[1992年版锡伯语小学语文课本第一册第16课]
aga agara erinde
ajige šanyan gūlmahūn orhoi tala de ketkeneme fekuceme jing selabume efime bihei, gaitai edun dekdeme, aga dame deribuhe. ajige šanyan gūlmahūn ekšeme emu amba abdaha be faitame gaifi, aga be dalime sara arame tukiyehe. ajige šanyan gūlmahūn julesi yabuhai, emu ajige coko aga de usihifi, "ji ji ji" seme iliha be sabufi kaicame, "ajige coko, ajige coko, hūdukan i abdahai fejile jiki! " serede, ajige coko gisureme, "ajige gūlmahūn, sinde baniha." sefi yabume abdaha i fejile jihe.
ajige šanyan gūlmahūn jai ajige coko julesi yabuhai, geli emu ajige kesike aga de usihifi, "miyang miyang miyang" seme iliha be sabufi kaicame, "ajige kesike, ajige kesike, hūdukan i abdaha i fejile jiki! " serede, ajige kesike gisureme, "suwende baniha." sefi yabume abdaha i fejile jihe.
baji ome, abka galafi šun tucike. ajige šanyan gūlmahūn, ajige coko jai ajige kesike sain gucu ofi urgunjeme ketkeneme, selatala efihe.
