ཉོན་ཅིག
མགོ་སྦྲ་ནག་བདག་མེད་ཆར་ཆུས་ཟགས་ཚར་ཟིག
རྒྱབ་སློག་པ་སྐྱ་བོ་རྙིང་ནས་ཐེད་ཚར་ཟིག
སྒོ་ཁྱིས་རྒོད་པོ་འཕུར་ཤུལ་གྱི་འཇག་མར་སྐད་ཅིག་བསྐུར
ཚང་མས་ཁ་པར་སར་བཞག་ནས་རང་ཉིད་ལ་ཚང་རྩིས་རྒྱོབ
ཕྱི་ཡི་ལྭ ནང་གི་སེམས ད་དུང་ངག་གི་སྐད་ཆ
སྒོ་ཁྱིས་ལག་པ་བསྲིངས་ནས་ལྷིང་འཇགས་ཀྱི་གདོང་འབག་བཤུ་བར་བརྩམ
སྒོ་ཁྱིས་སྨྱུ་གུ་བཟུང་ནས་རྨི་ལམ་ལས་བོར་སོང་བ་དག་གི་མིང་བྱང་བྲིས
སྒོ་ཁྱིས་སྐད་འཕྲིན་ནང་གི་མ་ནེ་འོག་འབྱར་ལ་བླ་འགུག་འདོན་འགོ་བརྩམ
སྒོ་ཁྱིས་རྟ་ཐོག་གི་སྟག་ཤར་རལ་བ་ཅན་དེ་གླེང་གི་ཡོད
སྒོ་ཁྱིས་ལྷས་འདབས་ཀྱི་སྨན་ཤར་ཞོ་ཟེའུ་ཅན་དེ་དྲན་གི་ཡོད
༤ སྒོ་ཁྱིའི་སྨོན་ལམ
མཚན་རླུང་ནག་པོ་ལྷོད་ལྷོད་ཀྱིས་ལྡང་བ་འཐབ་སྟངས་གཞན་ཞིག
ཟླ་འོད་ཁྲ་ཁྲ་མཛུམ་མཛུམ་གྱིས་དགོད་པ་དམིགས་ཡུལ་གཞན་ཞིག
སྔུར་སྒྲས་འཆའ་བཞིན་པའི་སྦྲ་ནག་གི་ལྷས་འདབས་ནས
ཟུག་སྐད་གཉོམ་པོ་དེས་འབུ་མེ་ལྕེབ་ཀྱི་རྣམ་ཤེས་འགུག་ཐུབ་པར་སྨོན
ལྷིང་འཇགས་ནི་འཆི་བའི་བདག་པོའི་རལ་གྲི་རེད
ཁུ་སིམ་སིམ་གྱི་མཚན་མོ་ནི་ཁྱོད་ཀྱི་ཤི་ཚིགས་རེད
མཁའ་དབྱིངས་ཀྱི་སྐར་ཚོགས་འདར་བ་འཁྱག་ནས་མ་ཡིན་གོ་ནས་ཡིན
རྡོ་ཡིས་བཀག་པའི་ཟུག་སྐད་དེས་འབུ་མེ་ལྕེབ་ཀྱི་རྣམ་ཤེས་འགུག་ཐུབ་པར་སྨོན
མཚན་མོས་བཏེགས་པའི་ཆང་ཕོར་དེའི་རྗེས་སུ་ཁྱོད་རང་གཉིད་སོང
སྔུར་དབྱངས་ཀྱི་ཁྲོད་ནས་སྐད་ཡིག་དང་བཀའ་བསྟན་གསེར་བྲིས་མ་དེའང་བོར་སོང་།
སྐད་ཆ་མེད་པའི་ཁྱོད་ནི་སུ་ཚང་གི་ཡིན་ནམ
ལྷགས་རླུང་ཁྲོད་ཀྱི་ཟུག་སྐད་གཉོམ་པོ་དེས
འབུ་མེ་ལྕེབ་ཀྱི་རྣམ་ཤེས་འགུག་ཐུབ་པར་སྨོན
