དེ་རིང་ནས་བཟུང་ཧོར་ཟླ་བཞི་བའི་འགོ་ཚུགས་པ་རེད།་ས་ག་ཟླ་བ་ཞེས་པ་དེ་རེད།ས་ག་ཟླ་བའི་དུས་ཆེན་འདི་ནི། ནང་པ་སངས་རྒྱས་པའི་རྗེས་འཇུག་ཞིག་ལ་མཚོན་ན་ངེས་པར་ཏུ་རྗེས་སུ་དྲན་དགོས་ལ་དྲན་འོས་པའི་ཉིན་མོ་ཞིག་ཀྱང་ཡིན་།རྒྱུ་མཚན་ཅི་རེད་ཞེ་ན།ཟླ་བ་འདི་ནི་བདག་ཅག་གི་སྟོན་པ་སངས་རྒྱས་བཅོམ་ལྡན་འདས་སྐུ་བལྟམས་པ་དང་། མངོན་པར་སངས་རྒྱས་པ། སྐུ་མྱ་ངན་ལས་འདའ་པའི་ཚུལ་སོགས་མཛད་པ་རླབས་བོ་ཆེ་སྟོན་པའི་དུས་ཆེན་གསུམ་འཛོམས་ཀྱི་ཟླ་བ་ཡིན།སངས་རྒྱས་བཅོམ་ལྡན་འདས་ཁོང་ལ་དད་སེམས་གཙང་མ་ཞིག་ཡོད་མཁན་གཅིག་གི་ཆ་ནས་བཤད་ན་དུས་ཆེན་གསུམ་འདི་ཉིད་ཟླ་བ་གཅིག་ལ་ཚོགས་པ་ཙམ་གྱིས་ཀྱང་ཧང་སང་དགོས་པ་གཅིག་དང་དད་པ་ཡང་སྔར་ལས་བརྟན་པོར་ཆགས་པའི་རྒྱུ་རུ་འགྲོ་ངེས་རེད་སྙམ།
དེ་ཡང་རྒྱུད་ཆོས་མང་པོ་ལས།དམ་པ་རྣམས་འཁྲུངས་འདས་སོགས་ཀྱི་དུས་ཆེན་གྱི་སྐབས་སུ་ཁོང་ཅག་རྗེས་སུ་དྲན་པ་དང་ཁོང་ཅག་གི་ཡོན་ཏན་རྗེས་སུ་དྲན་པ།སྡིག་སྤངས་དགེ་བསྒྲུབ་ཀྱི་ལས་ལའང་བརྩོན་འགྲུས་ཆེན་པོས་འཇུག་ཚེ་དགེ་བའི་ཚོགས་དེ་ཡང་བསམ་གྱིས་མི་ཁྱབ་པ་འབྱུང་ཞེས་པ་གསུངས་ལ།རང་ཅག་ལྟ་བུ་སྟོན་པ་ཐུགས་རྗེ་ཅན་ཁོང་གི་རྗེས་འཇུག་ཅིག་ལ་མཚོན་ན་སངས་རྒྱས་བཅོམ་ལྡན་འདས་ལས་ལྷག་པའི་ཡང་དག་པའི་སྟོན་པ་ཞིག་མཆོད་ཡུལ་དུ་བསྟེན་བྱ་མེད་ཕྱིན། ང་ཚོས་ངེས་པར་དུ་དུས་ཆེན་གསུམ་འཛོམས་ཀྱི་ས་ག་ཟླ་བ་འདི་ཉིད་ལ་སེམས་བསྐྱེད་རྣལ་མ་ཞིག་གིས་སྡིག་སྤངས་དགེ་བསྒྲུབ་ཀྱི་ལས་ལ་ནུས་པ་ཅི་ཐོན་གྱིས་འབད་པ་བརྩོམ་དགོས་ལ་འབད་པ་བརྩོམ་ཚེ་ཕན་པའང་བླ་མེད་ཅིག་འབྱུང་ངེས་རེད་སྙམ། དེའི་ཕྱིར་ན་སྐྱེས་ཆེན་དམ་པ་གང་མང་ཞིག་གིས་དུས་ཆེན་གསུམ་འཛོམས་གྱི་ཟླ་བ་འདི་ལ་སྲོག་བླུ་བྱེད་པ་དང་དཀར་ཟས་རོལ་པ་སོགས་རྣམ་དཀར་དགེ་བའི་ལས་དག་ལ་འབད་དགོས་ཞེས་གསུང་གི་སྐུལ་མའང་མང་པོ་གནང་བཞིན་པ་དེ་རེད།དེའི་ཕྱིར་ན་བདག་གིས་བཟློས་སྐྱོན་ཚུལ་དུ་སྲོག་བླུ་བྱེད་དགོས་ཚུལ་དང་དཀའ་ཟས་མཆོད་དགོས་ཚུལ་སོགས་མང་པོ་ཞུ་འཆར་མེད།
ཡང་ཅིག་བཤད་ན་སྲོག་བླུ་གཏོང་བ་ཙམ་དང་། དཀར་ཟས་སྤྱོད་པ་ཙམ་།དགེ་ལས་ཙམ་སྒྲུབ་པ་སོགས་སངས་རྒྱས་བཅོམ་ལྡན་འདས་ཁོང་གི་ཆོས་ཡིན་པ་ཁག་པོ་རེད།སངས་རྒྱས་བཅོམ་ལྡན་འདས་ཁོང་ནི་སྲོག་བླུ་རང་ལུགས་པ་ཞིག་མ་ཡིན་ལ།དཀར་ཟས་རང་ལུགས་པའང་མིན། དེ་བས་དགེ་ལས་རང་ལུགས་པ་ཞིག་ཀྱང་མིན།
ང་ཚོས་ནམ་རྒྱུན་རྒྱལ་བའི་གསུང་རབ་དག་ལ་མཇལ་ཚེ། ཁོང་གིས་སྲོག་བླུ་གཏོང་དགོས་པ་དང་།དཀར་ཟས་ཟ་དགོས་པ་སོགས་ཀྱི་གནས་ཚུལ་མང་པོ་དང་ནན་ཏན་ཚུལ་དུ་གསུངས་མེད་པ་དེ་རེད།
གསུང་རབ་དག་ལས་ལྟ་བ་རྣམ་དག་ཅིག་རྒྱུད་ལ་སྐྱེ་དགོས་ཚུལ་དང་གསོ་དགོས་ཚུལ།རང་རྒྱུད་ལའང་བྱམས་པ་དང་།སྙིང་རྗེ། བྱང་ཆུབ་ཀྱི་སེམས་སོགས་སྦྱང་དགོས་ཚུལ། མི་རྟག་པ་དང་འཁོར་བའི་ཉེས་དམིགས་སོགས་སྒོམ་དགོས་ཚུལ་མང་པོ་ལེགས་པར་གདམས་པ་དེ་རེད།དེའི་ཕྱིར་ན་ང་ཚོས་ཛ་དྲགས་པའི་སྲོག་བླུ་དང་དཀའ་ཟས་རང་ལུགས་སོགས་གནས་སྐབས་སུ་བཏང་སྙོམས་བཞག་སྟེ་སྟོན་པ་ཐུགས་རྗེ་ཅན་ནི་ང་ཚོས་དུས་ཡུན་ངེས་ཅན་ཞིག་ལ་དཀར་ཟས་མཆོད་པ་དང་སྲོག་བླུ་གྲངས་འབོར་ཆེན་པོར་བྱེད་པ་ལ་ཐུགས་དགྱེས་སམ་ཡང་ན་དུས་ཚོད་ངེས་ཅན་ཞིག་ལ་མི་རྟག་པ་སྒོམ་པ་དང་བྱང་ཆུབ་སེམས་སོགས་བསླབ་པ་དང་།གཞུང་ལུགས་མང་པོར་ཐོས་བསམ་བྱེད་པར་ཐུགས་དགྱེས་སམ་ཞེས་བསམ་གཞིག་བྱེད་རྒྱུ་གལ་ཆེ་སྙམ།འདི་ནི་ཁོ་བོས་ནང་བ་པ་ཞིག་ཡིན་ཕྱིན་ངེས་པར་ཏུ་བསམ་གཞིགས་གནང་དགོས་པ་ཅིག་ཀྱང་རེད་སྙམ།
