མར་ཁུ་རྒྱལ་མཚན།
རི་སྒང་གི་དཔྲལ་བར་འབྱར་བའི
ལྷིང་འཇགས་ཀྱི་གྲོང་ཚོ་ཆུང་ཆུང
ལྷ་ཚོགས་ཀྱིས་མཐའ་ནས་བསྐོར་བའི
མི་ཡུལ་གྱི་གྲོང་ཚོ་ཆུང་ཆུང
ཉི་ཤར་གྱི་སྔོན་ལ་མིག་ཟུང་ཕྱེ་སྲིད་པའི་གྲོང་ཚོ་ཆུང་ཆུང
ཉི་ནུབ་ཀྱི་སྔོན་ལ་སྔུར་བ་འཐེན་སྲིད་པའི་གྲོང་ཚོ་ཆུང་ཆུང
བྱ་ཚོགས་ཀྱིས་ནམ་མཁའ་བསྐྱུར་ཏེ
ཚང་ལ་ལོག་ཤུལ་ནས
མི་ཚོགས་ཀྱིས་རྐང་རྗེས་བསྐྱུར་ཏེ
ཡུལ་ལ་ལོག་ཤུལ་ནས
ངས་ཁྱེད་རང་རྙེད་བྱུང
དར་ལྕོག་ཁ་ཤས་ཀྱི་འདབས་རོལ་ན
རྨི་ལམ་རྨི་བཞིན་པའི་གྲོང་ཚོ་ཆུང་ཆུང
ལྷ་ཡུལ་ན་མཆོད་མེ་ལྟར་འཛུམ་པའི
མི་ཡུལ་གྱི་གྲོང་ཚོ་ཆུང་ཆུང
ཁྱེད་ཀྱི་ཕྱིར་དུ
ང་རང་ཐག་རིང་ཐག་རིང་ཞིག་ནས་འོངས་ཤིང
ཁྱེད་ཀྱི་ཕྱིར་དུ
ང་རང་ཐག་རིང་ཐག་རིང་ཞིག་ལ་གཏན་ནས་འགྲོ་མི་སྲིད།
