https://mp.weixin.qq.com/s/NGSETNVw_leBmhDGCGZhpQ
发呢条推送无他，就系想转载一下央视新闻公众号一篇关于粤语嘅文章《粤粤粤粤粤粤粤听粤好听！》，大家可以点入去上面嘅链接睇下。
从呢篇文章可以睇得出，即便系央视呢种权威嘅官方媒体，对粤语都系持一种十分之肯定嘅态度，表示国家层面对粤语有足够嘅重视。而对于粤语嘅意义同价值，文章更加系用咗好长嘅篇幅去论述同介绍。其实好多内容我以前都有同大家分享过，但系当然我哋呢啲自媒体仔讲嘢嘅力度肯定唔够，能够产生嘅作用有限。而家有央视咁权威嘅机构帮粤语发声，相信会有牙力好多，大家会更加容易接受，对于粤语嘅进一步传承同发扬都会起到非常之重要嘅作用。
另一方面，我哋都应该睇到，种种现象都表明粤语喺社会中嘅地位有慢慢回复上升嘅态势，例如今次央视新闻同粤语企台，今年年初嘅春晚有好多个节目都有提及粤语，广州而家好多幼儿园小学都有教小朋友广府童谣等等。呢个绝对系一个好嘅趋势，证明粤语并唔系一个被边缘化嘅语言，而系越嚟越被重视。喺推广普通话嘅大环境下，特色地方语言嘅发展同样可以多姿多彩，嗰啲口口声声话要打压粤语同埋上纲上线讲粤语系地方主义嘅人真系可以收口啦。
讲粤语嘅人千祈唔可以有低人一等或者觉得自己另类嘅心理，而系应该要有将自己嘅母语传承同发展嘅志气。唔一定要有势必发扬光大嘅使命感，只要有心、有行动，其实就已经足够啦。所做嘅嘢唔需要多，就系平时喺识粤语嘅朋友之间讲番粤语，喺屋企多啲教自己嘅小朋友讲粤语，得闲注重积累关于粤语嘅知识等等。就呢啲一点一滴嘅行动，持之以恒都会产生好可观嘅效果。
粤语嘅地位逐渐受到关注，其实都系此前你同我一直努力付出嘅结果。只要有人做，就一定会有人睇到。一开始我就讲过，我做粤语推送从嚟都唔系为咗钱或者为咗名，只系想尽自己一份绵力将粤语传播开去，呢个进程无论有几慢，始终都会有进步。见到其他人宣传粤语有效果，我同样都会由衷发自内心噉觉得开心。最后无论边个成功，只要达到发扬粤语嘅目的，我都会全力支持。望大家可以继续齐心协力，将呢份努力延续落去、传递落去。希望日后有更多讲粤语嘅人可以为传承粤语出一分力，有更多粤语唔系母语嘅人可以接受呢种语言，甚至爱上或者努力学习呢种语言。粤语有强大嘅生命力，但系都需要你我嘅用心呵护，先至可以茁壮发展，荫及我哋嘅子孙后代。