ཁོ་བོས་སྲོག་བླུ་གཏོང་བ་དང་། དཀར་ཟས་རོལ་བ་སོགས་ལ་ཕན་པ་མེད་ཅེས་གཏན་ནས་ལབ་པ་མིན། དེའང་ཧ་ལས་པ་ཡག་པོ་རེད། རང་གཞན་སུ་ཡིན་རུང་དངོས་གནས་དྲང་གནས་ཕན་པ་འབྱུང་གི་ཡོད་ས་རེད། འོན་ཏེ་ང་ཚོས་དེ་ལས་མཆོག་གྱུར་གྱི་ཆོས་ཅིག་སྒྲུབ་ཐུབ་པ་རེད། དཔེར་ན་ང་རང་ཚོས་ཉིན་ཕྱེད་དུ་སྲོག་བླ་བཏང་ཚེ།ཉིན་ཕྱེད་དུ་ཐོས་བསམ་གནང་།བྱམས་པ་དང་སྙིང་རྗེ་ཆེན་པོ་སོགས་རང་རྒྱུད་དུ་བསྒོམ་ཐུབ་པ་བྱུང་ན་དེ་ནི་ཆོས་ཡིན་པ་མ་ཟད་མཆོད་པའང་རྒྱ་ཆེན་པོ་འགྱུར་འགྲོ་རེད།བདག་གི་བསམ་པ་ལ་སྟོན་པ་ཐུགས་རྗེ་ཅན་ཁོང་ཡང་ང་ཚོས་ཐོས་བསམ་ཡག་པོ་གནང་བ་དང་ཉམས་ལེན་ཡག་པོ་ཞིག་གནང་ཚེ་ངེས་པར་ཐུགས་དགྱེས་པ་ལས་སྲོག་བླུ་གཏོང་བ་དང་། དཀར་ཟས་རོལ་བ་རྐྱང་རྐྱང་གཉེར་བ་ཙམ་གྱིས་མ་རེད་སྙམ།དངོས་གནས་ལབ་ན་ནང་བ་སངས་རྒྱས་པའི་ཐུན་མོང་མ་ཡིན་པའི་ཁྱད་ཆོས་དེ་ཡང་སྲོག་བླུ་གནང་བ་དང་དཀའ་ཟས་མཆོད་པ་སོགས་སྤྱོད་པ་མ་ཡིན་པར་བཐའ་བཞི་སྤྲོས་བྲལ་སོགས་ཀྱི་ལྟ་བ་དེ་རེད། དེའི་ཕྱིར་ན་ང་ཚོས་ལྟ་བ་དེ་དག་རྒྱུད་ལ་སྐྱེས་ཕྱིར་ཧུར་བརྩོན་གནང་དགོས་པ་གལ་ཆེ་རེད་སྙམ།
དེ་ཕྱིར་ན་ཆེས་ལེགས་པའི་སྲོག་བླུ་ནི་ཚེ་སྲོག་ལ་འདྲ་མཉམ་གྱི་སེམས་བསྐྱེད་བྱུང་བ་དེ་རེད།ཆེས་ལེགས་པའི་དཀར་ཟས་ནི་ཚེ་སྲོག་ལ་བྱམས་པ་དང་སྙིང་རྗེ་ཆེན་པོ་སྐྱེས་པ་དེ་རེད་དོ།
_____ངག་བློ་རྒྱལ་གྱིས་སྦྱར།
